<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 8th May 2024

બૂથ મેનેજમેન્‍ટનો પિરામીડ જ ધરાશાયી !

ગરમી, કાર્યકરોના ઓવર કોન્‍ફિડન્‍સે નેતાઓને પરસેવો લાવી દીધો!

કાંટે કી ટક્કર વાળી બનાસકાંઠા, પાટણ, આણંદ, સાબરકાંઠા, ભરૂચ, વલસાડ, સુરેન્‍દ્રનગર, પોરબંદર અને જામનગરમાં અનેક વિસ્‍તારોમાં કાર્યકરોની નારાજગી અને મતદારોના નિરૂત્‍સાહથી મતદાનની ટકાવારીએ લીડના સમીકરણો ખોરવી નાખ્‍યા

નવી દિલ્‍હી,તા. ૮: લોકસભા ચૂંટણી ૨૦૨૪ના ત્રીજા તબક્કામાં રાજયની ૨૫ સહિત ૯૩ બેઠકો માટે મંગળવારે મતદાન યોજાયું હતું. હવામાન ખાતાની હીટવેવની આગાહી પ્રમાણે સવારે ૧૧ વાગ્‍યાથી જ તીવ્ર ગરમી વચ્‍ચે લોકોએ મતદાન માટે લાઇનો લગાવી દીધી હતી, પરંતુ બપોરે ૧ વાગ્‍યા સુધીમાં તો મોટાભાગના મતદાન મથકો પર મતદાન માટે ગણ્‍યાંગાંઠ્‍યા મતદારોની આવનજાવન રહેતાં ભાજપના નેતાઓને પરસેવો આવી ગયો હતો. વડાપ્રધાન નરેન્‍દ્ર મોદીએ અમદાવાદમાં રાણીપ ખાતે મતદાન કર્યા પછી નાગરિકોને મહત્તમ મતદાન કરવા અપીલ કરી હતી. એટલું જ નહીં મતદારો મતદાન માટે બહાર નીકળે એ માટે ખુદ કેન્‍દ્રીય ગૃહમંત્રી અમિતભાઇ શાહે પોતાના ગાંધીનગર લોકસભા મતવિસ્‍તારના અલગ અલગ બૂથ પર બપોર સુધી ફરીને મતદારોનો મૂડ જાણવા પ્રયાસ કર્યો હતો. એ જ રીતે મુખ્‍યમંત્રી ભૂપેન્‍દ્ર પટેલે પણ ઘાટલોડિયાના વિવિધ બૂથ પર જઇ ટેબલ લગાવીને બેઠેલાં કાર્યકરોને મળવા પહોંચ્‍યા હતા. બપોરથી અમિતભાઇએ જલસા પાર્ટી પ્‍લોટ ખાતે આવેલા મધ્‍યસ્‍થ કાર્યાલયથી, પ્રદેશ ભાજપ પ્રમુખ સી.આર. પાટીલે નવસારી-સુરતથી તેમજ પ્રદેશ મહામંત્રી રત્‍નાકરે કોબા કમલમ્‌ ખાતેથી મોરચો સંભાળી મહત્તમ મતદાન માટે કાર્યકરોને દોડાવ્‍યા હતા. આને કારણે સાંજે ચાર વાગ્‍યા બાદ બાકી રહેલા મતદારોને મતદાન મથક સુધી લાવવામાં કેટલાક અંશે સફળતા મળી હતી. જોકે, તીવ્ર ગરમીની અસર, કાર્યકરોની નારાજગી સાથે ભાજપ જીતી જ જશે ને એવો અતિ આત્‍મવિશ્વાસથી મતદાન માટે અપેક્ષાથી વિપરિત ઉત્‍સાહ હવે કેવા પરિણામ આપશે, કેટલી લીડ આપશે એની ૪ જૂન સુધી અટકળો જ લગાવવી રહી.

 અમદાવાદ શહેરમાં આવતી ત્રણ લોકસભા વિસ્‍તારમાં ભાજપના પ્રયાસો અને મહેનતથી વિપરિત મતદાન રહ્યું. ખુદ કેન્‍દ્રીય ગૃહમંત્રી અમિતભાઇના મતવિસ્‍તાર ગાંધીનગરમાં ઘાટલોડિયામાં ૬૨ ટકા પછી સૌથી વધુ મતદાન કલોલ વિધાનસભા વિસ્‍તારમાં રહ્યું હતું. પરંતુ કાંટે કી ટક્કર વાળી બનાસકાંઠા, પાટણ, આણંદ, સાબરકાંઠા, ભરૂચ, વલસાડ, સુરેન્‍દ્રનગર, પોરબંદર અને જામનગરમાં અનેક વિસ્‍તારોમાં કાર્યકરોની નારાજગી અને મતદારોના નિરુત્‍સાહથી મતદાનની ટકાવારીએ લીડના સમીકરણો ખોરવી નાખ્‍યા છે એ નિશ્ચિત છે. જોકે, ગાંધીનગર, વડોદરા, નવસારીની લીડમાં વધારો થશે એવો ભાજપ દ્વારા વિશ્વાસ વ્‍યક્‍ત થઇ રહ્યો છે. અમદાવાદ પૂર્વ અને પંચમહાલ બેઠકની ચાર લાખ, છોટાઉદેપુર, ખેડા, વલસાડ, ભરૂચ અને અમદાવાદ પશ્ચિમની લીડમાં કેવો તફાવત રહે છે એ જોવું રહ્યું. સૌથી કટોકટીવાળી આણંદ બેઠક પર ભાજપના ડેમેજ કન્‍ટ્રોલની અસર લીડમાં જોવા મળશે. બનાસકાંઠામાં ચૌધરી અને ઠાકોર સમાજના સમાન મતો ધરાવતી બેઠક પર બન્ને તરફે મતદાન રસપ્રદ છે તો હાઇપ્રોફાઇલ બનેલી રાજકોટ બેઠક પર ૫૫થી ૬૦ ટકા જેટલુ મતદાનથી ભાજપ આશ્વસ્‍થ છે. પોરબંદર બેઠક પર નિરસ મતદાન કોને ફાયદો કરાવશે એના પર સૌની નજર છે. તો જામનગર, જૂનાગઢ, સુરેન્‍દ્રનગર, વલસાડ અને ભરૂચ લોકસભાના ડેમેજ કન્‍ટ્રોલનું ફળ પરિણામ વખતે જ સ્‍પષ્ટ થશે.

 ભાજપ પ્રમુખે બૂથ કમિટીથી માઇક્રો પેજ કમિટીનો કોન્‍સ્‍પેપ્‍ટ અમલી બનાવી ૭૪ લાખ સભ્‍યોનો ડેટા તૈયાર કર્યો હતો. આ ૭૪ લાખ સભ્‍યો સરેરાશ ત્રણ-ત્રણ મતદારોને મતદાન કરાવશે એવો મંત્ર આપીને રાજયની તમામ લોકસભા બેઠકો પર બૂથસંમેલનોમાં કાર્યકરોને આ બ્‍લ્‍યુપ્રિન્‍ટ મુજબ મતદાન કરવા પ્રેરિત કર્યા હતા. પરંતુ ડેટા અને એપ આધારિત સમગ્ર પ્રક્રિયામાં શક્‍તિ કેન્‍દ્રો, બૂથ કમિટીઓ અને પેજ પ્રમુખ, કમિટીઓનું પિરામીડ વાસ્‍તવમાં મતદારો, લાભાર્થીઓનો સંપર્ક કરી મતદાન માટે સક્રિય કરવામાં સફળ રહ્યો હોય એવું જણાતું નથી.

(4:24 PM IST)