નવી દિલ્હી: 'બાહુબલી' અને 'RRR' જેવી વૈશ્વિક સુપરહિટ ફિલ્મો આપ્યા બાદ હવે દિગ્ગજ ફિલ્મ સર્જક એસ.એસ. રાજામૌલી પોતાની આગામી મેગ્નમ ઓપસ (Magnun Opus) ફિલ્મ 'વારાણસી' સાથે ફરી એકવાર વિશ્વ સિનેમા પર કબ્જો કરવા તૈયાર છે. આ ફિલ્મની ભવ્યતાની ઝલક હવે આંતરરાષ્ટ્રીય મંચ પર જોવા મળશે. 'વારાણસી' આગામી 24 એપ્રિલના રોજ મેક્સિકોમાં યોજાનારા પ્રતિષ્ઠિત 'કોમિક કોન એક્સપિરિયન્સ 2026' (CCXP) માં રજૂ કરવામાં આવશે, જે ભારતીય સિનેમા માટે ગૌરવની ક્ષણ છે.

આ ભવ્ય ઈવેન્ટમાં ફિલ્મના નિર્માતા એસ.એસ. કાર્તિકેય "વારાણસી ટુ ધ વર્લ્ડ" સેગમેન્ટ રજૂ કરશે. જેમાં ફિલ્મ નિર્માતા એસ.એસ. રાજામૌલીનો એક વિશેષ વીડિયો સંદેશ અને શૂટિંગ દરમિયાનના પડદા પાછળના (BTS) એવા ફૂટેજ બતાવવામાં આવશે જે અગાઉ ક્યારેય જાહેર થયા નથી. આ સત્રમાં ચાહકોને લાઈવ ઈન્ટરેક્શનની તક પણ મળશે, જે ફિલ્મને લઈને વધી રહેલા રોમાંચમાં વધારો કરશે. અત્રે ઉલ્લેખનીય છે કે આ અગાઉ યુરોપના લે ગ્રાન્ડ રેક્સ ખાતે જ્યારે આ ફિલ્મની પહેલી ઝલક બતાવાઈ હતી, ત્યારે વિદેશી પ્રેક્ષકોએ તેને તાળીઓ અને સીટીઓથી વધાવી લીધી હતી.

સ્ટારકાસ્ટની વાત કરીએ તો, સુપરસ્ટાર મહેશ બાબુનો 'રુદ્ર' તરીકેનો શક્તિશાળી લૂક, જેમાં તે હાથમાં ત્રિશુલ લઈને બળદ પર સવાર જોવા મળે છે, તેણે સોશિયલ મીડિયા પર હંગામો મચાવ્યો છે. તેની સાથે પ્રિયંકા ચોપરા જોનાસ 'મંદાકિની' ના દમદાર પાત્રમાં અને પૃથ્વીરાજ સુકુમારન 'કુંભ' તરીકે જોવા મળશે. આ ફિલ્મ 7 એપ્રિલ, 2027 ના રોજ સિનેમાઘરોમાં રિલીઝ થવાની તૈયારીમાં છે. રાજામૌલીની આ ફિલ્મ માત્ર ભારત જ નહીં પરંતુ સમગ્ર વિશ્વમાં ફરી એકવાર ઈતિહાસ રચશે તેવી અપેક્ષા સેવાઈ રહી છે.

'વારાણસી' ફિલ્મની મુખ્ય આકર્ષણો:

• સ્ટાર પાવર: મહેશ બાબુ, પ્રિયંકા ચોપરા અને પૃથ્વીરાજ સુકુમારનની ત્રિપુટી પ્રથમવાર સાથે.
• ગ્લોબલ શોકેસ: મેક્સિકો કોમિક કોન 2026 માં ખાસ પેનલ અને પ્રેઝન્ટેશન.
• આધ્યાત્મિક ટચ: ભગવાન શિવ અને વારાણસીના પૌરાણિક સંદર્ભો સાથેની આધુનિક સિનેમેટિક સફર.
• રિલીઝ ડેટ: 7 એપ્રિલ, 2027 ના રોજ ભવ્ય રજૂઆત.

સિનેમા અપડેટ:

રાજામૌલીની ફિલ્મો માત્ર ફિલ્મો નથી હોતી, પરંતુ તે એક અનુભવ હોય છે. 'વારાણસી' માં વપરાયેલી ટેકનોલોજી અને વિઝ્યુઅલ ઈફેક્ટ્સ અત્યાર સુધીના ભારતીય સિનેમાના તમામ રેકોર્ડ તોડી શકે છે.