સ્કૂલોમાં ૧૫મીએ પ્રથમ વાલી સંમેલન યોજાશે
શાળા સ્વચ્છતા, સ્વચ્છ ટોયલેટ, ચોખ્ખુ પાણી, બાળકોની નિયમિતતા, શિક્ષણની ગુણવતા અંગે સંમેલનમાં ચર્ચ કરાશે
અમદાવાદ,તા.૧૩: રાજયની તમામ સ્કૂલોમાં ૧૫ ઓગસ્ટના રોજ પ્રથમ વાલી સંમેલન યોજાશે. દર વર્ષે સ્કૂલોમાં બે વાલી સંમેલન યોજવામાં આવતા હોય છે, જેમાં પ્રથમ વાલી સંમેલન ૧૫ ઓગસ્ટના રોજ યોજાયા બાદ બીજું વાલી સંમેલન ૨૬ જાન્યુઆરીના રોજ યોજાશે. વાલી સંમેલનમાં સ્કૂલના વિવિધ પાસાઓ અંગે ચર્ચા કરવામાં આવ્યા બાદ જે સૂચનો આવે તેની પર અમલ કરવાનો રહેશે. એક વાલી સંમેલન માટે સ્કૂલની રૂ. ૫૦૦ની ગ્રાન્ટ પણ મંજૂર કરવામાં આવી હોવાનું જાણવા મળે છે.
પ્રાપ્ત માહિતી અનુસાર, શિક્ષણ વિભાગ દ્વારા સ્કૂલોમાં વર્ષ દરમિયાન બે વાલી સંમેલન કરવાની જોગવાઈ કરવામાં આવેલી છે. જેમાં આ વર્ષે પ્રથમ વાલી સંમેલન ૧૫ ઓગસ્ટ, ૨૦૨૪ અને બીજું વાલી સંમેલન ૨૬ જાન્યુઆરી, ૨૦૨૫ના દિવસે યોજવાનું આયોજન કરવામાં આવ્યું છે. રાજયની તમામ સરકારી પ્રાથમિક શાળાઓ તેમજ કે.જી.બી.વી હોસ્ટેલમાં બે વાલી સમેલનનું આયોજન કરવા માટે શિક્ષણ વિભાગ દ્વારા પરિપત્ર કરી સૂચના આપવામાં આવી છે. વાલી સંમેલનમાં સમગ્ર શિક્ષાની અલગ અલગ એક્ટિવિટીની ચર્ચા કરવામાં આવશે. ઉપરાંત શાળા સ્વચ્છતા, ટોયલેટ સ્વચ્છ તેમજ ચોખ્ખું પાણી અંગે તથા બાળકોના પ્રવેશ નિયમિતતા તેમજ શિક્ષણની ગુણવત્તા અંગે વાલી સંમેલનમાં ચર્ચા કરવામાં આવશે.
આ ઉપરાંત ૬ થી૧૪ વર્ષની વયજૂથના શાળા બહારના બાળકોના પ્રવેશ અને સ્પેશિયલ ટ્રેનિંગ પ્રોગ્રામ, સિઝનલ હોસ્ટેલ તેમજ સ્કૂલ ઓન વ્હીલ પ્રોજેકટ બાબતે, ઓનલાઇન અને ડિજિટલ માધ્યમથી શિક્ષણ, વિશિષ્ટ જરૂરિયાતવાળા બાળકો CWSN સાધન સામગ્રીની પ્રાપ્તિ તથા તેના ઉપયોગની જાણકારી, ટ્રાન્સપોર્ટ તથા એસ્કોર્ટની સગવડતાનું યોગ્ય આયોજન, વોકેશનલ એજયુકેશન શિક્ષણ, ડ્રોપ આઉટ અને કન્યા શિક્ષણ માટે ચિંતન, જ્ઞાનકુંજ પ્રોજેક્ટ, સ્કૂલ ઓફ એક્સેલન્સ કાર્યક્રમ, જ્ઞાનશકિત રેસિડેન્શિયલ સ્કૂલ, વૃક્ષારોપણ, જળસંચય, ગ્રીનસ્કૂલ, કમ્પ્યૂટર લેબનો ઉપયોગ, મોડલ સ્કૂલ અને મોડેલ ડે સ્કૂલ, નિપુણ ભારત હેઠળ પાયાના વાંચન, લેખન અને ગણન કૌશલ્યોને લઈને સંમેલનમાં ચર્ચા કરવામાં આવશે.
વાલી સંમેલનમાં સભ્યો ઉપરાંત શાળામાં ભણતા અન્ય બાળકોના વાલીઓ, જે તે વિસ્તારના વડીલ આગેવાન વ્યક્તિઓ, ગામના રોલ મોડેલ સમાન વ્યક્તિઓ, ગામ પ્રેરક અને કર્મનિષ્ઠ વ્યક્તિત્ત્વ ધરાવતા કેળવણીકારોને આમંત્રણ આપવામાં આવશે. પ્રથમ સત્રમાં ૧૫ ઓગસ્ટ, ૨૦૨૪ના સ્વતંત્રતા દિન નિમિત્તે વાલી સંમેલનની ઉજવણી અને બીજા સત્રના વાલી સંમેલનમાં ૨૬ જાન્યુઆરી, ૨૦૨૫ પ્રજાસત્તાક દિન નિમિત્તે દીકરીની સલામ દેશને નામ કાર્યક્રમની ઉજવણી કરવાની રહેશે. આ કાર્યક્રમ અંતર્ગત આ વર્ષે ગામમાં જેટલી દીકરીઓનો જન્મ થયો હોય તેટલી દીકરીઓ અને તેમના માતા-પિતાને આમંત્રણ પત્રિકા આપીને બોલાવવાના રહેશે. શાળા કક્ષાએ સંમેલન માટે ગ્રાન્ટની ફાળવણી કરવામાં આવશે. જેમાં એક વાલી સંમેલનના રૂ. ૫૦૦ મંજૂર કરવામાં આવ્યા છે. જેમાં રૂ. ૩૦૦ સરભરા ખર્ચ અને રૂ. ૨૦૦ ડોક્યુમેન્ટેશનનો ખર્ચ રહેશે. જેથી તમામ સરકારી પ્રાથમિક શાળાઓ તથા કે.જી.બી.વીમાં ૧ શાળા દીઠ વર્ષના કુલ બે વાલી સંમેલનના રૂ. ૧ હજારનો ખર્ચ કરવાનો રહેશે. વાલી સંમેલનમાં જે સૂચનો થયા હોય તેનું સત્વરે અમલીકરણ થાય તે ખાસ જોવાનું રહેશે. વાલી સંમેલનનો સમય ગામના આગેવાનો તેમજ વાલીઓને અનુકૂળ હોય તેવો રાખવાનો રહેશે.
(9:55 AM IST)
છેલ્લા 8 દિવસમાં સૌથી લોકપ્રિય 
