જંત્રીના દરોને તર્કસંગત બનાવવાનું ફરી ટલ્લે
ડીસેમ્બરમાં સ્થાનિક ચૂંટણીઓને ધ્યાને રાખી સરકારે અમલ પાછળ ઠેલ્યો
અમદાવાદ, તા.૧૬: જંત્રીના દરોને તર્કસંગત બનાવવાની રાજ્ય સરકારની યોજનામાં અનેક રાજકીય અવરોધોનો સામનો કરવો પડ્યો છે. પ્રક્રિયા લગભગ પૂર્ણ થઈ ગઈ હોવા છતાં, આ વર્ષે તેનો અમલ થાય તેવી શકયતા નથી. મહેસૂલ વિભાગના વરિષ્ઠ અધિકારીના જણાવ્યા અનુસાર, રાજ્યમાં ડિસેમ્બરમાં સ્થાનિક સંસ્થાઓની ચૂંટણીઓ યોજાશે જેને કારણે નવા તર્કસંગત જંત્રી દરો ચૂંટણી પછી જ અમલમાં આવશે તેવી અપેક્ષા છે.
વધુમાં, કેન્દ્ર સરકારની ભલામણોને પગલે રાજ્ય સ્ટેમ્પ ડ્યુટી અને નોંધણી ફી ઘટાડવાનું વિચારી રહ્યું છે. આ પગલાનો હેતુ જનતા પરના નાણાકીય બોજને હળવો કરવાનો છે.
ગયા વર્ષે મે મહિનામાં રાજ્યના મહેસૂલ વિભાગે જંત્રીના દરો બમણા કર્યા હતા. જો કે, આ દરોમાં ઘણી અસ્પષ્ટતા રહે છે. મહેસૂલ વિભાગે હવે દરોને વધુ સુસંગત અને સ્વીકાર્ય બનાવીને વૈજ્ઞાનિક સિદ્ધાંતો પર આધારિત દરખાસ્ત તૈયાર કરી છે. હાલમાં, અમુક મોંઘા વિસ્તારોમાં જંત્રીના દર અન્યોની સરખામણીએ ઓછા છે, જેને નવી યોજના સુધારવા માંગે છે.
દરનું તર્કસંગતકરણ શરૂઆતમાં ગયા વર્ષે ડિસેમ્બરના અંત સુધીમાં પૂર્ણ થવાની ધારણા હતી, પરંતુ આ પ્રક્રિયામાં ધારણા કરતાં વધુ સમય લાગ્યો હતો.
(9:53 AM IST)
છેલ્લા 8 દિવસમાં સૌથી લોકપ્રિય 
