મુંબઈ તા.૨: બોલિવૂડથી હોલિવૂડ સુધી પોતાનું નામ બનાવનાર ગ્લોબલ સ્ટાર પ્રિયંકા ચોપરા પોતાની ફેશન અને સ્ટાઈલ માટે હંમેશા ચર્ચામાં રહે છે. પ્રિયંકા પાસે કરોડોની કિંમતની ડિઝાઇનર બેગ્સનું કલેક્શન છે, પરંતુ તાજેતરમાં તેણે ખુલાસો કર્યો કે તેની બેગમાં સૌથી કિંમતી વસ્તુ હનુમાન ચાલીસા અને નજરથી બચવા માટેનો કાળો દોરો છે.

એક ઈન્ટરવ્યુમાં પ્રિયંકાએ પોતાની બેગની અંદરની વસ્તુઓ બતાવતા જણાવ્યું કે તે ગમે ત્યાં જાય, પોતાની સાથે હનુમાન ચાલીસા અવશ્ય રાખે છે. પ્રિયંકાના મતે હનુમાન ચાલીસા તેને પોઝિટિવ એનર્જી આપે છે અને મુશ્કેલ સમયમાં હિંમત આપે છે. આ સાથે જ તે નજરદોષ અને નકારાત્મક શક્તિઓથી બચવા માટે કાળો દોરો પણ બેગમાં રાખે છે.

પ્રિયંકાએ કહ્યું કે ભલે તે આજે ગ્લોબલ આઈકોન બની ગઈ હોય, પરંતુ તેના સંસ્કાર અને ભારતીય પરંપરાઓ સાથેનું જોડાણ અતૂટ છે. વિદેશમાં રહેતા હોવા છતાં તે પોતાની ધાર્મિક આસ્થાને ક્યારેય ભૂલતી નથી. કરોડોની બેગમાં રાખેલી આ સામાન્ય લાગતી વસ્તુઓ તેના માટે સૌથી વધુ મહત્વ ધરાવે છે કારણ કે તે તેને માનસિક શાંતિ અને સુરક્ષાની અનુભૂતિ કરાવે છે.

પ્રિયંકાનો આ ખુલાસો સોશિયલ મીડિયા પર ખૂબ વાયરલ થઈ રહ્યો છે અને ચાહકો તેના ભારતીય સંસ્કારો અને આસ્થાના વખાણ કરી રહ્યા છે.