સુરત  તા.૧૭: સુરત શહેરમાં લોકોના આરોગ્‍ય સાથે ચેડાં કરતા નકલી તબીબો સામે સુરત પોલીસની સ્‍પેશિયલ ઓપરેશન ગ્રૂપ (SOG) અને સુરત મહાનગરપાલિકાના આરોગ્‍ય વિભાગે સંયુક્‍ત રીતે લાલ આંખ કરી છે. પાંડેસરા (Pandesara) ઔદ્યોગિક અને રહેણાંક વિસ્‍તારમાં કોઈપણ માન્‍ય મેડિકલ ડિગ્રી વિના ગેરકાયદે પ્રેક્‍ટિસ કરી રહેલા ૮ બોગસ તબીબોને ઝડપી પાડવામાં આવ્‍યા છે. વહીવટી તંત્ર અને પોલીસની આ સંયુક્‍ત કાર્યવાહીથી સમગ્ર પંથકના ઝોલાછાપ તબીબોમાં ભારે ફફડાટ વ્‍યાપી ગયો છે.

મળતી ચોક્કસ માહિતીના આધારે સુરત SOG તેમજ આરોગ્‍ય વિભાગના અધિકારીઓની ૩ અલગ-અલગ ટીમો તૈયાર કરવામાં આવી હતી. આ ટીમોએ પાંડેસરા વિસ્‍તારમાં એકસાથે ૮ શંકાસ્‍પદ ક્‍લિનિકો પર ઓચિતા દરોડા પાડ્‍યા હતા. તપાસ દરમિયાન કોઈ પણ પ્રકારની અધિકૃત ડિગ્રી કે રજીસ્‍ટ્રેશન વિના આ શખ્‍સો ગેરકાયદે ક્‍લિનિક ખોલીને નિર્દોષ દર્દીઓને એલોપેથિક દવાઓ, ઇન્‍જેક્‍શન (Injections) અને ગ્‍લુકોઝની બોટલ ચડાવી ગંભીર રીતે તેમના જીવન સાથે ખિલવાડ કરતા રંગેહાથ ઝડપાયા હતા. દરોડા દરમિયાન દવાઓ અને સાધનો સહિત કુલ ૯૮,૦૦૦ રૂપિયાનો મુદ્દામાલ જપ્ત કરાયો છે.

તપાસમાં સામે આવેલી વિગતો અત્‍યંત ચોંકાવનારી છે. ઝડપાયેલા આ તમામ નકલી તબીબો માત્ર ધોરણ ૧૨ પાસ હતા અથવા તો ભૂતકાળમાં કોઈ હોસ્‍પિટલમાં કમ્‍પાઉન્‍ડર તરીકે સામાન્‍ય કામગીરી કરી ચૂક્‍યા હતા. તબીબી જ્ઞાનનો સદંતર અભાવ હોવા છતાં આ શખ્‍સો છેલ્‍લા ૨ થી ૧૦ વર્ષથી પાંડેસરા જેવા ગીચ અને શ્રમિક વિસ્‍તારમાં ભાડે દુકાનો રાખી ગેરકાયદે પ્રેક્‍ટિસ કરી રહ્યા હતા.

આ કાર્યવાહી દરમિયાન વધુ એક હૃદયદ્રાવક હકીકત સામે આવી છે. ઝડપાયેલા આરોપીઓ પૈકીના ૧ બોગસ તબીબ સામે અગાઉ ૧૪ વર્ષના નિર્દોષ કિશોરના મોતમાં બેદરકારી દાખવવાનો ગંભીર આરોપ છે. કિશોરના પરિવારે આક્ષેપ કર્યો હતો કે યોગ્‍ય તપાસ કર્યા વગર ખોટા ઇન્‍જેક્‍શન અને હાઇ-ડોઝ દવાઓ આપવાના કારણે બાળકની તબિયત લથડી હતી અને તેનું કરુણ મોત નીપજ્‍યું હતું.

આરોગ્‍ય વિભાગની સત્તાવાર ફરિયાદના આધારે પાંડેસરા પોલીસ સ્‍ટેશનમાં પકડાયેલા તમામ ૮ આરોપીઓ સામે મેડિકલ પ્રેક્‍ટિશનર એક્‍ટ તથા ભારતીય કાયદાની સુસંગત કલમો હેઠળ ગુનો નોંધી તેમની ધરપકડ કરવામાં આવી છે. પોલીસ હવે આ દિશામાં વધુ તપાસ ચલાવી રહી છે કે આ શખ્‍સોને ગેરકાયદે એલોપેથિક દવાઓનો જથ્‍થો કોણ પૂરો પાડતું હતું