તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
મલયાલમ એક્શન થ્રિલર ‘હાફ' નું ટીઆઈએફએફમાં વર્લ્ડ પ્રીમિયર થશે
એક્સેલ એન્ટરટેઇનમેન્ટ અને એએ ફિલ્મ્સ ઉત્તર ભારતમાં તેની રજૂઆત અને વિતરિત કરશે
મુંબઈ,તા.૭: મલયાલમ ફિલ્મ લવર્સ માટે ખુશીના સમાચાર છે. વેમ્પાયર એક્શન થ્રિલર ‘હાફ‘ નું સપ્ટેમ્બરમાં ટીઆઈએફએફ (TIFF) માં વર્લ્ડ પ્રીમિયર થશે. આ ફિલ્મનું ઉત્તર ભારતમાં રજૂઆત અને વિતરણ એક્સેલ એન્ટરટેઇનમેન્ટ અને એએ ફિલ્મ્સ (AA Films) કરશે.
ફ્રેગ્રન્ટ નેચર ફિલ્મ ક્રિએશન્સ (FNFC) ની મલયાલમ વેમ્પાયર એક્શન થ્રિલર ‘હાફ‘ (Half Movie TIFF 2026) નો આ સપ્ટેમ્બરમાં પ્રતિષ્ઠિત ટોર્ન્ટો ઇન્ટરનેશનલ ફિલ્મ ફેસ્ટિવલ (TIFF) ના મિડનાઇટ મેડનેસ વિભાગમાં વર્લ્ડ પ્રીમિયર થશે. આ પ્રોડક્શન કંપની અને તેની આ નવી ફિલ્મ માટે એક મોટી સિદ્ધિ છે.
હાફ નું નિર્દેશન સમજાદે કર્યું છે, જ્યારે તેની વાર્તા પ્રવીણ વિશ્વનાથ અને સમજાદે લખી છે. ફિલ્મમાં રંજીત સજીવ, ઐશ્વર્યા રાજ, અબ્બાસ અને અમલા પોલ મહત્વની ભૂમિકામાં જોવા મળશે. એન સજીવ અને સજીવ પી.કે. દ્વારા પ્રોડ્યુસ કરવામાં આવેલી આ ફિલ્મ રોડ એક્શન, બદલો અને વેમ્પાયર દંતકથાને એકસાથે જોડે છે. તેની વાર્તા બે હાફ-બ્લડ વેમ્પાયર્સની આસપાસ ફરે છે, જેઓ લોહીની શોધમાં નીકળ્યા છે.
આ ફિલ્મને એક્સેલ એન્ટરટેઇનમેન્ટ, એએ ફિલ્મ્સ સાથે મળીને ઉત્તર ભારતમાં હિન્દીમાં રજૂ અને વિતરિત કરશે. ખાસ વાત એ છે કે મલયાલમ ફિલ્મ ઇન્ડસ્ટ્રી સાથે એક્સેલ એન્ટરટેઇનમેન્ટનું આ પ્રથમ સહયોગ પણ છે.
હાફ અંગે વાત કરતા એક્સેલ એન્ટરટેઇનમેન્ટના કો-ફાઉન્ડર રિતેશ સિધવાનીએ કહ્યું, ‘‘હું હંમેશા એવી ફિલ્મોથી ઉત્સાહિત રહ્યો છું, જે કંઈક અલગ કરવાની હિમત રાખે છે અને ‘હાફ‘ પહેલીવાર જોવાથી જ મને ખાસ લાગી. ફિલ્મની પોતાની એક અલગ સિનેમેટિક ઓળખ અને મજબૂત ક્રિએટિવ વિઝન છે. મને ખુશી છે કે હું તેની થિયેટર રિલીઝનો હિસ્સો બની રહ્યો છું અને આશા છે કે દર્શકો આ શાનદાર ફિલ્મને મોટા પડદા પર ચોક્કસ પસંદ કરશે.''
એક્સેલ એન્ટરટેઇનમેન્ટના કો-ફાઉન્ડર ફરહાન અખ્તરે કહ્યું, ‘‘સમજાદના પ્રેઝન્ટેશનમાં એક અલગ પ્રકારનો રો (Raw) અંદાજ અને ઊંડાણ છે, જેણે મારું ધ્યાન ખેંચ્યું. આ ફિલ્મ તમને અંદરથી ઢંઢોળી દે છે અને પછી પોતાની પકડ ઢીલી થવા દેતી નથી. આ ફિલ્મનો હિસ્સો બનીને અને તેને દર્શકો સુધી પહોંચાડવા અંગે હું ખૂબ જ ઉત્સાહિત છું.
ફ્રેગ્રન્ટ નેચર ફિલ્મ ક્રિએશન્સના પ્રોડ્યુસર એન સજીવે કહ્યું, ‘‘દરેક ફિલ્મની શરૂઆત એક સપનાથી થાય છે, પરંતુ કેટલીક જ ફિલ્મો એવી હોય છે જેમને પોતાની સીમાઓ બહાર પણ દર્શકો સુધી પહોંચવાની તક મળે છે. જ્યારે અમે ‘હાફ‘ પર વિશ્વાસ મૂક્યો, ત્યારે જ અમને ખબર હતી કે અમે એક એવી નવી અને બેબાક દુનિયાને સામે લાવી રહ્યા છીએ, જે બિલકુલ અલગ, અનોખી અને ઘણી શક્યતાઓથી ભરેલી છે. હવે તેને ટીઆઈએફએફમાં દુનિયા સમક્ષ પ્રીમિયર થતી જોવી અમારા માટે ખૂબ જ ખુશી અને ગર્વની વાત છે. મને ખાસ કરીને ખુશી છે કે અમારા ડિરેક્ટર સમજાદ આ ફિલ્મ દ્વારા ગ્લોબલ સ્ટેજ પર ડેબ્યૂ કરી રહ્યા છે. અમને ગર્વ છે કે એક્સેલ એન્ટરટેઇનમેન્ટ અને એએ ફિલ્મ્સ અમારી સાથે જોડાયા છે, ‘હાફ‘ પર અમારા વિશ્વાસને શેર કરી રહ્યા છે અને તેને ભારતની સાથે સાથે વિશ્વભરના દર્શકો સુધી પહોંચાડવામાં અમારી સાથે છે. અમને આશા છે કે ‘હાફ‘ દરેક જગ્યાના દર્શકો સાથે જોડાઈ શકશે અને આ માત્ર તેની સફરની શરૂઆત હશે.''
હાફ ના ડિરેક્ટર અને કો-રાઇટર સમજાદે કહ્યું, ‘‘‘હાફ‘ વેમ્પાયરની વાર્તાને પૂરી રીતે રો અને રિયલ ટાઇમ અંદાજમાં રજૂ કરે છે. ફિલ્મમાં સ્લો-મોશનનો ઉપયોગ સંપૂર્ણપણે ટાળવામાં આવ્યો છે, જેથી દર્શકોને દરેક ક્ષણની અસર સીધી અનુભવાય. ટીઆઈએફએફ માટે પસંદગી પામવી મારા માટે ખૂબ જ સન્માનની વાત છે અને ફ્રેગ્રન્ટ નેચર ફિલ્મ ક્રિએશન્સ, મારા પ્રોડ્યુસર્સ એન સજીવ અને સજીવ પી.કે. સાથે ગ્લોબલ સ્ટેજ પર ભારતીય સિનેમાનું પ્રતિનિધિત્વ કરતા મને ખૂબ ગર્વ થઈ રહ્યો છે. આ બધાએ મારી સાથે મળીને આ પ્રોજેક્ટ તૈયાર કર્યો છે. અમે એક્સેલ એન્ટરટેઇનમેન્ટ સાથે મળીને આ ફિલ્મને ભારતમાં મોટા પડદા પર દર્શકો સુધી પહોંચાડવા અંગે ખૂબ જ ખુશ છીએ.''
‘હાફ‘ ફ્રેગ્રન્ટ નેચર ફિલ્મ ક્રિએશન્સ (FNFC) અને ડિરેક્ટર સમજાદ તથા લેખક પ્રવીણ વિશ્વનાથની ક્રિએટિવ ટીમ વચ્ચેની બીજી ફિલ્મ છે. આ પહેલાં બંનેએ વર્ષ ૨૦૨૪માં આવેલી મર્ડર મિસ્ટ્રી ‘ગોલમ‘ માં સાથે કામ કર્યું હતું, જેમાં રંજીત સજીવ અને દિલીશ પોથન જોવા મળ્યા હતા.
ફિલ્મના એક્શનને મોટા પાયે દર્શાવવા માટે આંતરરાષ્ટ્રીય સ્તરે પ્રખ્યાત એક્શન કોરિયોગ્રાફર વેરી ટ્રાય યુલિસ્મેનને જોડવામાં આવ્યા છે, જેમણે ‘ધ રેડ ૨‘ અને ‘ધ નાઇટ કમ્સ ફોર અસ‘ જેવી ફિલ્મોમાં કામ કર્યું છે. યુલિસ્મેને રંજીત સજીવ અને ઐશ્વર્યા રાજને કેટલાય મહિનાઓ સુધી ટ્રેનિંગ આપી હતી, જેથી બંને કલાકારો પોતાના સ્ટન્ટ્સ અને એક્શન સીક્વન્સ પોતે કરી શકે. યુલિસ્મેનની ટીમના સભ્યો તાજેતરમાં આવેલી હિટ એક્શન થ્રિલર ‘ધ ફયુરિયસ‘ માં પણ સામેલ હતા. બાકીની ભારતીય એક્શન ફિલ્મોથી અલગ ‘હાફ‘ માં એક પણ સ્લો-મોશન એક્શન સીક્વન્સ નથી.
ફિલ્મની ટેકનિકલ ટીમમાં રાષ્ટ્રીય પુરસ્કાર વિજેતા એડિટર મહેશ ભુવનેન્દ, રાષ્ટ્રીય પુરસ્કાર વિજેતા પ્રોડક્શન ડિઝાઇનર મોહનદાસ, સિનેમેટોગ્રાફર પપ્પીનુ, કંપોઝર મિધુન મુકુંદન અને રાષ્ટ્રીય પુરસ્કાર વિજેતા સાઉન્ડ ડિઝાઇનર વિષ્ણુ ગોવિદ સામેલ છે.
૧૧૭ દિવસ સુધી અલગ-અલગ લોકેશન્સ પર શૂટ કરાયેલી ‘હાફ‘ નું શૂટિગ રાજસ્થાનના રણ, કેરળના હિલ સ્ટેશનો અને કઝાકિસ્તાનના બરફીલા વિસ્તારોમાં થયું છે. ફિલ્મમાં શાનદાર લોકેશન્સ અને મોટા પાયાનું એક્શન જોવા મળશે. તેને પેન-ઇન્ડિયા સિનેમેટિક અનુભવ તરીકે તૈયાર કરવામાં આવી છે અને તે મલયાલમ, તમિલ, તેલુગુ, હિન્દી અને કન્નડમાં રિલીઝ થશે.
ફ્રેગ્રન્ટ નેચર ફિલ્મ ક્રિએશન્સ માટે ‘હાફ‘ અલગ-અલગ જોનરની ફિલ્મો સાથે સતત વધતી તેમની ફિલ્મોની યાદીમાં વધુ એક મહત્વનું કદમ છે. પ્રોડક્શન હાઉસે મોહનલાલ સ્ટારર ‘પ્રણયમ‘ થી પોતાની શરૂઆત કરી હતી. તાજેતરમાં જ કંપનીએ ભારતીય દર્શકો માટે આંતરરાષ્ટ્રીય ફિલ્મોના અધિકારો પણ મેળવ્યા છે, જેમાં ૨૦૨૬ સનડાન્સ વિજેતા ‘જોસેફીન‘ અને ઓસ્કાર-નોમિનેટેડ ‘લિટલ એમેલી ઓર ધ કેરેક્ટર ઓફ રેન‘ સામેલ છે.
હાફ ની ભારત અને આંતરરાષ્ટ્રીય થિયેટર રિલીઝની તારીખની જાહેરાત પાછળથી કરવામાં આવશે.
(3:10 PM IST)
છેલ્લા 8 દિવસમાં સૌથી લોકપ્રિય 
