મુંબઈ : બોલિવૂડના જાણીતા અભિનેતા રણબીર કપૂરે તાજેતરમાં એક પોડકાસ્ટમાં આપેલા નિવેદનથી તેમના લાખો ચાહકોને ભારે આશ્ચર્ય અને ચિંતામાં મૂકી દીધા છે. અભિનેતાએ કહ્યું હતું કે આ તેમનો અભિનેતા તરીકેનો છેલ્લો દાયકો હોઈ શકે છે. આ વાત સાંભળીને સોશિયલ મીડિયા પર ફેન્સ તરફથી ભાવનાત્મક પ્રતિક્રિયાઓનો ધોધ વૂટી નીકળ્યો હતો અને સૌ કોઈ જાણવા માંગતા હતા કે શું ખરેખર તેઓ ફિલ્મી દુનિયાને અલવિદા કહેવાની તૈયારી કરી રહ્યા છે.

બીબીસી એશિયન નેટવર્ક સાથેની વાતચીતમાં રણબીરે પોતાના વ્યસ્ત શૂટિંગ શેડ્યુલ વિશે ચર્ચા કરી હતી. તેમણે જણાવ્યું કે તેઓ લાંબા વિરામ વગર સતત એક પછી એક ફિલ્મમાં કામ કરી રહ્યા છે. આ દરમિયાન તેમણે અચાનક એવું નિવેદન આપ્યું કે તેમને લાગે છે કે આ અભિનેતા તરીકેનો તેમનો છેલ્લો દાયકો છે. તેમની સાથે હાજર રહેલી રામાયણની સહ-અભિનેત્રી સાઈ પલ્લવી પણ આ વાત સાંભળીને ચોંકી ગઈ હતી અને તેણે તરત જ સ્પષ્ટતા માંગી હતી.

ચાહકોમાં મચેલી હલચલ બાદ રણબીર કપૂરે પોતાના નિવેદનનો અર્થ સ્પષ્ટ કર્યો હતો. તેમણે જણાવ્યું કે તેમનો ઈરાદો નિવૃત્તિ લેવાનો નહોતો, પરંતુ તેઓ રામાયણ જેવી ફિલ્મોમાં અત્યારે જે પ્રકારના પાત્રો ભજવી રહ્યા છે તેવા રોલ્સ ભવિષ્યમાં મળવા અને કરવા અંગે વાત કરી રહ્યા હતા. તેઓ ફિલ્મોથી દૂર જવાની વાત નહોતા કરી રહ્યા પરંતુ ભારે ભરકમ અને પડકારજનક ભૂમિકાઓના સંદર્ભમાં બોલી રહ્યા હતા. આ ઉપરાંત રણબીરે દિગ્દર્શન ક્ષેત્રે રસ દાખવતા જણાવ્યું હતું કે તેઓ આગામી બે થી ત્રણ વર્ષમાં પોતાની દિગ્દર્શક તરીકેની પ્રથમ ફિલ્મનું કામ શરૂ કરવા માંગે છે, જો કે તેઓ જરૂરી નથી કે પોતાની ફિલ્મમાં પોતાને જ કાસ્ટ કરે.

સોશિયલ મીડિયા પર ફેન્સે ભારે નારાજગી અને પ્રેમ વ્યક્ત કર્યો હતો. એક યૂઝરે લખ્યું કે રણબીરની ઉંમર હજુ માત્ર ૪૪ વર્ષ છે અને તેઓ ઈચ્છે છે કે તે આગામી બે દાયકા સુધી કામ કરે. અન્ય એક પ્રશંસકે મજાકમાં કહ્યું કે જ્યાં સુધી તે ૮૫ વર્ષના ન થાય ત્યાં સુધી તેમણે નિવૃત્ત થવાનું વિચારવું પણ ન જોઈએ અને આ બાબતે આલિયાએ ધ્યાન આપવું જોઈએ. ચાહકોએ તેમને ૪૦ વધુ ફિલ્મો કરવા વિનંતી કરી હતી અને જણાવ્યું હતું કે તેઓ આ કલાથી દૂર ન જાય.