રાજકોટ તા.૬: તાજેતરમાં સમગ્ર ગુજરાતમાં શાળાઓના શૈક્ષણિક પ્રવાસો અચાનક સ્‍થગિત થવાથી શાળાઓ, વાલીઓ અને શૈક્ષણિક પ્રવાસ આયોજકો અનિશ્‍ચિતતાની સ્‍થિતિમાં મુકાઈ ગયા છે.

અનેક શાળાઓએઆગામી સિઝન માટે વિવિધ શૈક્ષણિક પ્રવાસ આયોજકો સાથે વ્‍યવસ્‍થાકરી હતી, અને આ અચાનક નાયબ શિક્ષણ નિયામક, ગાંધીનગર દ્વારા આવેલ મનાઈ હુકમથી વાલીઓ, શિક્ષકો અને સંકળાયેલી એજન્‍સીઓમાં ગંભીર ચિંતા સર્જાઈ છે.

આ વર્તમાન પરિસ્‍થિતિને કારણે વાલીઓ પર ભારે નાણાકીય બોજ ઊભો થયો છે, જેઓ હવે નોંધપાત્ર કેન્‍સલેશન ફીનો સામનો કરી રહ્યા છે. શાળા પ્રવાસની મોસમ ઓક્‍ટોબરથી ડિસેમ્‍બર મહિના સુધી મર્યાદિત છે તે જોતાં, આ મુદ્દાનું સમયસર નિરાકરણ મહત્‍વપૂર્ણ છે.

પરિસ્‍થિતિની ગંભીરતાને ઓળખીને, ગુજરાત એજ્‍યુકેશનલ ટૂર ૨ ઓપરેટર્સ એસોસિએશનના એક પ્રતિનિધિમંડળે તાજેતરમાં માનનીય શિક્ષણ મંત્રી ડો. કુબેર ડીંડોર મુલાકાત કરી. બેઠક દરમિયાન, પ્રતિનિધિમંડળે સસ્‍પેન્‍શનથી પ્રભાવિત શાળાઓ, વાલીઓ અને ટૂર ઓપરેટરોની ચિંતાઓ રજૂ કરી હતી તેમજ પ્રતિનિધિમંડળે તેમના બહોળા અનુભવને કારણે શિક્ષણ વિભાગને માર્ગદર્શિકા બનાવવામાં મદદ કરવાની તૈયારી પણ દર્શાવી હતી. ડો. ડીંડોરે પ્રતિનિધિમંડળને આ મુદ્દાનો ઝડપી ઉકેલ લાવવાની ખાતરી આપી હતી.

પ્રતિનિધિમંડળે આ બાબતે પ્રવાસન મંત્રી શ્રી મુળુંભાઈ બેરાને પણ ધ્‍યાન દોરેલ હોવાનું સેક્રેટરી હિતેન ત્રિવેદી (મો.૯૮૨૪૧ ૭૬૪૪૩)ની યાદીમાં જણાવાયું છે.