મુંબઈ, તા.૧૧: ભારતીય મનોરંજન જગતમાં માતાના પ્રેમ અને સંતાનો માટેના બલિદાન પર અસંખ્ય ફિલ્મો બની છે, પરંતુ જ્યારે વાત વિરૂદ્ધ માર્ગે જઈને બદલો લેવાની આવે ત્યારે દર્શકોના રુંવાડા ઊભા થઈ જતા હોય છે. નેટફ્લિક્સ પર રિલીઝ થયેલી પ્રખ્યાત વેબસીરિઝ ‘માઇ’ (Mai) કંઈક આવી જ એક અલગ અને ઉત્તેજક કહાની લઈને આવી છે, જેમાં મા-દીકરીના સંબંધોની સાથે સાથે એક ઘૂંટાતું રહસ્ય અને ગેંગસ્ટરો સાથેની ટક્કર જોવા મળે છે. સામાન્ય રીતે ફિલ્મોમાં માતા-પિતા પોતાના સંતાનો માટે ધીંગાણે ચડતા હોય છે, પરંતુ ‘માઇ’ માં જે રીતે સસ્પેન્સ અને બદલાની આગ જોવા મળે છે તેણે ઓટીટી પ્લેટફોર્મ પર ધમાકો મચાવી દીધો છે.

આ કહાની છે સેનેટોરિયમમાં દર્દીઓની સેવા કરતી શીલ ચૌધરી (સાક્ષી તન્વર)ની, જેણે પોતાના પતિની ઇચ્છાથી પુત્રને દત્તક આપી દીધો છે અને તેની યુવાન દીકરી સુપ્રિયા (વામિકા ગાબ્બી) બે વર્ષની વયે અકસ્માતમાં વોકલ કોર્ડ ડેમેજ થઈ જવાને કારણે બોલી શકતી નથી. તે માત્ર સાઇન લેંગ્વેજમાં જ વાત કરી શકે છે. એક દિવસ દીકરીના ચિડિયા સ્વભાવને કારણે ઘરમાં થયેલી નાની તકરાર બાદ સુપ્રિયા ઘરની બહાર નીકળી જાય છે અને માતા તેને રોકવા દોડે છે, તે જ ક્ષણે એક ટેમ્પો ટ્રક તેને અફેટે ચઢાવીને મોતને ઘાટ ઉતારી દે છે. આ માત્ર એક સામાન્ય અકસ્માત નહોતો, પરંતુ તે એક સોચીસમજી હત્યા હતી—આ વાતનો અણસારો માતા શીલને આવી જાય છે અને ત્યાંથી શરૂ થાય છે એક અસલી જંગ.

બીજા જ એપિસોડથી આ સોશિયલ થ્રિલર અથવા મર્ડર મિસ્ટ્રી ધીમે-ધીમે ‘મા વિરુદ્ધ ગેંગસ્ટર’ના રૂપમાં બદલાઈ જાય છે. અતુલ મોંગિયા, સૃષ્ટિ રિંડાણી, તમાલ સેન, વિશ્રૃત સિંઘ અને અમિતા વ્યાસ જેવા પાંચ લેખકોની જોડીએ આ પટકથાને એટલી રોમાંચક બનાવી છે કે દર્શકો અંત સુધી જકાયેલા રહે છે. એક ડૉક્ટરનું ભણેલી માતા કોઈ એક્શન હીરોની જેમ લાત-મુક્કા કે પિસ્તોલથી બદલો નથી લેતી, પરંતુ પોતાની બુદ્ધિ અને મક્કમતાથી આગળ વધે છે, જે દર્શકોને ખૂબ વાસ્તવિક લાગે છે. સાક્ષી તન્વરે શીલ ચૌધરીના પાત્રમાં પ્રાણ ફૂંકી દીધા છે અને તેમનો અભિનય આખી સીરિઝનો સૌથી મોટો સ્રોત છે.

અતુલ મોંગિયા અને અંશાઇ લાલ દ્વારા નિર્દેશિત આ સીરિઝમાં લાંબા અંતરાલ બાદ અભિનેતા વિવેક મુશરન એક સાધારણ પતિ તરીકે જોવા મળ્યા છે, જ્યારે વામિકા ગાબ્બી અને રાયમા સેને પણ પોતાના પાત્રોને ન્યાય આપ્યો છે. ઓવરઓલ, સાક્ષી તન્વરના નૈસર્ગિક અભિનય માટે અને એક હટકે રિવેન્જ થ્રિલરની ભૂખ સંતોષવા માટે ‘માઇ’ ચોક્કસપણે જોવા જેવી વેબસીરિઝ સાબિત થાય છે, જેના અંતે મેકર્સે બીજી સિઝનની મજબૂત બારી પણ ખુલ્લી રાખી છે.