અમદાવાદ: અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર કસ્ટમ્સ વિભાગે ગોલ્ડ સ્મગલિંગનો વધુ એક મસમોટો કેસ ઝડપી પાડ્યો છે. દુબઈથી આવેલી એક મહિલા પેસેન્જર પોતાના શરીરમાં સોનાની પેસ્ટ સંતાડીને લાવી હોવાની ચોક્કસ બાતમીના આધારે અમદાવાદ કસ્ટમ્સે તેની અટકાયત કરી રૂ. ૩૫.૮૪ લાખની કિંમતનું ૨૪૪.૧૬ ગ્રામ ૨૪ કેરેટ સોનું જપ્ત કર્યું છે.

મળતી વિગતો અનુસાર, ડિરેક્ટોરેટ ઑફ રેવન્યુ ઈન્ટેલિજન્સ (DRI) દ્વારા શેર કરવામાં આવેલી ચોક્કસ બાતમીના આધારે એર ઈન્ટેલિજન્સ યુનિટ (AIU) ની ટીમે સોમવારે દુબઈથી ફ્લાઈટ નંબર FZ-437 માં આવી પહોંચેલી એક મહિલા પેસેન્જરને અટકાવી હતી. કસ્ટમ્સના અધિકારીઓ દ્વારા મહિલાની ઝીણવટભરી અને વિગતવાર તલાશી લેવામાં આવતા તેના શરીરમાં સંતાડેલી આશરે ૨૭૦ ગ્રામ સોનાની પેસ્ટ મળી આવી હતી.

ત્યારબાદ આ સોનાની પેસ્ટને પ્રોસેસ કરીને ૨૪ કેરેટ સોનાના ટીટી બારમાં રૂપાંતરિત કરવામાં આવી હતી. આ બારનું કુલ વજન ૨૪૪.૧૬ ગ્રામ નોંધાયું હતું, જેની આંતરરાષ્ટ્રીય અને સ્થાનિક બજાર અનુસાર અંદાજિત કિંમત ₹૩૫,૮૪,૨૬૯ થાય છે. કસ્ટમ્સ વિભાગ દ્વારા કસ્ટમ્સ એક્ટ, ૧૯૬૨ ની વિવિધ જોગવાઈઓ હેઠળ આ તમામ સોનું જપ્ત કરી લેવામાં આવ્યું છે.

અધિકારીઓના જણાવ્યા મુજબ, મહિલા સોનાની તસ્કરી પોતાના વ્યક્તિગત લાભ માટે કરી રહી હતી કે પછી કોઈ મોટા સ્મગલિંગ નેટવર્ક અથવા ગિરોહ માટે કામ કરી રહી હતી તે દિશામાં ઊંડાણપૂર્વકની કાનૂની તપાસ હાથ ધરવામાં આવી રહી છે. ઉલ્લેખનીય છે કે, છેલ્લા કેટલાક સમયથી અમદાવાદ એરપોર્ટ પર, ખાસ કરીને ગલ્ફ દેશોમાંથી આવતા મુસાફરો દ્વારા આચરવામાં આવતી સોનાની તસ્કરીના કેસોમાં સતત વધારો જોવા મળી રહ્યો છે.