મુંબઈ, તા.૨૫: બોલિવૂડના દિગ્ગજ ડાયરેક્ટર સંજય લીલા ભણસાલીની આગામી મોસ્ટ અવેટેડ ફિલ્મ 'લવ એન્ડ વોર' (Love & War) ને લઈને દરરોજ નવા અપડેટ્સ સામે આવી રહ્યા છે. રણબીર કપૂર, આલિયા ભટ્ટ અને વિક્કી કૌશલ જેવા મજબૂત સ્ટારકાસ્ટ ધરાવતી આ ફિલ્મ અત્યારથી જ ચર્ચાના કેન્દ્રમાં છે. તાજેતરમાં જ મેકર્સે ફિલ્મમાંથી રણબીર અને આલિયાના ફર્સ્ટ લુક પોસ્ટર્સ જાહેર કર્યા હતા, જેમાં આલિયા ભટ્ટ એક ગ્લેમરસ 'કેબરે ડાન્સર'ના રોલમાં જોવા મળી રહી છે. આ પોસ્ટર્સ રિલીઝ થયાના તરત જ સોશિયલ મીડિયા પર એક અજાણ્યા લોકેશન પરથી લીક થયેલો વીડિયો વાયરલ થયો છે, જેમાં આલિયા આ જ ફિલ્મ માટે ડાન્સ સિક્વન્સનું શૂટિંગ કરતી હોવાનો દાવો કરવામાં આવી રહ્યો છે.

વાયરલ થયેલી આ ક્લિપમાં આલિયાનો ચહેરો ભલે સ્પષ્ટપણે દેખાતો ન હોય, પરંતુ તેનો પોશાક અને ગ્લેમરસ બોડી લેંગ્વેજ આલિયાના રિલીઝ થયેલા કેબરે લુક સાથે તદ્દન મેળ ખાય છે. બેકગ્રાઉન્ડમાં વાગતું સંગીત અને ભણસાલી સ્ટાઇલનું ભવ્ય સેટ અપ જોઈને ચાહકો અંદાજ લગાવી રહ્યા છે કે આ ભણસાલીની ફિલ્મનું એક સુપરહિટ ડાન્સ નંબર બનવા જઈ રહ્યું છે.

સોશિયલ મીડિયા પર નેટિઝન્સની ધમાકેદાર પ્રતિક્રિયા

આ વીડિયો સામે આવ્યા બાદ સોશિયલ મીડિયા પ્લેટફોર્મ 'X' (ટ્વિટર) પર ફિલ્મ રસિકોની પ્રતિક્રિયાઓનો પૂર આવ્યો છે:

• એક યુઝરે ઉત્સાહ વ્યક્ત કરતા લખ્યું, "જો આ દ્રશ્ય સાચું હોય તો ગીત ખરેખર અદ્ભુત છે! ભણસાલીનું સિગ્નેચર મ્યુઝિક પાછું આવી રહ્યું છે અને આલિયા ભટ્ટ આમાં પોતાના કરિયરનું સૌથી આકર્ષક અને હોટ પાત્ર ભજવી રહી છે."

• અન્ય એક ચાહકે કમેન્ટ કરી, "ભણસાલીની ફિલ્મ હોય એટલે સોંગ્સ અને મ્યુઝિક ટોપ નોચ જ હોવાનું. આલિયા સ્ક્રીન પર બોડી લેંગ્વેજ અને ડાન્સ મૂવ્સ ખૂબ જ પરફેક્ટલી પકડે છે, જે આ નાની ક્લિપમાં પણ સ્પષ્ટ દેખાય છે."

રિલીઝ ડેટ લંબાવાઈ: ૨૦૨૭માં થિયેટરોમાં ધમાકો કરશે

ફિલ્મની રિલીઝ ડેટ અંગે વાત કરીએ તો, 'લવ એન્ડ વોર' પહેલા ક્રિસમસ ૨૦૨૫માં રિલીઝ થવાની હતી. ત્યારબાદ તેને માર્ચ ૨૦૨૬ સુધી પાછી ઠેલવવામાં આવી હતી. હવે નિર્માતાઓએ આખરી નિર્ણય લેતાં જાહેરાત કરી છે કે ફિલ્મ ૨૧ જાન્યુઆરી ૨૦૨૭ ના રોજ વિશ્વભરના સિનેમાઘરોમાં રિલીઝ કરવામાં આવશે. ભણસાલીના ભવ્ય સેટ અને ત્રણેય સુપરસ્ટાર્સના શાનદાર અભિનયને મોટા પડદા પર જોવા માટે ચાહકો આતુરતાથી રાહ જોઈ રહ્યા છે.