મુંબઈ: સિનેમા જગતના બે દિગ્ગજ કલાકારો ઈરફાન ખાન અને વિદ્યા બાલનને એકસાથે સ્ક્રીન પર જોવાનું સપનું હવે પૂરું થયું છે. વર્ષ ૨૦૦૦માં શૂટ થયેલી અને છેલ્લા ૨૬ વર્ષથી અટવાયેલી ફિલ્મ 'ધ લાસ્ટ ટેનન્ટ' (The Last Tenant) આખરે યુટ્યુબ પર રિલીઝ કરવામાં આવી છે. આ ફિલ્મ એવા સમયે બની હતી જ્યારે ઈરફાન ખાન વૈશ્વિક સ્ટાર બન્યા નહોતા અને વિદ્યા બાલન 'હમ પાંચ' સિરિયલ દ્વારા ઘરે-ઘરે જાણીતી બની રહી હતી.
ખોવાયેલું સપનું ફરી જીવંત થયું
આ ૪૩ મિનિટની ટૂંકી ફિલ્મનું નિર્દેશન સાર્થક દાસગુપ્તાએ કર્યું છે. દાયકાઓ સુધી આ ફિલ્મનું ફૂટેજ ખોવાઈ ગયું હતું, જેના કારણે તે ક્યારેય રિલીઝ થઈ શકી નહોતી. જોકે, તાજેતરમાં જ ડિરેક્ટરને આ ફિલ્મની એક જૂની VHS કોપી મળી આવી હતી. ૨૯ એપ્રિલે ઈરફાન ખાનની છઠ્ઠી પુણ્યતિથિ નિમિત્તે 'ધ સોલ્ટ ઇન્ક' (The Salt Inc) ના યુટ્યુબ પેજ પર તેને શ્રદ્ધાંજલિ રૂપે અપલોડ કરવામાં આવી છે.
વિદ્યા બાલન માટે ભાવુક ક્ષણ
ફિલ્મની રિલીઝ પર ખુશી વ્યક્ત કરતા વિદ્યા બાલને જણાવ્યું કે, "આ જોવું ખૂબ જ અદભૂત છે. તે સમયે હું મારી ઓળખ બનાવવાનો પ્રયાસ કરી રહી હતી. ઈરફાન સાથે કામ કરવું ત્યારે પણ ખાસ હતું અને આજે પણ છે, કારણ કે આ એકમાત્ર ફિલ્મ છે જેમાં અમે સાથે કામ કર્યું છે. આ ફિલ્મ મને મારી શરૂઆતના દિવસોની યાદ અપાવે છે."
બજેટ વગરની જાદુઈ ફિલ્મ
ડિરેક્ટર સાર્થક દાસગુપ્તાએ જણાવ્યું કે, વર્ષ ૨૦૦૦માં કોઈ બજેટ કે ગેરંટી વગર માત્ર એક વિઝન સાથે આ ફિલ્મ બનાવવામાં આવી હતી. તે સમયે કોઈને ખબર નહોતી કે આ બે કલાકારો ભવિષ્યમાં ભારતીય સિનેમાના પાયાના પથ્થર બનશે. ઈરફાન ખાનનું વર્ષ ૨૦૨૦માં કેન્સર સામેની જંગ બાદ નિધન થયું હતું, ત્યારે આ અપ્રકાશિત ફિલ્મ તેમના ચાહકો માટે કોઈ મોટી ભેટથી ઓછી નથી.
આ ફિલ્મ હવે ઇન્ટરનેટ પર ઉપલબ્ધ છે, જે સિનેમા પ્રેમીઓને ૨૦૦૦ના દાયકાની સાદગી અને ઈરફાન-વિદ્યાની પ્રારંભિક કલાનો અનુભવ કરાવી રહી છે.