મુંબઈ : લોકપ્રિય અભિનેત્રી ઇશિતા દત્તાએ તાજેતરમાં એક ખાસ મુલાકાતમાં દિવાળીના તહેવારને લઈને પોતાના દિલની વાત શેર કરી છે. ઇશિતા માટે દિવાળી એટલે સ્વજનો સાથે અદભુત સમય વિતાવવો. દર વર્ષની જેમ આ વર્ષે પણ તેમનું ઘર દીવાઓ, રંગોળી, ફૂલો, પૂજા અને સ્વાદિષ્ટ વાનગીઓથી ધમધમી ઉઠવાનું છે. તેમણે જણાવ્યું કે બાળકોને આ બધી સંસ્કૃતિ અને રિવાજોથી પરિચિત કરાવવું તેમને ખૂબ ગમે છે અને બાળકો પણ ફૂલોની રંગોળી તથા પૂજામાં ખૂબ આનંદ માણે છે.

આ ખાસ દિવસની ઉજવણી વિશે વાત કરતા ઇશિતાએ જણાવ્યું કે તેઓ આખો દિવસ પરિવાર સાથે વિતાવે છે. સાંજના સમયે તેઓ દર વર્ષની જેમ મિત્રોના ઘરે દિવાળી ગેટ-ટુગેધરમાં જાય છે. ત્યારબાદ રાત્રે તેમના માતા-પિતા અને તેઓ પોતે બંગુર નગર સ્થિત કાલીવાડી મંદિરે કાલી પૂજા માટે જાય છે. ત્યાં પૂજા અર્ચના કર્યા બાદ મહાપ્રસાદ લઈને તેઓ પાછા ફરે છે. આ એક સાદી પરંતુ તેમની સૌથી પ્રિય દિનચર્યા છે.

અભિનેત્રીએ ઉમેર્યું કે દિવાળીનો સૌથી સુંદર ભાગ દીવાઓની રોશની છે. આખો શહેરમાં રોશનીનો જમાવડો હોય છે અને દરેક રસ્તો ખૂબ જ સુંદર લાગે છે. પોતાના બાળપણને યાદ કરતા તેમણે કહ્યું કે તેઓ હંમેશાં પોતાના પિતા સાથે મળીને ઘરને રોશનીથી સજાવતા હતા. આજે પણ તેઓ પોતાના બાળકો સાથે એ જ પરંપરા આગળ વધારી રહ્યા છે. જ્યારે તેમના પિતા લાઈટ્સ લગાવે છે અને તેમના બાળકો તેને જોતા હોય છે, ત્યારે તે ક્ષણ તેમને ખૂબ જ ખુશી અને જૂની યાદો તાજી કરાવે છે.

જમશેદપુરમાં વિતાવેલા સમયને યાદ કરતા ઇશિતાએ પોતાની સૌથી યાદગાર દિવાળી વિશે જણાવ્યું કે તેઓ ત્યાં નારિયેળના લાડુ બનાવતા હતા. આજે પણ તેમની મમ્મી દર વર્ષે તે મીઠાઈ બનાવે છે અને ઇશિતા તથા તેમના પિતા બેસીને તેને યોગ્ય આકાર આપે છે. હાલ તેમના બાળકો નાના હોવા છતાં લાડુ બનવાની રાહ જોતા હોય છે જેથી તેઓ તેનો સ્વાદ માણી શકે. ઇશિતાની મમ્મીના હાથના નારિયેળના લાડુ તેમના અત્યંત પ્રિય છે.

પર્યાવરણ પ્રત્યે જાગૃત ઇશિતા હવે ફટાકડા ફોડવાથી દૂર રહે છે. તેમણે જણાવ્યું કે બાળપણમાં તેઓ ખૂબ ફટાકડા ફોડતા હતા, પરંતુ છેલ્લા પંદરથી વીસ વર્ષથી તેમણે ફટાકડા ફોડવાનું બંધ કરી દીધું છે. મહત્તમ એક કે બે ફૂલઝડી જ તેઓ સળગાવે છે. તેમણે લોકોને પણ અપીલ કરી છે કે વાયુ અને ધ્વનિ પ્રદૂષણને અટકાવવા માટે ફટાકડાનો ઉપયોગ નહિવત કરવો જોઈએ.