ગુજરાતના ભ્રષ્ટાચાર વિરોધી બ્યુરો (એસીબી) એ ગુજરાત સ્ટેટ એવિએશન ઇન્ફ્રાસ્ટ્રક્ચર કંપની લિમિટેડ (ગુજસેલ) ના ભૂતપૂર્વ સીઈઓ, કેપ્ટન અજય ચૌહાણ અને અન્ય લોકો સામે ચૌહાણના સીઈઓ તરીકેના કાર્યકાળ દરમિયાન ભ્રષ્ટાચાર આચરવા સબબ કેસ નોંધ્યો છે.

 હાલમાં સસ્પેન્ડ કરાયેલા, ચૌહાણ અને અન્યો પર સરકારી તિજોરીને નુકસાન પહોંચાડવાનો અને રૂ. ૭૨ કરોડથી વધુનો ભ્રષ્ટાચાર કરવાનો આરોપ હોવાનું એન્ટી કરપ્શન બ્યુરો - એસીબીએ તેની અખબારી યાદીમાં જણાવ્યું છે.

એસીબી ગુજસેલના સીઈઓ તરીકેના તેમના કામગીરીની તપાસ કરી રહી હતી, અને પૂછપરછ બાદ, ભ્રષ્ટાચાર વિરોધી બ્યુરોએ અજય કરણસિંહ ચૌહાણ, મુખ્ય વ્યક્તિ અને તે પછીના ગુજસેલના તત્કાલીન એકાઉન્ટેબલ મેનેજર અલ્પેશ ત્રિપાઠી, કેશમેક એવિએશન પ્રા.લિ.ના ડિરેક્ટર અને અલ્પેશકુમાર પ્રજાપતિ, ગુજસેલ ખાતેના એકાઉન્ટન્ટ સામે પણ ગુનો નોંધ્યો છે.

ચૌહાણે એપ્રિલ ૨૦૦૪માં ડાયરેક્ટર ઓફ સિવિલ એવિએશનનું પદ સંભાળ્યું. ૧૮ વર્ષ સુધી આ પદ પર સેવા આપી. જાન્યુઆરી ૨૦૧૦માં તેમની ગુજસેઈલના  સીઈઓ તરીકે નિમણૂક કરવામાં આવી, આ ભૂમિકા ૧૩ વર્ષ સુધી જાળવી રાખી.  મુખ્યમંત્રી કાર્યાલયને ચૌહાણ વિશે અસંખ્ય ફરિયાદો મળ્યા પછી, તેમને ફેબ્રુઆરી ૨૦૨૩ માં તેમના પદ પરથી દૂર કરવામાં આવ્યા હતા.

ચૌહાણ પર તેમના પરિવાર અને પરિચિતોને લઈ જવા, લાવવા  માટે ૧૦૦ થી વધુ પ્રસંગોએ સરકારી વિમાનનો દુરુપયોગ કરવાના આરોપોનો પણ સામનો કરવો પડે તેમ છે.  તપાસ અહેવાલમાં ચૌહાણ દ્વારા સરકારી વિમાનોનો ઉપયોગ વિવિધ વ્યક્તિગત પ્રવાસો માટે કર્યાનું વર્ણન પણ કરવામાં આવ્યું છે, જે માટે જાહેર નાણાનો દુરુપયોગ કરવામાં આવ્યો હતો.

તદુપરાંત, ચૌહાણ પાસે અમદાવાદ, ગાંધીનગર અને નોઈડામાં ફ્લેટ, ફાર્મહાઉસ અને કોમર્શિયલ પ્રોપર્ટી સહિત રૂ. ૧૦૦ કરોડની મિલકતો હોવાનું જાણવા મળ્યું છે.  તપાસ ટાળવા માટે, તેણે કથિત રીતે નજીકના સંબંધીઓ અને અન્ય લોકોના નામે ફાર્મહાઉસ મેળવ્યું હતું.

ગુજસેલના ભૂતપૂર્વ સીઈઓ કેપ્ટન અજય ચૌહાણ વિરુદ્ધ ૭૨ કરોડ રૂપિયાનો જંગી ભ્રષ્ટાચાર આચરવા સબબ કેસ નોંધાયો: કુટુંબીઓ અને પરિચિતો માટે 100 વખત વિમાનનો દુરુપયોગ કર્યો: ફ્લેટ, ફાર્મ હાઉસ સહિત ૧૦૦ કરોડની સંપત્તિ

સમગ્ર તપાસ એન્ટીકરપ્શન બ્યુરોને સુપ્રત કરવામાં આવી છે. એસીબીના વડા સમશેરસિંઘ દ્વારા સમગ્ર તપાસનું સુપર વિઝન મદદનીશ નિયામક કે બી ચુડાસમાના નેતૃત્વમાં પીઆઇ ડીએન પટેલને સોપાયું છે.