મુંબઈ, જૂન 2026 : બરફથી ઢંકાયેલા સુંદર પહાડોની વચ્ચે શૂટિંગ કરવું સ્ક્રીન પર ભલે અત્યંત આહલાદક અને જાદુઈ લાગતું હોય પરંતુ કલાકારો માટે આ પ્રકારનું શૂટિંગ ઘણીવાર મોટા પડકારો લઈને આવે છે. સ્ટાર પ્લસ ચેનલના લોકપ્રિય શો મિસ્ટર એન્ડ મિસિસ પરશુરામ ના મુખ્ય કલાકારો નીલ ભટ્ટ અને શામ્ભવી સિંહ માટે મનાલીનું તાજેતરનું શિડ્યુલ આવો જ એક અનોખો અનુભવ સાબિત થયું હતું. આ શૂટિંગ દરમિયાન કલાકારોને અસલી બોલિવૂડ રોમાન્સની ફીલિંગ આવી ગઈ હતી.
પરશુરામ સીરિયલની ટીમ તાજેતરમાં જ એક હાઈ વોલ્ટેજ સિક્વન્સના શૂટિંગ માટે મનાલી ગઈ હતી. આ શિડ્યુલમાં દર્શકોને એક મોટો કિડનેપિંગ ટ્રેક જોવા મળવાનો છે. જાણીતી કલ્ટ ફિલ્મ રોજા થી પ્રેરિત આગામી એપિસોડ્સમાં પરશુરામનું અપહરણ થતું જોવા મળશે. આ ઘટના દર્શકોને એ વિચારવા મજબૂર કરી દેશે કે તે હવે કેવી રીતે પાછો ફરશે અને તેને બચાવવા માટે કોણ આગળ આવશે. આ એક્શનથી ભરપૂર અને રોમાંચક સ્ટોરીલાઇનની વચ્ચે મનાલીના સુંદર લોકેશન પર કેટલાક અદભુત રોમેન્ટિક દૃશ્યો પણ શૂટ કરવામાં આવ્યા હતા.
મનાલી શિડ્યુલ અંગે પોતાનો યાદગાર અનુભવ શેર કરતા અભિનેત્રી શામ્ભવી સિંહે જણાવ્યું હતું કે મનાલી શિડ્યુલની મારી સૌથી મનપસંદ પળોમાંની એક બરફથી આચ્છાદિત પહાડોની વચ્ચે શિફોન સાડી પહેરીને રોમેન્ટિક સિક્વન્સનું શૂટિંગ કરવાની હતી. મને એવું લાગી રહ્યું હતું કે જાણે હું ક્લાસિક બોલિવૂડ લવ સ્ટોરીઝનું કોઈ સુંદર દૃશ્ય જ જીવી રહી છું જે આપણે બધા નાનપણથી ટીવી અને ફિલ્મોમાં જોતા મોટા થયા છીએ. સ્ક્રીન પર ભલે આ દૃશ્ય ખૂબ જ જાદુઈ દેખાતું હોય પરંતુ થીજી જવાય તેવી કડકતી ઠંડીમાં સાડી પહેરીને શૂટિંગ કરવું ચોક્કસપણે એક મોટો પડકાર હતો.
અભિનેત્રી શામ્ભવી સિંહે વધુમાં ઉમેર્યું હતું કે બરફવર્ષા જોવાનો મારો આ જિંદગીનો પહેલો અનુભવ હતો અને તે ખૂબ જ અદભુત રહ્યો હતો. વાસ્તવમાં અમારા શૂટિંગ ક્રૂના પણ ઘણા સભ્યો પહેલીવાર બરફ જોઈ રહ્યા હતા તેથી સેટ પર ભારે ઉત્સાહ અને આનંદનો માહોલ જોવા મળ્યો હતો. ત્યાં ઠંડી એટલી બધી તીવ્ર હતી કે હું બીમાર પણ પડી ગઈ હતી કારણ કે આપણને સામાન્ય રીતે મુંબઈના ગરમ હવામાનની આદત હોય છે. પરંતુ આ લોકેશનની સુંદરતા અને ત્યાં શૂટિંગ કરવાના રોમાંચે આ બધી જ તકલીફોને સાર્થક કરી દીધી હતી.
આ શૂટિંગ વિશે મુખ્ય અભિનેતા નીલ ભટ્ટે પણ પોતાનો રોમાંચક અનુભવ શેર કર્યો હતો. નીલ ભટ્ટે જણાવ્યું હતું કે મનાલી શિડ્યુલની સૌથી યાદગાર પળોમાંની એક બરફથી ઢંકાયેલા પથરાળ વિસ્તાર પર એક્શન સિક્વન્સ શૂટ કરવાની હતી. ત્યાં પથ્થરો ખૂબ જ લપસણા બની ગયા હતા જેને કારણે દોડતી વખતે તથા ફાઈટિંગના એક્શન સીન કરતી વખતે કેટલીકવાર હું મારું શારીરિક સંતુલન ગુમાવવાની અણી પર આવી જતો હતો. આ ભૌગોલિક પરિસ્થિતિને લીધે સિક્વન્સ ચોક્કસપણે વધુ પડકારજનક બની ગઈ હતી પરંતુ તેની સાથે જ કામ કરવાની વધુ રોમાંચક મજા પણ આવી હતી.
અભિનેતા નીલ ભટ્ટે પ્રવાસ વિશે વાત કરતા આગળ કહ્યું હતું કે શૂટિંગના વ્યસ્ત શિડ્યુલ ઉપરાંત અમે આસપાસના નજીકના જોવાલાયક સ્થળોની મુલાકાત લીધી હતી. અમે સિસુના સુંદર ધોધ જોયા, રોહતાંગ પાસની રોમાંચક મુસાફરી કરી અને ત્યાંના સ્થાનિક પ્રખ્યાત સ્ટ્રીટ ફૂડની પણ ભરપૂર મજા માણી હતી. આ પ્રવાસમાં અમને એવું લાગતું હતું કે અમે કોઈ કામ અર્થે શૂટિંગ કરવા નથી આવ્યા પણ સમગ્ર પરશુરામ પરિવાર સાથે એક સુંદર વેકેશન મનાવવા આવ્યા હોઈએ.
દર્શકો આ રસપ્રદ અને એક્શનથી ભરપૂર એપિસોડ્સ મિસ્ટર એન્ડ મિસિસ પરશુરામ શોમાં દરરોજ સાંજે 7 વાગ્યે સ્ટાર પ્લસ પર જોઈ શકશે. આ ઉપરાંત દર્શકો આ શોના એપિસોડ ગમે ત્યારે જિયોહોટસ્ટાર પર પણ ઓનલાઈન માણી શકશે.