નવી દિલ્હી ખાતે આગામી ૧૬ થી ૨૦ ફેબ્રુઆરી, ૨૦૨૬ દરમિયાન આયોજિત થનારી પ્રતિષ્ઠિત 'એઆઈ સમિટ' (AI Summit) માટે ભારત સરકાર દ્વારા વિશ્વના વિવિધ દેશોના વડાઓને ખાસ આમંત્રણ પાઠવવામાં આવ્યું છે. આ આંતરરાષ્ટ્રીય સંમેલનમાં સહભાગી થવા માટે ભારતે કુલ ૯ વડાપ્રધાનો, ૭ રાષ્ટ્રપતિઓ અને ૨ ઉપરાષ્ટ્રપતિઓને નિમંત્રણ આપ્યું છે. આમંત્રિત વડાપ્રધાનોની યાદીમાં આર્મેનિયા, ભૂટાન, ક્રોએશિયા, ફિનલેન્ડ, સ્પેન, ગ્રીસ, નેધરલેન્ડ, કઝાકિસ્તાન અને મોરેશિયસના વડાપ્રધાનોનો સમાવેશ થાય છે. જ્યારે રાષ્ટ્રપતિઓની યાદીમાં બ્રાઝિલ, એસ્ટોનિયા, સ્લોવાકિયા, શ્રીલંકા, ફ્રાન્સ, સર્બિયા અને સ્વિટ્ઝર્લેન્ડના રાષ્ટ્રપ્રમુખોને આમંત્રિત કરવામાં આવ્યા છે. આ ઉપરાંત, ગયાના અને સેશેલ્સના ઉપરાષ્ટ્રપતિઓને પણ આ સમિટમાં જોડાવા માટે ભારત તરફથી આમંત્રણ મળ્યું છે. (ન્યૂઝફર્સ્ટ)