News of Saturday, 15th June 2024
ધો- ૩થી ૮માં નવા શૈક્ષણિક વર્ષમાં ૨૪૮ દિવસનો અભ્યાસ કરાવાશે
ઓક્ટોબર- નવેમ્બરમાં પ્રથમ સત્રાંત કસોટી, એપ્રિલ-૨૦૨૫માં દ્વિતીય સત્રાંત કસોટી લેવાશે

અમદાવાદ, તા.૧૫: રાજ્યની પ્રાથમિક સ્કૂલોમાં ૧૩ જૂનથી નવા શૈક્ષણિક વર્ષનો પ્રારંભ થતાં ગુજરાત શૈક્ષણિક સંશોધન અને તાલિમ પરિષદ (GCERT) દ્વારા નવા શૈક્ષણિક વર્ષ માટેનું શૈક્ષણિક આયોજન નક્કી કરવામાં આવ્યું છે. જે અનુસાર પ્રાથમિક સ્કૂલોમાં વર્ષ દરમિયાન કુલ ૨૪૮ દિવસનું શિક્ષણ કરાવાશે. સ્કૂલોમાં જૂનથી શૈક્ષણિક સત્રનો પ્રારંભ થયા બાદ પ્રથમ માસમાં પુનરાવર્તન અને ઉપચારાત્કમ કાર્ય કરાવવામાં આવશે. આ માટે બ્રિજ કોર્ષના આધારે વિદ્યાર્થીઓને તૈયારી કરાવવામાં આવશે. જ્યારે જૂલાઈમાં પ્રથમ ચેપ્ટરનો અભ્યાસ કરાવાશે. પ્રાથમિક સ્કૂલોમાં પ્રથમ સત્રાંત કસોટી ઓક્ટોબર-નવેમ્બરમાં યોજાશે. જ્યારે દ્વિતીય સત્રાંત કસોટી એપ્રિલમાં યોજવાનું આયોજન કરાયું છે.
રાજ્યની તમામ સ્કૂલોમાં ૧૩ જૂનથી નવા શૈક્ષણિક વર્ષનો પ્રારંભ થયો છે. નવા વર્ષને લઈને GCERT દ્વારા ધો.૩થી ૮ માટેનું ગુજરાતી માધ્યમ અને અંગ્રેજી માધ્યમનું માસવાર શૈક્ષણિક આયોજન જાહેર કરવામાં આવ્યું છે. ગુજરાતી માધ્યમ અને અંગ્રેજી માધ્યમના આ આયોજન સાથે માસ વાર શૈક્ષણિક અભ્યાસના દિવસો કેટલા રહેશે તે અંગેની વિગતો પણ સ્કૂલોને મોકલી આપી છે. જેથી આ આયોજનના આધારે સ્કૂલો દ્વારા વિદ્યાર્થીઓને અભ્યાસ કરાવાશે.
ઞ્ઘ્ચ્ય્વ્ દ્વારા જાહેર કરાયેલા આયોજન પર નજર કરીએ તો, પ્રથમ સત્રમાં જૂન માસમાં અભ્યાસના ૧૪ દિવસો રાખવામાં આવ્યા છે. આ જ રીતે જુલાઈમાં ૨૬, ઓગસ્ટમાં ૨૪, સપ્ટેમ્બરમાં ૨૪, ઓક્ટોબરમાં ૨૧ દિવસનો અભ્યાસ કરાવાશે. રાજ્યમાં ૨૯ ઓક્ટોબરના રોજ દિવાળી હોવાથી ઓક્ટોબરના અંતમાં દિવાળી વેકેશન જાહેર કરાશે. જેથી પ્રથમ સત્રમાં ૧૦૯ અભ્યાસના દિવસો રહેશે. ઓક્ટોબર- નવેમ્બરમાં પ્રથમ સત્રાંત કસોટીનું આયોજન કરવામાં આવ્યું છે. પરંતુ દિવાળીને જોતા ઓક્ટોબર માસમાં જ પ્રથમ સત્રાંત પરીક્ષા લેવામાં આવશે. દિવાળી વેકેશન પહેલા સત્રાંત પરીક્ષા પુર્ણ થતી હોવાથી ઓક્ટોબરમાં પરીક્ષાનું આયોજન કરાય તેવી પ્રબળ શકયતા છે. ત્યારબાદ બીજા શૈક્ષણિક સત્રનો નવેમ્બરમાં પ્રારંભ થશે. જેમાં નવેમ્બરમાં અભ્યાસના ૧૨ દિવસો રહેશે. ડિસેમ્બર માસમાં ૨૫ દિવસ, જાન્યુઆરીમાં ૨૬, ફેબ્રુઆરીમાં ૨૪, માર્ચમાં ૨૫, એપ્રિલમાં ૨૪ અને મેમાં ૩ દિવસ મળી કુલ ૧૩૯ દિવસ રહેશે. આમ, પ્રથમ સત્રના ૧૦૯ અને બીજા સત્રના ૧૩૯ દિવસ મળી સમગ્ર વર્ષ દરમિયાન શૈક્ષણિક કાર્યના ૨૪૮ દિવસો રહેશે. બીજા શૈક્ષણિક સત્રમાં એપ્રિલ માસમાં દ્વિતીય સત્રાંત કસોટી લેવાનું આયોજન કરવામાં આવ્યું હોવાનું જાણવા મળે છે. મે માસમાં અભ્યાસના ૩ દિવસો રાખવામાં આવ્યા છે. જેથી ૫ મે, ૨૦૨૫થી રાજ્યમાં ઉનાળું વેકેશનની જાહેરાત કરવામાં આવશે. રાજ્યમાં ૧૩ જૂનથી નવા શૈક્ષણિક વર્ષનો પ્રારંભ થયા બાદ જૂન માસમાં સૌપ્રથમ વિદ્યાર્થીઓને બ્રિજ કોર્ષના આધારે પુનરાવર્તન અને ઉપચારાત્મક કાર્ય કરાવવામાં આવશે. જૂન માસના ૧૪ દિવસમાં કામગીરી કરવામાં આવ્યા બાદ જૂલાઈ માસની શરૂઆત સાથે નવા ધોરણનો અભ્યાસક્રમ ચાલુ કરવામાં આવશે. આ ઉપરાંત એપ્રિલ-૨૦૨૫માં વિદ્યાર્થીઓને પુનરાવર્તન કરાવાશે. એપ્રિલ માસમાં દ્વિતીય સત્રાંત પરીક્ષાનું આયોજન કરવામાં આવનાર છે. જોકે, ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા એકેડેમિક કેલેન્ડર જાહેર કરવામાં આવ્યા બાદ કામકાજના દિવસોમાં ફેરફાર કરાશે.
(9:45 AM IST)









છેલ્લા 8 દિવસમાં સૌથી લોકપ્રિય 
