મુંબઈ, તા.૧૮: વિશ્વના સૌથી પ્રતિષ્ઠિત ફિલ્મ એવોર્ડ્સ ગણાતા 'ઓસ્કાર' માં ભારતનું પ્રતિનિધિત્વ કરવા માટે આ વર્ષે એક શાનદાર મરાઠી ફિલ્મની પસંદગી કરવામાં આવી છે. ફિલ્મ ફેડરેશન ઓફ ઈન્ડિયા (FFI) એ શુક્રવાર, ૧૮ સપ્ટેમ્બરે સત્તાવાર રીતે જાહેરાત કરી છે કે, પ્રખ્યાત મરાઠી ફિલ્મ 'ગોંધળ' (Gondhal) ૯૯મા એકેડેમી એવોર્ડ્સ (Oscars 2027) માં 'બેસ્ટ ઈન્ટરનેશનલ ફીચર ફિલ્મ' કેટેગરી માટે ભારતની અધિકૃત (Official Entry) એન્ટ્રી હશે. આ પ્રતિષ્ઠિત એવોર્ડ સમારોહ માર્ચ ૨૦૨૭ માં યોજાનાર છે.

દિગ્દર્શક સંતોષ દવખરના નિર્દેશનમાં બનેલી આ ફિલ્મ નવેમ્બર ૨૦૨૫ માં થિયેટરોમાં રિલીઝ થઈ હતી અને તેણે દર્શકો તથા વિવેચકોના દિલ જીતી લીધા હતા. મહારાષ્ટ્રની સમૃદ્ધ લોકકળા અને સાંસ્કૃતિક પૃષ્ઠભૂમિ પર આધારિત આ ફિલ્મમાં ઈશિતા દેશમુખ, યોગેશ સોહોની, દિગ્ગજ અભિનેતા કિશોર કદમ, સુરેશ વિશ્વકર્મા, નિષાદ ભોઈર, અનુજ પ્રભુ અને વિઠ્ઠલ કાલે જેવા કલાકારોએ પોતાના દમદાર અભિનયથી પ્રાણ પૂર્યા છે.

ભારતભરમાંથી ઓસ્કારની રેસ માટે આવેલી અનેક ભાષાઓની મોટી બજેટ ધરાવતી ફિલ્મોને પછાડીને 'ગોંધળ' એ આ સ્થાન હાંસલ કર્યું છે, જે પ્રાદેશિક સિનેમા માટે પણ ખૂબ ગર્વની વાત છે. ભારતીય સિનેમા જગતમાં આ સમાચાર આવતા જ ઉજવણીનો માહોલ છવાઈ ગયો છે અને ફિલ્મ સમીક્ષકોને આશા છે કે આ ફિલ્મ ઓસ્કારના મંચ પર ભારતને ગૌરવ અપાવશે.