સુરતની વીર નર્મદ સાઉથ ગુજરાત યુનિવર્સિટી (VNSGU)માં ચાલી રહેલી પરીક્ષાઓ દરમિયાન હાઈટેક ચોરીનો ચોંકાવનારો કિસ્સો સામે આવ્યો છે. MBBS સહિતની પરીક્ષામાં 6 વિદ્યાર્થીઓ લાઈવ પરીક્ષા દરમિયાન પેપરનો ફોટો પાડી AI ટૂલ એટલે કે ChatGPT પર અપલોડ કરી જવાબ લખતા ઝડપાયા હતા. ફ્લાઈંગ સ્ક્વોડે વિદ્યાર્થીઓને રંગેહાથ પકડી પાડ્યા હતા, જેમાં 2 MBBSના વિદ્યાર્થીઓ પણ સામેલ છે. યુનિવર્સિટીએ તમામ વિદ્યાર્થીઓની પરીક્ષા રદ કરી અને દરેકને 10 હજાર રૂપિયાનો દંડ ફટકાર્યો છે. સાથે જ સમગ્ર મામલે પોલીસ ફરિયાદ નોંધાવવાની તૈયારી હાથ ધરવામાં આવી છે. મંગળવારે MPECની સુનાવણી દરમિયાન આવા 6 કિસ્સા સામે આવતા શિક્ષણ વ્યવસ્થામાં હાઈટેક નકલ અંગે ગંભીર ચિંતા વ્યક્ત થઈ રહી છે.