અમદાવાદ,તા. ૩૦: જીએસટીનો અમલ શરૂ થયો ત્‍યારથી જ અમદાવાદ સહિત ગુજરાતભરમાં બોગસ બિલિંગ કૌભાંડનું પ્રમાણ સતત વધી રહ્યું છે. દિવાળી પહેલાં સ્‍ટેટ જીએસટીના અધિકારીઓ કપડાં, ફટાકડાં અને આઇસ્‍ક્રીમના વેપારીઓ પર દરોડા પાડીને રૂ. ૩.૨૮ કરોડની જીએસટી ચોરી શોધી કાઢી હતી. આ પ્રકરણની તપાસ હજુ ચાલી રહી છે. તપાસમાં ઘણા મોટા માથાની સંડોવણી સામે આવી શકે તેવી સંભાવના જોવા મળી રહી છે. આ ઉપરાંત રાજયના ઘણા વેપારીઓ હજુ સુધી બિલ વગર જ ધંધો કરતા હોવાની વિગતો અધિકારીને ધ્‍યાને આવતાં તેમના ઉપર પણ આગામી દિવસોમાં તવાઇ આવશે.

સ્‍ટેટ જીએસટીના અધિકારીઓના ધ્‍યાનમાં આવ્‍યું હતું કે દિવાળીમાં ફટાકડાનું બિલ વગર જ વેચાઇ થઇ રહ્યું છે. તેમણે સુરત, ભાવનગર અને કલોલમાં ફટાકડાના મોટા વેપારીઓને ત્‍યાં દરોડા પાડીને કરોડો રૂપિયાની જીએસટી ચોરી શોધી કાઢી હતી.

અમરેલી અને ગાંધીનગરમાં પણ આઇસક્રીમ અને કપડાંના વેપારીઓને ત્‍યાં દરોડા પાડવામાં આવ્‍યા હતા. આ વેપારીઓને ત્‍યાંથી અધિકારીઓ ડાયરીઓ, કાચી ચિઠ્ઠીઓ અને કાચી એન્‍ટ્રીઓ તથા ડિજિટલ ડેટા મળી આવ્‍યો છે. જેની ઝીણવટભરી તપાસ ચાલી રહી છે. જીએસટી ચોરી કૌભાંડમાં જે મોટામાથાની સંડોવણી સામે આવી રહી છે તે તમામના હિસાબોની ચકાસણી કરવામાં આવશે.