ભરૂચનાં ટંકારિયા ગામનાં રહીશ અને ડોક્ટર તરીકે પ્રેક્ટિસ કરતા ફરિયાદી સાથે ભેજાબાજોએ સોશિયલ મીડિયા થકી પોલીસ અને સેન્ટ્રલ બ્યૂરો તરીકેની ઓળખ આપી ધરપકડનો લેટર મોકલી, ઘરે પોલીસ આવશે તેવી ધમકી આપી હતી અને રૂ. 14 લાખ પડાવી છેતરપિંડી કરી હોવાના આક્ષેપ સાથે સાઇબર પોલીસ મથકમાં ફરિયાદ નોંધાઈ છે. આ ફરિયાદ સાથે ફરિયાદીએ ભેજાબાજોએ મોકલેલા બનાવટી દસ્તાવેજો પણ આપ્યા હતા.

ભરૂચ સાઇબર પોલીસ મથકમાં ફરિયાદી બસીર અહેમદ ઇબ્રાહીમ મનમન કે જેઓ BSAM સુધીનો અભ્યાસ કર્યો છે અને હાલ ડોક્ટર તરીકે પ્રેક્ટિસ કરે છે. તેમનાં આક્ષેપ મુજબ, કેટલાક અજાણ્યા ભેજાબાજો એ 22 સપ્ટેમ્બર, 2024 ના રોજ ફોન કરી ટેલિકોમ રેગ્યુલેટરી ઓથોરિટી ઓફ ઇન્ડિયાનાં (TRAI) અધિકારી તરીકેની ઓળખ આપી હિન્દી ભાષામાં વાત કરી હતી. ત્યાર બાદ કહ્યું હતું કે, તમારો આધાર કાર્ડ અને મોબાઈલ નંબર જે બેન્ક ખાતા સાથે લીક કરવામાં આવ્યો છે તે બેન્ક ખાતમાંથી ફ્રોડ થયો છે.

ભેજાબાજોએ ફરિયાદી સાથે અલગ-અલગ સમયે વીડિયો કોલ કર્યો હતો, જેમાં તેઓ પોલીસની વર્દીમાં હતા અને પોલીસ સ્ટેશનમાં બેઠા હોય તે પ્રકાર દેખાતું હતું. ગઠિયાઓએ ફરિયાદીને કહ્યું કે, તમારા બેન્ક એકાઉન્ટમાં 15 લાખ રૂપિયા છે, તમારે પોલીસથી બચવું હોય અથવા ધરપકડથી બચવું હોય તો તમારે ઓનલાઇન પેમેન્ટ કરવું પડશે અને રૂપિયા આપવા પડશે અને આ રૂપિયા તમારી સામે થયેલા કેસની ઇન્વેસ્ટિગેશન પુરી થયાનાં 24 કલાક બાદ તમારા આ એકાઉન્ટમાં જમા થઈ જશે. આથી, ટુકડે-ટુકડે 14 લાખ ફરિયાદ પાસેથી પડાવ્યા હતા.

ભેજાબાજોએ ફરિયાદીને TRAI, CBI અને ધરપકડનો નકલી લેટર પણ મોકલ્યો હતો. પોતાની સાથે છેતરપિંડી થયાની જાણ થતા ફરિયાદીએ તાત્કાલિક સાઇબર પોલીસ મથકે અજાણ્યા ઈસમો સામે છેતરપિંડી આચરી રૂ. 14 લાખ પડાવ્યા હોવાની ફરિયાદ નોંધાવી હતી. આ મામલે સાઇબર પોલીસે વિવિધ કલમો હેઠળ ગુનો નોંધીને આગળની તપાસ હાથ ધરી છે.