મુંબઈ: પ્રસિદ્ધ રેપર બાદશાહ અને પંજાબી અભિનેત્રી ઈશા રિખીના છૂટાછેડાની જાહેરાત બાદ મનોરંજન જગતમાં ભારે ખળભળાટ મચી ગયો છે. પોતાના લગ્ન તૂટવાના લગભગ પાંચ દિવસ બાદ આખરે ઈશા રિખીએ આ મામલે પોતાનું મૌન તોડ્યું છે. ઈશાએ એક મીડિયા ઈન્ટરવ્યુમાં પોતાના દિલનું દર્દ વ્યક્ત કરતા અનેક મોટા ખુલાસા કર્યા છે, જેનાથી તેના ચાહકો પણ સ્તબ્ધ થઈ ગયા છે. ઈશાએ સ્પષ્ટપણે જણાવ્યું કે વીતેલું એક વર્ષ તેના જીવનનો સૌથી કઠિન અને પડકારજનક તબક્કો રહ્યો છે. તેણે પોતાને ભોળી ગણાવતા કહ્યું કે તેણે આંખ બંધ કરીને વિશ્વાસ કર્યો હતો, જેના બદલામાં તેને માત્ર છેતરપિંડી જ મળી.

લગ્ન ગુપ્ત રાખવા અને માતા સાથે થયેલા વિવાદનો ખુલાસો: પોતાના લગ્નને દુનિયાથી છુપાવીને રાખવાના પ્રશ્ન પર ઈશા રિખીએ જણાવ્યું કે તે કોઈ પણ પ્રકારનો જાહેરમાં તમાશો નહોતી ઈચ્છતી. તેણે ભાવુક થઈને કહ્યું કે આ સમય તેના માટે ખૂબ મુશ્કેલ હતો અને તે સતત પોતાની જાતને પ્રશ્ન કરતી હતી કે તેણે આખરે શું ભૂલ કરી. ઈશાએ ઉમેર્યું કે તે બાદશાહને બેહદ પ્રેમ કરતી હતી અને તેની સાથે સાથે પોતાના સંબંધની પણ રક્ષા કરવાનો પ્રયાસ કરી રહી હતી. જ્યારે તેને પૂછવામાં આવ્યું કે શું તેને આ સંબંધમાં છેતરપિંડી અનુભવાઈ, તો અભિનેત્રીએ હિચકિચાટ વગર 'હા' માં જવાબ આપતા કહ્યું કે તેને ખરેખર ધોખો મળ્યો છે.

ઈશા રિખીએ વાતચીત દરમિયાન એ પણ ખુલાસો કર્યો કે જ્યારે તેની માતાએ તેમના લગ્નની તસવીરો સોશિયલ મીડિયા પર પોસ્ટ કરી હતી, ત્યારે તેનો તેની માતા સાથે ભારે ઝઘડો થયો હતો. પરંતુ સમય વિત્યા બાદ તેને એ અહેસાસ થયો કે જે સત્ય તેને બતાવવામાં આવી રહ્યું હતું, તે અસલિયતથી કોસો દૂર હતું. અભિનેત્રીએ કહ્યું કે તે પોતાને પૂછતી હતી કે તે આટલી ભોળી કેવી રીતે હોઈ શકે. જોકે, તેનું માનવું છે કે જે થાય છે તે સારા માટે જ થાય છે. આ મુશ્કેલ સમયમાં તેની માતાના અટૂટ સપોર્ટ અને ઈશ્વર પરના વિશવાસે જ તેને પૂરી રીતે તૂટવાથી બચાવી લીધી.

ભાવનાત્મક નિર્ભરતા અને ભવિષ્ય અંગે ઈશાનું વલણ: લોકો પર ખૂબ જલ્દી વિશ્વાસ કરી લેવાની પોતાની આદત અંગે વાત કરતા ઈશાએ કહ્યું કે તે ભાવનાત્મક રીતે બીજા પર ખૂબ નિર્ભર હતી. જ્યારે તે કોઈના પર વિશ્વાસ કરતી ત્યારે પૂરી રીતે સમર્પિત થઈ જતી હતી, પરંતુ આ છેતરપિંડીએ તેને ઊંડો આઘાત આપ્યો છે. તેણે જણાવ્યું કે જ્યારે તેને ખબર પડી કે તેની પીઠ પાછળ વાતો થઈ રહી છે, ત્યારે તેનો વિશ્વાસ પૂરી રીતે ચકનાચૂર થઈ ગયો. હાલમાં તે પોતાને માનસિક રીતે સંભાળવા અને હીલિંગની પ્રક્રિયા પર ધ્યાન આપી રહી છે. ઈશા આ પ્રકરણને પૂરા સન્માન સાથે સમાપ્ત કરવા માંગે છે અને કોઈ પણ પ્રકારની આરોપ-પ્રત્યારોપની રમત રમવાથી બચી રહી છે.

ભવિષ્ય વિશે વાત કરતા ઈશા રિખીએ કહ્યું કે હવે તેને લગ્નના નામથી જ ડર લાગવા માંડ્યો છે અને હાલમાં તેના જીવનમાં આવી કોઈ વસ્તુ માટે જગ્યા નથી. જોકે, તેનું એ પણ કહેવું છે કે તે કડવાશથી ભરેલી વ્યક્તિ બનવા નથી માંગતી અને આજે પણ તેને પ્રેમ પર પૂરો વિશ્વાસ છે. ભલે તે રોમેન્ટિક પ્રેમ ન હોય, પરંતુ તેની માતા અને મિત્રોનો પ્રેમ તેની સાથે છે. ઈશા ભગવાનના દરેક નિર્ણયને સ્વીકારવા માટે પૂરી રીતે તૈયાર છે અને જીવનમાં આગળ વધવાનો પ્રયાસ કરી રહી છે.