સુરતના કતારગામ વિસ્તારમાં આવેલા ચિંતામણી એપાર્ટમેન્ટમાં સીડીનો સ્લેબ અચાનક તૂટી પડતાં ગંભીર દુર્ઘટના સર્જાઈ હતી. સ્લેબ ધરાશાયી થતાં 19 વર્ષીય યુવકનું મોત નીપજ્યું હતું. મૃતક રત્ન કલાકાર દંપતીનો એકનો એક પુત્ર હોવાનું સામે આવ્યું છે. સ્થાનિકો દ્વારા આક્ષેપ કરવામાં આવ્યો છે કે મકાન જર્જરિત હોવા છતાં રહેવાસીઓને કોઈ ચેતવણી આપવામાં આવી નહોતી. ઘટનાની જાણ થતાં ફાયર વિભાગની ટીમ તાત્કાલિક સ્થળે પહોંચી હતી અને રેસ્ક્યૂ કામગીરી હાથ ધરી હતી. બે બિલ્ડિંગ વચ્ચે લેડર બ્રિજ બનાવી 28 લોકોને સુરક્ષિત રીતે બહાર કાઢવામાં આવ્યા હતા. જ્યારે અશક્ત લોકોને ખાટલા મારફતે બહાર લાવવામાં આવ્યા હતા. ફાયર વિભાગની સમયસૂચકતાને કારણે ફસાયેલા તમામ 28 લોકોનો સફળતાપૂર્વક બચાવ થયો હતો.