મુંબઈ : ટી૨૦ વર્લ્ડ કપ ૨૦૨૪ના વિજેતા કેપ્ટન અને ભારતીય ક્રિકેટના 'હિટમેન' તરીકે જાણીતા રોહિત શર્મા હવે મનોરંજનની દુનિયામાં એક નવો અધ્યાય શરૂ કરવા જઈ રહ્યા છે. સોની પિક્ચર્સ નેટવર્ક્સ ઇન્ડિયાએ સોમવારે તેમના આગામી ફેમિલી શો 'ફેમિલી ફુલ હાઉસ વિથ રોહિત શર્મા' ના શીર્ષકની સત્તાવાર જાહેરાત કરી છે. આ શો દ્વારા રોહિત શર્મા ટેલિવિઝન પર પોતાનું પ્રથમ પદાર્પણ કરશે, જેનો ભવ્ય પ્રીમિયર આગામી ૧૯ સપ્ટેમ્બર, ૨૦૨૬ ના રોજ થવા જઈ રહ્યો છે.

ટી૨૦ અને ટેસ્ટમાંથી નિવૃત્તિ બાદ વનડેમાં શાનદાર લય

રોહિત શર્મા અગાઉ જ ટેસ્ટ અને ટી૨૦ ક્રિકેટમાંથી નિવૃત્તિ લઈ ચૂક્યા છે અને હાલ તેઓ માત્ર વનડે (ODI) ફોર્મેટમાં ભારતનું પ્રતિનિધિત્વ કરી રહ્યા છે. તાજેતરમાં ઈંગ્લેન્ડ સામે રમાયેલી ત્રણ વનડે મેચોની શ્રેણીમાં ભારતે ૨-૧ થી પરાજય નોધાવવો પડ્યો હતો, પરંતુ ૩૯ વર્ષીય રોહિત શર્માના બેટથી રનનો વરસાદ સતત ચાલુ રહ્યો હતો. ઈંગ્લેન્ડ પ્રવાસ દરમિયાન લોર્ડ્સના ઐતિહાસિક મેદાન પર રમાયેલી નિર્ણાયક શ્રેણી મેચમાં રોહિતે ૧૧૦ બોલમાં ૧૭ ચોગ્ગા અને ૫ છગ્ગાની મદદથી ૧૩૮ રનની યાદગાર સદી ફટકારીને પોતાના ટીકાકારોના મોં બંધ કરી દીધા હતા.

લોર્ડ્સમાં કોહલી સાથે સદીની ભાગીદારી અને વનડે રેકોર્ડ્સ

લોર્ડ્સ ખાતે ૩૮૮ રનના વિશાળ લક્ષ્યાંકનો પીછો કરતી વખતે રોહિત શર્મા અને તેના લાંબા સમયના સાથી ખેલાડી વિરાટ કોહલી (૭૪ રન) વચ્ચેની ૧૦૦થી વધુ રનની ભાગીદારીએ સ્ટેડિયમમાં ઉપસ્થિત તમામ ચાહકોને મંત્રમુગ્ધ કરી દીધા હતા. ૨૮૮ વનડે મેચોમાં ૧૧,૮૯૫ રન ધરાવતા રોહિત શર્મા વિશ્વના સર્વશ્રેષ્ઠ વનડે બેટ્સમેનોમાં ગણાય છે. તેઓ વિશ્વમાં સૌથી વધુ રન બનાવનારા બેટ્સમેનોની યાદીમાં ૭મા ક્રમે છે અને ભારતમાં સચિન તેંડુલકર (૧૮,૪૨૬) અને વિરાટ કોહલી (૧૪,૯૪૧) પછી ત્રીજા ક્રમે આવે છે.

વિશ્વકપ ૨૦૨૭ પહેલા ટીવી પર નવો અવતાર

ચાલુ વર્ષે રોહિત શર્માએ ૯ વનડે ઇનિંગ્સમાં ૪૨.૧૧ ની સરેરાશથી ૩૭૯ રન બનાવ્યા છે. ૨૦૨૭ ના વનડે વર્લ્ડ કપ સુધીમાં તેમની ઉંમરને લઈને ચાલી રહેલી અટકળો વચ્ચે, રોહિતે એક તરફ પોતાના વિસ્ફોટક બેટિંગ પરફોર્મન્સથી ક્રિકેટ પ્રેમીઓના દિલ જીતવાનું ચાલુ રાખ્યું છે અને હવે બીજી તરફ ૧૯ સપ્ટેમ્બરથી 'ફેમિલી ફુલ હાઉસ' શો મારફતે તેઓ ભારતના ઘરોમાં નાના પડદા દ્વારા પરિવાર સાથે મનોરંજન પીરસવા માટે સજ્જ બન્યા છે.