નવી દિલ્હી : બોલિવૂડની જાણીતી અભિનેત્રી અને ભારતીય જનતા પાર્ટીના સાંસદ કંગના રાણાવત હંમેશા પોતાના બેબાક અંદાજ અને સોશિયલ મીડિયા પોસ્ટને કારણે ચર્ચામાં રહે છે. હાલમાં તેમનો એક નવો વીડિયો ઇન્ટરનેટ પર ભારે વાયરલ થઈ રહ્યો છે, જેમાં તે જન્માષ્ટમીના પાવન અવસર પર મનાલી સ્થિત પોતાના આવાસ પર વિશેષ ભોગ તૈયાર કરતી નજરે પડી રહી છે. આ વીડિયો સામે આવતા જ સોશિયલ મીડિયા યુઝર્સ તરફથી વિવિધ પ્રતિક્રિયાઓ આવવા લાગી અને એક યુઝરે તેમની રસોઈ બનાવવાની રીત પર સવાલો ખડા કરી દીધા.

વાયરલ થઈ રહેલા વીડિયોમાં સ્પષ્ટ જોઈ શકાય છે કે કંગના તહેવારના અવસર પર સંપૂર્ણ શ્રદ્ધા સાથે ભોગ બનાવી રહી છે. જોકે, એક સોશિયલ મીડિયા યુઝરે આ વીડિયો જોયા પછી તેમની કન્કિંગ સ્કિલ્સ પર કટાક્ષ કરતા દાવો કર્યો કે અભિનેત્રીએ ખાવાનું બનાવતી વખતે ગેસ ચૂલો જ ચાલુ કર્યો ન હતો. તે યુઝરનું એમ પણ કહેવું હતું કે જે વાસણમાં તે વાનગી બનાવી રહી હતી, તે પહેલાથી જ કાળું હતું અને કંગના ગેસ ચાલુ કરવાનું ભૂલી ગઈ હતી.

યુઝર દ્વારા ઉઠાવવામાં આવેલા આ સવાલો અને ટ્રોલિંગ પર અભિનેત્રી કંગના રાણાવતે ચૂપ રહેવાનું યોગ્ય ન સમજ્યું અને ખૂબ જ જડબાતોડ જવાબ આપ્યો. કંગનાએ સ્પષ્ટતા કરતા જણાવ્યું કે તે કોઈ સાદો હલવો નહીં પરંતુ ભોગ તૈયાર કરી રહી હતી. તેમણે સમજાવ્યું કે આ વાનગી બનાવવાની અલગ પ્રક્રિયા હોય છે, જેમાં ઘણી ચીજો અલગ-અલગ તૈયાર કરવામાં આવે છે અને અંતમાં બધાને એકસાથે મિક્સ કરવામાં આવે છે.

કંગનાએ ટ્રોલર પર તીખો કટાક્ષ કરતા આગળ લખ્યું કે જે લોકોને રસોઈ બનાવવાની કોઈ જ જાણકારી નથી હોતી, તેમણે બીજાની રસોઈ કૌશલ્ય પર સવાલ ઉઠાવવા જોઈએ નહીં. તેમણે યુઝરને સલાહ આપતા કહ્યું કે તે ફક્ત ખાવા પર ધ્યાન આપે અને રસોઈ બનાવવાની ચિંતા ન કરે. કંગના રાણાવતનો આ સ્પષ્ટ અને બેબાક જવાબ હાલ સોશિયલ મીડિયા પર ચર્ચાનો વિષય બન્યો છે.