રાજકોટ : ગુજરાત પોલીસ વિભાગમાં વહીવટી તંત્રને વધુ સુદ્રઢ બનાવવાના હેતુથી મહત્વના ફેરફાર કરવામાં આવ્યા છે. રાજ્યના પોલીસ મહાનિરીક્ષક (વહીવટ) ગગનદીપ ગંભીર દ્વારા એક સત્તાવાર હુકમ જારી કરીને રાજ્યના ૬ જેટલા બિનહથિયારી પોલીસ ઇન્સ્પેક્ટરોને તાત્કાલિક અસરથી સ્ટેટ મોનીટરીંગ સેલ (SMC), ગાંધીનગર ખાતે એટેચ તરીકે મુકવામાં આવ્યા છે. ૧૫ મે ૨૦૨૬ના રોજ કરવામાં આવેલા આ આદેશ મુજબ તમામ અધિકારીઓએ પોતાની હાલની ફરજ પરથી મુક્ત થઈ તાત્કાલિક ગાંધીનગર ખાતે રિપોર્ટ કરવાનો રહેશે.

પડકારરૂપ કામગીરી કરનાર અધિકારીઓની પસંદગી:

આ નિયુક્તિઓમાં ખાસ કરીને ભાવનગર ખાતે ફરજ બજાવતા પી.બી. જેબલીયાનું નામ ચર્ચામાં છે. જેબલીયા અગાઉ રાજકોટ શહેર ક્રાઈમ બ્રાન્ચ તેમજ ભાવનગર રેન્જમાં અનેક જટિલ અને પડકારરૂપ કેસો ઉકેલીને પ્રશંસનીય કામગીરી કરી ચૂક્યા છે. તેમની આ ક્ષમતાને ધ્યાને રાખીને જ તેમને સ્ટેટ મોનીટરીંગ સેલ જેવી મહત્વની શાખામાં જવાબદારી સોંપવામાં આવી હોવાનું મનાય છે.

ગાંધીનગર ખાતે નિયુક્ત થયેલા PI ની યાદી:

સ્ટેટ મોનીટરીંગ સેલમાં હંગામી ધોરણે મુકાયેલા અધિકારીઓની વિગત નીચે મુજબ છે:

  જે.જે. ચાવડા: અમદાવાદ શહેર

  બી.પી. દેસાઈ: સી.આઈ.ડી. ક્રાઇમ

  એ.વાય. બલોચ: ભરૂચ

  વાય.જે. રાઠોડ: જૂનાગઢ

  એમ.ડી. ચંપાવત: મહીસાગર

  પી.બી. જેબલીયા: ભાવનગર

વહીવટી અને નાણાકીય જોગવાઈઓ:

પોલીસ મહાનિરીક્ષક દ્વારા કરાયેલા આદેશમાં સ્પષ્ટતા કરવામાં આવી છે કે આ તમામ નિમણૂકો તદ્દન હંગામી ધોરણે કરવામાં આવી છે. આ અધિકારીઓના પગાર અને ભથ્થા તેમની મૂળ મહેકમની કચેરી ખાતેથી જ ચૂકવવામાં આવશે. વધુમાં, પોલીસ મહાનિર્દેશક અને મુખ્ય પોલીસ અધિકારીના આદેશથી તમામ સંબંધિત કચેરીઓને આ અધિકારીઓને તાત્કાલિક અસરથી છૂટા કરી તેની જાણ ગાંધીનગર કચેરીને કરવા તાકીદ કરવામાં આવી છે.