મુંબઈ : પોપ્યુલર રિયાલિટી શો 'ધ ટ્રેટર્સ' (The Traitors) સીઝન ૨ પૂર્ણ થઈ ગઈ હોવા છતાં તેની આસપાસનો વિવાદ શમવાનું નામ લેતો નથી. શો દરમિયાન ગુપ્ત માહિતી લીક થવાને લઈને સર્જાયેલા વિવાદમાં હવે પૂર્વ સ્પર્ધક અંશ ચોપરાએ મોટો ખુલાસો કર્યો છે. સોશિયલ મીડિયા ઈન્ફ્લુએન્સર શાહનીલ ગિલે એક વિડિયો શેર કરીને ગંભીર આરોપ લગાવ્યો હતો કે એક્ટ્રેસ પારુલ ગુલાટીએ પ્રોડક્શન ટીમ દ્વારા ફાળવવામાં આવેલા પોતાના "શેડો" (ક્રૂ મેમ્બર) ને લાંચ આપીને દેશદ્રોહીઓની (ટ્રેટર્સ) ઓળખ વિશેની સીક્રેટ માહિતી મેળવી હતી. જોકે, પારુલે આ આરોપોને સખત શબ્દોમાં ફગાવી દીધા છે.

અંશ ચોપરાનો વિશિષ્ટ ખુલાસો:

ધ ફ્રી પ્રેસ જર્નલ (FPJ) સાથેની ખાસ વાતચીતમાં અંશ ચોપરાને પૂછવામાં આવ્યું હતું કે શું શો દરમિયાન ખરેખર આવું કશું બની શકે? અંશે પોતાના અનુભવના આધારે આ દાવાઓ પર આશ્ચર્ય વ્યક્ત કરતાં કહ્યું કે, "મને આ કથિત ઘટના વિશે કોઈ વ્યક્તિગત જાણકારી નથી, પરંતુ શોના કડક નિયમો જોતાં આ વાત પર વિશ્વાસ કરવો મુશ્કેલ છે. અમને બધાને એક-એક 'શેડો' આપવામાં આવ્યો હતો. મારો શેડો ફક્ત મને એટલું જ પૂછતો કે મારે શું ખાવું છે અથવા કયા કપડાં પહેરવા છે. તે મારા કપડાં પ્રેસ કરીને આપતો, બસ આટલું જ."

મહેલમાં કેદ, બારીઓ બંધ અને બહાર બોડીગાર્ડ્સ!

અંશે સેટ પરના કડક વાતાવરણની વિગતો આપતાં જણાવ્યું હતું કે, શો દરમિયાન પ્રોડક્શન ટીમ કે બહારની દુનિયા સાથે સંપર્ક કરવો અશક્ય હતો. "અમને મોબાઈલ વાપરવાની છૂટ નહોતી. પ્રોડક્શનના લોકોને જો આપણે કંઈ પૂછીએ તો પણ તેઓ દિવાલની જેમ ચુપચાપ ઊભા રહેતા અને કોઈ જવાબ આપતા નહીં. અમને એક વિશાળ મહેલમાં રાખવામાં આવ્યા હતા જ્યાં દરેક સ્પર્ધકનો રૂમ અલગ-અલગ ફ્લોર પર હતો. રૂમની બારીઓ સંપૂર્ણપણે ઢંકાયેલી હતી જેથી સમયની પણ ખબર ન પડે. રૂમમાં ટેલિવિઝન નહોતું અને દરવાજા બહાર ચોકીદારી માટે બોડીગાર્ડ્સ તૈનાત હતા."

માહિતી લીક થવાની શક્યતા નહિવત:

અંશ ચોપરાએ ઉમેર્યું કે રિયાલિટી શોનું વાતાવરણ એવું બનાવવામાં આવ્યું હતું કે સ્પર્ધક રમતની બહાર જઈ જ ન શકે. જોકે, તેણે પારુલ ગુલાટી પરના આરોપોને સીધા નકાર્યા નથી, પણ તેણે ચોક્કસપણે કહ્યું કે પ્રોડક્શન દ્વારા લાદવામાં આવેલા આટલા સખત પ્રતિબંધો અને સીમિત સંપર્કને કારણે કોઈ માહિતી કે સિક્રેટ લીક થવાની શક્યતા નહિવત લાગે છે.