<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Sunday, 14th July 2024

ઉમરેઠમાં અસ્થિર મગજની મહિલા પર સામૂહિક રેપ કરનાર બેને આજીવન કેદ

મહિલાને પાંચ વર્ષ પહેલા દવાખાને લઈ જવાનું કહીને રેપ કર્યોઃ આ મહિલાને બેચરી સીમમાં નહેર પાસે લઈ ગયા હતા તેમની ઉપર સામૂહિક બળાત્કાર ગુજાર્યો હતો

 આણંદ, તા.૧૪,

ઉમરેઠમાં રહેતી એક અસ્થિર મગજની મહિલાને પાંચ વર્ષ પહેલા દવાખાને લઈ જવાનું કહી રીક્ષામાં બેસાડી બેચરી નહેર પાસે લઈ જઈ શહેરના રાવળીયા ચકલામાં રહેતા બે શખ્સોએ તેની ઉપર બળાત્કાર ગુજાર્યો હતો. આ ઘટનામાં તેમના ત્રીજા સાથીદારે સાથ આપ્યો હતો. આ અંગેનો આણંદની કેસ અદાલતમાં ચાલી જતાં અદાલતે બંને આરોપીઓને કસુરવાર ઠેરવી આજીવન કેદની સજા અને દંડ ફટકાર્યો છે. જ્યારે ત્રીજાને નિર્દોષ ઠરાવી છોડી મૂક્યો હતો.

 ઉમરેઠ શહેરમાં રહેતા એક અસ્થિર મગજની મહિલાને ગત તા.૧૯ માર્ચ ૨૦૨૦ના બપોરના સમયે આરીફ ગનીભાઈ વહોરાની રીક્ષામાં શૈલેષ અશ્વિનભાઈ રાવળ, સુરેશસિંહ ચંદ્રસિંહ બોડાણા અને સંદીપ ઉર્ફે મરઘો રમેશભાઈ રાવળ ઉઠાવી ગયા હતા. આ મહિલાને બેચરી સીમમાં નહેર પાસે લઈ ગયા હતા. તેમની ઉપર સામૂહિક બળાત્કાર ગુજાર્યો હતો. અને તેના ફોટા પણ પાડ્યા હતા. આ બનાવ અંગે તા.૨૦ માર્ચના રોજ ત્રણેય આરોપીઓ વિરુદ્ધ ગુનો દાખલ થયો હતો. ઉમરેઠ પોલીસે બનાવની તપાસ કરી ત્રણેય આરોપીઓને ઝડપી લીધા હતા. ત્યારબાદ આ અંગે કોટેમાં ચાર્જશીટ પણ રજૂ કર્યું હતું. આણંદની કેસ અદાલતમાં ચાલી જતાં અદાલતે શેલૈષ અને સુરેશ નામના આરોપીઓને કસુરવાર ઠેરવી આજીવન કેદની સજા અને દંડ ફટકાર્યો છે. જ્યારે ત્રીજાને નિર્દોષ ઠરાવી છોડી મૂક્યો હતો.

(12:11 PM IST)