મુંબઈ : મનોરંજન જગતની લોકપ્રિય અભિનેત્રી હિમાન્શી ખુરાનાએ તેના એક્સ બોયફ્રેન્ડ આસિમ રિયાઝ સાથે ચાલી રહેલા વિવાદ વચ્ચે સોશિયલ મીડિયા પર ફરી એકવાર એક શંકાસ્પદ પોસ્ટ શેર કરીને ખળભળાટ મચાવી દીધો છે. અભિનેત્રીએ આ વખતે મશહૂર ગાયિકા મૈલી સાયરસના એક શબ્દો ટાંકતા લખ્યું કે તેણે ક્યારેય કોઈના વિશે ખરાબ નથી કહ્યું, પરંતુ તેની સાથે જે કંઈ થયું છે તેની જ વાત કરી છે. આ પોસ્ટ સામે આવ્યા બાદ નેટીઝન્સ દ્વારા એવું અનુમાન લગાવવામાં આવી રહ્યું છે કે આ નિશાન ફરી એકવાર આસિમ રિયાઝ તરફ જ છે.

હિમાન્શી ખુરાનાએ પોતાની ઈન્સ્ટાગ્રામ સ્ટોરી પર ફોટો શેર કરતા કેપ્શનમાં લખ્યું કે જ્યારે મૈલી સાયર્સે કહ્યું હતું ત્યારે મને તેના શબ્દો યાદ આવ્યા કે મેં તમારા વિશે ખરાબ નથી કહ્યું, મેં ફક્ત એ વાત કરી છે જે તમે મારી સાથે કર્યું હતું. જો તેનાથી તમારું ચિત્ર ખરાબ દેખાય છે, તો તે ફક્ત તમારા અને તમારા વ્યવહાર વચ્ચેની બાબત છે. આ નોટમાં આગળ એવું પણ લખવામાં આવ્યું હતું કે મારા અનુભવ વિશે સત્ય જણાવવું એ કોઈ કડવાશ નથી, પરંતુ તે માત્ર સ્પષ્ટતા છે. તેમાં એવો પણ ઉલ્લેખ હતો કે હું કોઈની છબી બચાવવા માટે જવાબદાર નથી, જ્યારે સામેવાળાને મારી માનસિક શાંતિ બગાડવામાં કોઈ સમસ્યા નહોતી થઈ. આ સમગ્ર વિવાદની સાથે જ હિમાન્શી ખુરાનાએ બિગ બોસ ફેમ વિશાલ આદિત્ય સિંહની એક લેટેસ્ટ પોસ્ટ પર પણ પોતાની પ્રતિક્રિયા આપી હતી. વિશાલની પોસ્ટ પર કોમેન્ટ કરતા હિમાન્શીએ લખ્યું હતું કે તમને પણ શું જરૂર પડી હતી પોડકાસ્ટમાં જઈને બોલવાની, તેની કોઈ આવશ્યકતા જ નહોતી. જેના જવાબમાં વિશાલે લખ્યું કે ખરાબ તો તમને તે પોડકાસ્ટ પછી લાગવું જોઈતું હતું, પરંતુ અમારી બુઆજી રિસાઈ ગયા. વિશાલે પોતાના પોડકાસ્ટ પછી ઇન્સ્ટાગ્રામ પર એક પોસ્ટ શેર કરી હતી જેમાં લખ્યું હતું કે એક્સ બિગ બોસ કન્ટેસ્ટન્ટ બસ આ જ તમારી ઓળખ છે અને અહીં જ રહી જશો, એટલા માટે આસિમ ભાઈ કૃપા કરીને શાંત રહો અને જય શ્રી રામ બોલો.

આ સમગ્ર વિવાદની શરૂઆત ત્યારે થઈ હતી જ્યારે હિમાન્શી ખુરાનાએ પારસ છાબડાના પોડકાસ્ટમાં પોતાના સંબંધો અને બંને વચ્ચેના ધાર્મિક તફાવતો વિશે ખુલીને ચર્ચા કરી હતી. તેણે જણાવ્યું હતું કે તેઓ ઈચ્છતા હતા કે હું આ વાત સમજી લઉં અને સ્વીકારી લઉં, પરંતુ તે મારા માટે સ્વીકાર્ય નહોતું. હિમાન્શીએ ઉમેર્યું હતું કે મને એવું લાગી રહ્યું હતું જાણે હું મારા ભગવાન સાથે દગો કરી રહી છું. આ નિવેદન બાદ આસિમ રિયાઝે ધર્મ બદલવા માટે કહેવાની વાતને સદંતર નકારી કાઢી હતી અને સોશિયલ મીડિયા પર લખ્યું હતું કે મેં ક્યારેય કોઈને ધર્મ બદલવા માટે કહ્યું નથી અને હિમાન્શીએ ધર્મનો ઉપયોગ હથિયાર તરીકે ન કરવો જોઈએ.