રાજકોટ તા. ૯ : વડાપ્રધાનશ્રી નરેન્દ્રભાઈ મોદીની પ્રેરણા અને માર્ગદર્શનમાં સમગ્ર દેશમાં તા. ૮ થી ૧૫મી ઓગસ્ટ દરમિયાન હર ઘર તિરંગા અભિયાન યોજાઈ રહ્યું છે. જેનાથી દેશભકિતનો જુવાળ ઉભો થયો છે. સાથોસાથ દેશની આઝાદી માટે બલિદાન આપનારા શહીદોને પણ શ્રદ્ધાંજલિ આપી તેમના કાર્યોને યાદ કરવામાં આવશે.

જિલ્લા વહિવટી તંત્ર, રાજકોટ મહાનગરપાલિકા તથા પક્ષના સંયુકત ઉપક્રમે આવતીકાલે તા.૧૦ નાં સવારે ૯ કલાકે બહુમાળી ભવન, સરદાર ચોક, રાજકોટ ખાતેથી મુખ્યમંત્રીશ્રી ભૂપેન્દ્રભાઇ પટેલના વરદ હસ્તે 'હર ઘર તિરંગા યાત્રા' અભિયાનનો પ્રારંભ થશે. રાષ્ટ્રભાવના દેશભકિત અને દેશની એકતા-અખંડિતતાને બળવત્તર બનાવવાના આ કાર્યક્રમમાં જે.પી.નડ્ડા અને શ્રી સી.આર. પાટીલ, હર્ષ સંઘવી,  રાઘવજીભાઇ પટેલ, ભાનુબેન બાબરિયા, કુંવરજીભાઇ બાવળિયા,  નયનાબેન પેઢડિયા, સાંસદો તથા ધારાસભ્યો, આગેવાનો ઉપસ્થિત રહી 'હર ધર તિરંગા યાત્રા'નો પ્રારંભ કરાવવાના છે. જેમાં સમગ્ર રાજકોટવાસીઓ જોડાશે.

મુખ્યમંત્રીની ઉપસ્થિતિમાં રાજ્યના ચાર મુખ્ય શહેરો રાજકોટ, અમદાવાદ, સુરત અને વડોદરામાં ભવ્ય 'હર ઘર તિરંગા યાત્રા'નું આયોજન કરવામાં આવેલું છે. જેમાં સૌ પ્રથમ આ યાત્રાનો શુભારંભ રાજકોટથી થશે.