અમદાવાદ શહેરની યુ.એન. મહેતા હોસ્પિટલના કેમ્પસમાં આવેલી ડ્રેનેજ પાઇપલાઇનમાં કામ દરમિયાન ગંભીર અકસ્માત સર્જાયો હતો. બેઝમેન્ટમાં આવેલી ડ્રેનેજ લાઇનમાં ત્રણ શ્રમિકો ફસાઈ જતાં અફરાતફરીનો માહોલ સર્જાયો હતો. ઘટનાની જાણ થતાં જ ફાયર બ્રિગેડની ટીમ તાત્કાલિક સ્થળ પર પહોંચી અને બચાવ કામગીરી હાથ ધરી હતી.

પ્રાથમિક માહિતી મુજબ, હોસ્પિટલના બેઝમેન્ટમાં ડ્રેનેજ લાઇનની સફાઈ અથવા સમારકામનું કામ ચાલી રહ્યું હતું. આ દરમિયાન એક શ્રમિકનું સંતુલન બગડતાં તે પાઇપલાઇનમાં પડી ગયો હતો. તેને બચાવવાના પ્રયાસમાં અન્ય બે શ્રમિકો પણ અંદર ઉતર્યા, પરંતુ અંદર ઝેરી ગેસ અથવા ઓક્સિજનના અભાવને કારણે ત્રણેય મુશ્કેલીમાં મુકાઈ ગયા

ઘટના દરમિયાન અંદર રહેલા એક શ્રમિકે બૂમાબૂમ કરતાં હોસ્પિટલ સ્ટાફ અને આસપાસના લોકો મદદ માટે દોડી આવ્યા હતા. ફાયર બ્રિગેડ પહોંચે તે પહેલાં સ્થાનિક લોકોએ ભારે જહેમત બાદ એક શ્રમિકને સુરક્ષિત રીતે બહાર કાઢ્યો હતો. જોકે, બાકીના બે શ્રમિકો પાઇપલાઇનમાં અંદર સુધી ફસાઈ ગયા હતા.

ત્યારબાદ ફાયર બ્રિગેડની રેસ્ક્યુ ટીમે ઓક્સિજન સિલિન્ડર અને વિશેષ સુરક્ષા સાધનોની મદદથી અંદર પ્રવેશ કરીને બંને શ્રમિકોને સફળતાપૂર્વક બહાર કાઢ્યા હતા. ઝેરી ગેસની અસર અને ગૂંગળામણને કારણે બંનેને તાત્કાલિક હોસ્પિટલમાં સારવાર માટે ખસેડવામાં આવ્યા છે. તેમની સ્થિતિ અંગે તબીબોની દેખરેખ હેઠળ સારવાર ચાલી રહી છે.

ઘટનાની જાણ થતાં શહેરના મેયર હિતેશ બારોટ તથા સ્ટેન્ડિંગ કમિટીના ચેરમેન કમલેશ પટેલ હોસ્પિટલ પહોંચવા રવાના થયા હતા અને સમગ્ર ઘટનાની માહિતી મેળવી હતી. હોસ્પિટલ જેવા સંવેદનશીલ વિસ્તારમાં બનેલી આ ઘટનાને ધ્યાનમાં રાખીને ડ્રેનેજ લાઇનમાં કામ દરમિયાન સુરક્ષા નિયમોનું પાલન થયું હતું કે નહીં તે મુદ્દે તપાસ હાથ ધરાય તેવી શક્યતા વ્યક્ત કરવામાં આવી રહી છે.