અમદાવાદ ગ્રામ્યના સાણંદ પંથકમાંથી એક અત્યંત ચિંતાજનક અને દુઃખદ ઘટના સામે આવી છે. સાણંદ તાલુકાના જુવાલ ગામ નજીક આવેલી પાણીની પાટમાં ન્હાવા પડેલા માણકોલ ગામના 2 આશાસ્પદ યુવાનો અચાનક ઊંડા પાણીમાં ગરકાવ થઈ ડૂબવા લાગ્યા હતા. બૂમાબૂમ થતાં આસપાસના લોકો દોડી આવ્યા હતા અને ભારે જહેમત બાદ 1 યુવકને બહાર કાઢી સારવાર અર્થે હોસ્પિટલ ખસેડવામાં આવ્યો છે, જ્યારે અન્ય એક યુવક પાણીના પ્રવાહમાં લાપતા થતાં તેની સઘન શોધખોળ હાથ ધરવામાં આવી છે.

પ્રાપ્ત વિગતો અનુસાર, સાણંદ તાલુકાના માણકોલ ગામના બે યુવાનો જુવાલ ગામની સીમમાંથી પસાર થતી પાણીની પાટ નજીક ગયા હતા. બપોરના સુમારે બંને યુવાનો પાણીમાં ન્હાવા માટે ઉતર્યા હતા. જોકે, પાણીના ઊંડાણ અને તેજ પ્રવાહનો યોગ્ય અંદાજ ન આવી શકતાં બંને યુવાનો અચાનક સંતુલન ગુમાવીને ઊંડા ખાડામાં ખેંચાવા લાગ્યા હતા અને જોતજોતામાં ડૂબી ગયા હતા.

બંને યુવાનોને ડૂબતા જોઈ કાંઠે ઉભેલા લોકોએ બૂમાબૂમ કરી મૂકી હતી. સ્થાનિક તરવૈયાઓ અને ગ્રામજનોએ તુરંત પાણીમાં ઝંપલાવીને રેસ્ક્યુ કામગીરી હાથ ધરી હતી. ભારે જહેમત બાદ એક યુવકને અર્ધબેભાન હાલતમાં સલામત રીતે બહાર કાઢી લેવામાં આવ્યો હતો. તેની હાલત નાજુક જણાતાં તાત્કાલિક ૧૦૮ એમ્બ્યુલન્સ મારફતે નજીકની હોસ્પિટલમાં સારવાર અર્થે ખસેડવામાં આવ્યો છે. જ્યારે બીજા યુવાનનો કોઈ પત્તો ન મળતાં સ્થાનિક ગોતાખોરો અને વહીવટી તંત્રની બચાવ ટીમ (Rescue Team) દ્વારા પાટના વહેણમાં તેની શોધખોળ તેજ કરવામાં આવી છે.

આ દુર્ઘટનાની જાણ થતાં જ બાવળા પોલીસ સ્ટેશનનો (Bavla Police Station) કાફલો તાબડતોબ ઘટનાસ્થળે દોડી આવ્યો હતો. પોલીસે સ્થળ પર પહોંચી સ્થિતિ પર કાબૂ મેળવ્યો હતો અને સ્થાનિક તરવૈયાઓની મદદથી લાપતા યુવકને શોધવા માટે સર્ચ ઓપરેશન શરૂ કરાવ્યું છે. માણકોલ ગામના યુવાનો ડૂબ્યા હોવાની ખબર વાયુવેગે પ્રસરી જતાં જુવાલ ગામની પાટ કાંઠે બંને ગામના લોકોના ટોળેટોળાં ઉમટી પડ્યા હતા અને પરિવારજનોમાં ભારે આક્રંદ છવાઈ ગયો છે.