મુંબઈ : બોલિવૂડના દિગ્ગજ અભિનેતા ધર્મેન્દ્રના અવસાન બાદ હેમા માલિની અને તેમના સાવકા પુત્રો સની દેઓલ તથા બોબી દેઓલ વચ્ચેના સંબંધોને લઈને વિવિધ અટકળો ચાલી રહી હતી. જોકે, પીઢ અભિનેત્રી અને ભાજપના સાંસદ હેમા માલિનીએ તમામ અફવાઓ પર પૂર્ણવિરામ મૂકતાં સની દેઓલની તાજેતરમાં રિલીઝ થયેલી ફિલ્મ 'બટવારા ૧૯૪૭' ની પ્રશંસામાં સોશિયલ મીડિયા પ્લેટફોર્મ X પર ખાસ પોસ્ટ શેર કરી છે. પરિવારમાં બધું બરાબર હોવાનો સંકેત આપતાં તેમણે આ ફિલ્મના કથાનક અને અભિનયના ખૂબ વખાણ કર્યા છે.

હેમા માલિનીએ પોતાની પોસ્ટમાં લખ્યું હતું કે, "મેં આજે 'બટવારા ૧૯૪૭' ફિલ્મ જોઈ. આ ફિલ્મ એક સ્પષ્ટ અને સુંદર સંદેશ આપે છે જે આજે દેશ માટે અત્યંત જરૂરી છે." તેમણે વધુમાં ઉમેર્યું હતું કે આ ફિલ્મ દરેક વ્યક્તિને યાદ અપાવે છે કે માનવતા, પરસ્પર આદર અને સામાજિક સંવાદિતા એ નફરત અને ભાગલા કરતાં ક્યાંય વધુ મહત્વપૂર્ણ છે. અભિનેત્રીએ આશા વ્યક્ત કરી હતી કે ફિલ્મમાં આપવામાં આવેલો આ સુંદર સંદેશ લોકોને તેમની માનસિકતા બદલવા અને નફરતના બદલે દયા અને પ્રેમને પસંદ કરવા પ્રેરણા આપશે.

ફિલ્મની સ્ટારકાસ્ટ અને ટેકનિકલ ટીમની પ્રશંસા કરતાં 'શોલે' ફેમ હેમા માલિનીએ લખ્યું કે, "રાજકુમાર સંતોષી દ્વારા ઉત્કૃષ્ટ દિગ્દર્શન અને સની દેઓલ તથા શબાના આઝમી દ્વારા કમાલનો અભિનય કરવામાં આવ્યો છે. આ ઉપરાંત કરણ દેઓલ અને પ્રીતિ ઝિન્ટા સહિતના કલાકારોએ પણ સુંદર રમત દર્શાવી છે. સમયની જરૂરિયાત મુજબનો આટલો અદ્ભુત સંદેશ આપતી કાલાતીત ફિલ્મ બનાવવા બદલ હું આમિર ખાનને ખૂબ ખૂબ અભિનંદન આપું છું."

બીજી તરફ, બોક્સ ઓફિસ કલેક્શનની વાત કરીએ તો 'બટવારા ૧૯૪૭' ને વિવેચકો અને દર્શકો તરફથી મિશ્ર પ્રતિસાદ મળ્યો છે. આશરે ₹૧૨૦ કરોડના માતબર બજેટમાં બનેલી આ ફિલ્મે પોતાના પહેલા સપ્તાહના અંતે ભારતમાં ₹૨૬.૫૦ કરોડનું ચોખ્ખું કલેક્શન કર્યું છે, જે બજેટની સરખામણીએ થોડું નિરાશાજનક માનવામાં આવે છે. ફિલ્મ સમીક્ષકોના મતે સની દેઓલ અને શબાના આઝમીનો દમદાર અભિનય તથા દેશભક્તિનો ભાવ આ ફિલ્મના મુખ્ય આકર્ષણો છે.