તલગાજરડા, તા. ૭ જુલાઈ, ૨૦૨૬ : દેશના વિવિધ ભાગોમાં હાલ ચોમાસું સંપૂર્ણપણે સક્રિય બન્યું છે અને અનેક રાજ્યોમાં ભારેથી અતિભારે વરસાદ વરસી રહ્યો છે. મહારાષ્ટ્રમાં પણ છેલ્લા કેટલાક દિવસોથી અવિરત પડી રહેલા મુશળધાર વરસાદને કારણે જનજીવન પ્રભાવિત થયું છે અને કેટલીક જગ્યાએ ગંભીર દુર્ઘટનાઓ પણ સામે આવી છે. પ્રાપ્ત વિગતો અનુસાર, મુંબઈ નજીક આવેલા માનખુરદ વિસ્તારની એક ઝૂંપડપટ્ટીમાં ભારે વરસાદના કારણે એક મકાન અચાનક ધરાશાયી થઈ ગયું હતું. આ કાળમુખી દુર્ઘટનામાં ૬ નિર્દોષ લોકોના દબાઈ જવાથી કરુણ મોત નિપજ્યા હતા. આ ઉપરાંત, મહારાષ્ટ્રના અન્ય જુદા જુદા વિસ્તારોમાં વરસાદી આફતને કારણે અન્ય ૭ લોકોએ પણ પોતાના જીવ ગુમાવ્યા છે, આમ સમગ્ર રાજ્યમાં વરસાદને લગતી ઘટનાઓમાં કુલ ૧૩ લોકો નિર્વાણ પામ્યા છે.

  પૂ. મોરારિબાપુ દ્વારા હનુમાનજીના ચરણોમાં પ્રાર્થના અને સહાયની જાહેરાત:

મહારાષ્ટ્રમાં સર્જાયેલી આ કાળજું કંપાવનારી ઘટના અંગે ઊંડા દુઃખની લાગણી વ્યક્ત કરતા અગ્રણી રામકથાકાર પૂ. મોરારિબાપુએ તમામ દિવંગત આત્માઓ પ્રત્યે ભાવપૂર્ણ શ્રદ્ધાંજલિ વ્યક્ત કરી છે. પૂ. બાપુએ આ અણધારી આફતમાં જીવ ગુમાવનારા તમામ દિવંગત લોકોના મોક્ષ માટે હનુમાનજીના ચરણોમાં વિશેષ પ્રાર્થના કરી હતી અને શોકગ્રસ્ત પરિવારો પ્રત્યે સંવેદના પ્રગટ કરી છે.

પૂજ્ય બાપુએ માનવતાવાદી અભિગમ અપનાવીને આ અકસ્માતનો ભોગ બનેલા તમામ ૧૩ મૃતકોના આશ્રિત પરિવારોને ત્વરિત મદદ મળી રહે તે હેતુથી આર્થિક સહાયની જાહેરાત કરી છે. પૂ. મોરારિબાપુ દ્વારા પ્રત્યેક મૃતકના પરિવારજનને રૂપિયા ૧૫-૧૫ હજાર લેખે કુલ મળીને રૂપિયા ૧,૯૫,૦૦૦ ની સહાય રાશિ અર્પણ કરવામાં આવી છે. આ સહાયની રકમ રામકથાના મુંબઈ સ્થિત સ્થાનિક શ્રોતાઓ અને સેવાભાવી અગ્રણીઓ દ્વારા પ્રભાવિત પરિવારો સુધી રૂબરૂ જઈને અત્યંત આદરપૂર્વક પહોંચાડવામાં આવશે, તેમ જયદેવ માંકડની સત્તાવાર યાદીમાં જણાવવામાં આવ્યું છે. (અહેવાલ - મુકેશ પંડિત)