ગાંધીનગર : ગુજરાતભરમાં ઉત્સાહ અને ઉમંગ સાથે ઉજવાયેલા દિવાળી, નવું વર્ષ અને ભાઈબીજના તહેવારો દરમિયાન નાગરિકોની સ્વાસ્થ્ય અને સુરક્ષા માટે ૧૦૮ ઇમરજન્સી મેડિકલ સર્વિસિસની ટીમ સતત ખડેપગે રહી હતી, જેમાં સામાન્ય દિવસોની સરખામણીએ ઇમરજન્સી કોલ્સની સંખ્યામાં મોટો ઉછાળો જોવા મળ્યો હતો.

પ્રાપ્ત વિગતો અનુસાર, સામાન્ય દિવસોમાં રોજના સરેરાશ ૫,૨૪૮ ઇમરજન્સી કોલ નોંધાતા હોય છે, પરંતુ દિવાળીના દિવસે આ આંકડો વધીને ૫,૯૩૪ થયો હતો, જ્યારે નવા વર્ષના દિવસે સૌથી વધુ ૬,૫૯૫ અને ભાઈબીજના દિવસે ૫,૯૮૪ ઇમરજન્સી કેસો હેન્ડલ કરવામાં આવ્યા હતા.

તહેવારો દરમિયાન વધેલી વાહનોની અવરજવર અને બેફામ ડ્રાઇવિંગને કારણે માર્ગ અકસ્માતો અને ટ્રોમાના કેસોમાં ચિંતાજનક ઉછાળો નોંધાયો હતો, જેમાં એકલા નવા વર્ષના દિવસે વાહન અકસ્માતના ૧,૫૪૧ જેટલા ગંભીર કેસો સામે આવ્યા હતા જેમાંથી મોટાભાગના ટુ-વ્હીલર સાથે સંકળાયેલા હતા.

અકસ્માતો ઉપરાંત ઉત્સાહ અતિશય વધી જવાના કારણે શારીરિક હુમલા અને મારામારીની ઘટનાઓમાં પણ ૧૪૯ ટકા સુધીનો ભયજનક વધારો જોવા મળ્યો હતો, જ્યારે ફટાકડા ફોડવાની બેદરકારીને કારણે દિવાળીના દિવસે દાઝી જવાના ૬૨ જેટલા કિસ્સાઓ પણ નોંધાયા હતા.

જિલ્લાવાર વિશ્લેષણ મુજબ મહાનગરોમાં સુરત, રાજકોટ, વડોદરા અને અમદાવાદમાં ઇમરજન્સી કોલ્સનું પ્રમાણ સૌથી વધુ રહ્યું હતું, જ્યારે ગ્રામ્ય વિસ્તારોમાં પણ ભરૂચ, ભાવનગર, સુરેન્દ્રનગર અને દાહોદ જેવા જિલ્લાઓમાં તહેવારો દરમિયાન મોટો સ્પાઇક જોવા મળ્યો હતો.

આ સમગ્ર પર્વ દરમિયાન ૧૦૮ ના ફિલ્ડ સુપરવાઇઝર્સ, ઇમરજન્સી રિસ્પોન્સ ઓફિસર્સ અને સપોર્ટ સ્ટાફ દ્વારા ઉત્તમ ટીમવર્ક અને સચોટ સંકલન દાખવીને રાજ્યના નાગરિકોને અવિરત અને ઝડપી તબીબી સહાય પૂરી પાડવામાં આવી હતી, જેણે અનેકના અમૂલ્ય જીવ બચાવવામાં મોટી ભૂમિકા ભજવી છે.