તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
૧૬ વર્ષીય સગીરાના ગર્ભપાતની અરજી ગુજરાત હાઈકોર્ટે કરી મંજૂર
સગીરાના ગર્ભપાત માટે તાત્કાલિક પ્રક્રિયા શરૂ થશે
અમદાવાદ તા.૨૯: ગુજરાત હાઈકોર્ટ દ્વારા એક અત્યંત સંવેદનશીલ અને મહત્વપૂર્ણ કેસમાં ૧૬ વર્ષ અને ૭ મહિનાની સગીરાના ગર્ભપાતની અરજીને મંજૂરી આપવામાં આવી છે. દુષ્કર્મનો ભોગ બનેલી આ પીડિતાના ૨૨ અઠવાડિયાના ગર્ભને દૂર કરવાની મંજૂરી માંગતી અરજી પર સુનાવણી હાથ ધરીને હાઈકોર્ટે માનવીય અભિગમ દાખવ્યો છે.
આ અગાઉ પણ કોર્ટ દ્વારા અસંખ્ય મામલાઓમાં પીડિત સગીરાઓને ન્યાય આપવા માટે સરાહનીય પગલાં ભરવામાં આવ્યા છે, જેના ભાગરૂપે હાઈકોર્ટે છેલ્લા ૪૯ દિવસની અંદર ગર્ભપાતની મંજૂરી આપતો આ આઠમો આદેશ જારી કર્યો છે.
આ કેસની વિગતો મુજબ વાત કરીએ તો હાઈકોર્ટે જૂનાગઢ સ્થિત જીએમઈઆરએસ (GMERS) મેડિકલ કોલેજ એન્ડ હોસ્પિટલના તબીબોને આદેશ આપ્યો છે કે તેઓ સગીરાની તાત્કાલિક ધોરણે તબીબી તપાસ કરે.
કોર્ટના નિર્દેશ અનુસાર, જો મેડિકલ રિપોર્ટ પોઝિટિવ આવે અને સગીરાની શારીરિક સ્થિતિને ધ્યાનમાં રાખીને સર્જરી તુરંત જ થઈ શકે તેમ હોય, તો હોસ્પિટલ દ્વારા કોઈ પણ વિલંબ વગર તાત્કાલિક પ્રક્રિયા હાથ ધરવામાં આવશે. પીડિતાની નાની વય અને તેની ઉપર વીતેલી આપવીતીને ધ્યાનમાં રાખીને ન્યાયતંત્ર દ્વારા આ પ્રક્રિયાને સર્વોચ્ચ પ્રાથમિકતા આપવામાં આવી છે.
સગીરાના ગર્ભપાત માટે તાત્કાલિક પ્રક્રિયા શરૂ થશે સામાન્ય રીતે કાનૂની જોગવાઈઓ અને સમયમર્યાદાને કારણે આવા કિસ્સાઓમાં તબીબી પ્રક્રિયા માટે અદાલતની પરવાનગી અનિવાર્ય બનતી હોય છે. ગુજરાત હાઈકોર્ટે આ મામલાની ગંભીરતા સમજીને અતિ ટૂંકા સમયમાં કાગળની ઔપચારિકતાઓ પૂરી કરી રાહતનો આદેશ આપ્યો છે.
આ ચુકાદો માત્ર એક કાનૂની પ્રક્રિયા નથી, પરંતુ પીડિત સગીરાના માનસિક અને શારીરિક સ્વાસ્થ્યને સુરક્ષિત રાખવા માટેનું એક મોટું ડગલું છે. અદાલતના સમયસરના આ હસ્તક્ષેપથી પીડિતા અને તેના પરિવારને મોટી રાહત મળી છે, સાથે જ તંત્ર દ્વારા પણ આ કેસમાં ઝડપી અને પારદર્શક કાર્યવાહી કરવામાં આવી રહી છે.
(9:53 AM IST)
છેલ્લા 8 દિવસમાં સૌથી લોકપ્રિય 
