વેરાવળ નજીકના બીજ ગામે સરસ્વતી નદીમાં નાહવા પડેલા ચાર યુવકો ડ઼ૂબવા લાગ્યા હતા. જે પૈકી એક યુવક પાણીમાં ગરકાવ બનતાં મોતને ભેટ્યો હતો. જ્યારે અન્ય ત્રણ યુવકોનો બચાવ થયો હતો.

આજે બપોરે એકાદ વાગ્યાના સુમારે બીજ ગામે રહેતા પિયુષ જેસાભાઈ પંડિત નામનો ૨૦ વર્ષીય યુવક તેમના અન્ય ત્રણ મિત્રો સાથે બીજ ગામે પસાર થતી સરસ્વતી નદીના ચેક ડેમ પર નાહવા ગયા હતા.

જ્યાં નહાતી વખતે અકસ્માતે ચારેય યુવકો પાણીમાં ડૂબવા લાગ્યા હતા. જોકે અન્ય ત્રણ યુવકો બહાર નીકળી ગયા હતા. જ્યારે પિયુષ પંડિત પાણીમાં ડૂબવા લાગ્યો હતો. બચી ગયેલા ત્રણેય યુવકો દ્વારા તાત્કાલિક ગ્રામજનોને જાણ કરવામાં આવી હતી.

પ્રથમ ગ્રામજનોએ યુવકને બચાવવાના પ્રયત્નો કર્યા હતા. જે બાદ ગ્રામજનો દ્વારા તાત્કાલિક તંત્રને જાણ કરવામાં આવતાં વેરાવળ તાલુકા વિકાસ અધિકારી ભાવસિંહ પરમાર મામલતદાર એસ.કે શ્રીમાળી તેમજ પ્રભાસ પાટણ પોલીસનો સ્ટાફ તુરંત ઘટનાસ્થળે દોડી આવ્યો હતો. વેરાવળ ફાયર ફાઈટરની ટીમ દ્વારા ફાઇબર બોટ મારફતે પાણીમાં લાપતા બનેલા યુવકની શોધખોળ હાથ ધરવામાં આવી હતી. અંદાજે એકાદ કલાકની શોધખોળ બાદ ચેકડેમથી ૫૦૦ મીટર દૂર યુવકનો મૃતદેહ મળી આવ્યો હતો. તંત્ર દ્વારા તાત્કાલિક યુવકના મૃતદેહને વેરાવળ સિવિલ હોસ્પિટલ ખાતે પીએમ અર્થે ખસેડવામાં આવ્યો હતો.

મૃતક યુવક કોલેજમાં અભ્યાસ કરતો હતો અને પરિવારમાં મોટોભાઈ તથા માતાપિતા સાથે રહેતો હતો. ખેતીકામ કરતા આ પરિવારના આશાસ્પદ યુવકનું અકાળે અવસાન થતાં પરિવાર તેમજ નાના એવા બીજ ગામમાં અરેરાટી પ્રસરી જવા પામી છે.