મુંબઈ, તા. 18  : બોલિવૂડની સૌથી મોટી એન્સેમ્બલ કોમેડી ફિલ્મ ‘Welcome To The Jungle’નું ટાઇટલ ટ્રેક આજે જંગલી મ્યુઝિક દ્વારા રિલીઝ કરવામાં આવ્યું છે. અક્ષય કુમાર, દિશા પટણી અને સુનીલ શેટ્ટી સહિતના જંગી સ્ટારકાસ્ટ સાથેનું આ હાઈ-એનર્જી ગીત 2007ની ઓરિજિનલ ‘Welcome’ ફિલ્મની યાદ તાજી કરાવે છે.

ટાઇટલ ટ્રેકની શરૂઆત નાના પાટેરકના ફેમસ ડાયલોગ ‘આલુ લે લો, કાંદા લે લો’થી થાય છે, ત્યારબાદ એક ચિમ્પાન્ઝીના હેરાન ચહેરા સાથે આખી સ્ટારકાસ્ટની ધમાલ જોવા મળે છે. આ ગીતને સાજિદ-વાજિદના ઓરિજિનલ કમ્પોઝિશન પરથી વિક્રમ મોન્ટ્રોઝે રિક્રિએટ કર્યું છે. ગીતમાં શાન, પ્રિયા પાટીદાર અને વિક્રમ મોન્ટ્રોઝે અવાજ આપ્યો છે, જ્યારે નવા શબ્દો મેઘા બાલીએ લખ્યા છે.

ફિલ્મમાં અક્ષય કુમાર સાથે સુનીલ શેટ્ટી, દિશા પટણી, જેકલીન ફર્નાન્ડિસ, અરશદ વારસી, જેકી શ્રોફ, પરેશ રાવલ, રવીના ટંડન, લારા દત્તા, જ્હોની લીવર, શ્રેયસ તલપડે, તુષાર કપૂર, રાજપાલ યાદવ, કૃષ્ણા અભિષેક, કિકુ શારદા, દલેર મહેંદી, આફતાબ શિવદાસાની, મુકેશ તિવારી, યશપાલ શર્મા, કિરણ કુમાર, ઝાકિર હુસૈન, વિન્દુ દારા સિંહ, ઉર્વશી રૌતેલા સહિત 34 કલાકારો છે. ડિરેક્ટર અહેમદ ખાને જણાવ્યું કે ‘Welcome To The Jungle’નું દરેક ગીત સિનેમેટિક, એન્ટરટેઈનિંગ અને વિશાળ સ્કેલ પર માઉન્ટ થયેલું હશે.

સોશિયલ મીડિયા પર ગીતને લઈને મિશ્ર પ્રતિક્રિયા મળી છે. ઘણા યુઝર્સે અક્ષય કુમારની કોમિક ટાઈમિંગ અને રવીના ટંડન સાથેની કેમિસ્ટ્રીને વખાણી ‘OG કોમેડી કિંગ’ કહ્યો, જ્યારે કેટલાક નેટિઝન્સે ‘કિતની ભીડ ઔર કિતના ચાઓટિક’ કહી ગીતને વધુ પડતું ગીચ ગણાવ્યું. ઉર્વશી રૌતેલાને ગીતમાં જોઈને ચાહકો ચોંક્યા, જ્યારે લારા દત્તા ગીતમાં ન દેખાતા રિપ્લેસમેન્ટની ચર્ચા પણ થઈ.

ફિલ્મ ‘Welcome To The Jungle’ 26 જૂન 2026ના રોજ સિનેમાઘરોમાં રિલીઝ થશે. ફિલ્મનું નિર્માણ ફિરોઝ એ. નડિયાદવાલા, રાકેશ ડાંગ અને વેદાંત વિકાસ બાલીએ કર્યું છે. સ્ટોરી સ્વ. નીરજ વોરાની છે અને ડાયલોગ ફરહાદ સામજીએ લખ્યા છે. મેકર્સનું કહેવું છે કે આ ટ્રેક ‘પ્યોર, અનએપોલોજેટિક સ્પેક્ટેકલ’ છે અને વર્ષનો સૌથી મોટો સાઉન્ડટ્રેક બનશે.