અમદાવાદ :એન્ફોર્સમેન્ટ ડિરેક્ટોરેટએ અમદાવાદ પ્રાદેશિક કાર્યાલયે મેજિકવિનના કેસની ચાલી રહેલી તપાસના ભાગરૂપે દિલ્હી, મુંબઈ અને પુણેમાં 21 સ્થળોએ સર્ચ ઓપરેશન હાથ ધર્યું હતું, જે ક્રિકેટ મેન્સ ટી-20 વર્લ્ડ કપની મેચોના ગેરકાયદેસર પ્રસારણમાં સામેલ હતા. 

મંગળવારે જારી કરાયેલી EDની પ્રેસ રિલીઝ મુજબ, પ્રિવેન્શન ઓફ મની લોન્ડરિંગ એક્ટ (PMLA)ની જોગવાઈઓ હેઠળ 10 અને 12 ડિસેમ્બરે સર્ચ કરવામાં આવ્યું હતું. ઓપરેશન દરમિયાન, અંદાજે રૂ. 30 લાખની કિંમતનું બેંક ફંડ જપ્ત કરવામાં આવ્યું હતું, અને વિવિધ ગુનાહિત દસ્તાવેજો અને ડિજિટલ ઉપકરણો જપ્ત કરવામાં આવ્યા હતા.

મેજિકવિન અને અન્યો સામે અમદાવાદની સાયબર ક્રાઈમ પોલીસ દ્વારા દાખલ કરવામાં આવેલી FIRના આધારે EDએ તેની તપાસ શરૂ કરી હતી. તપાસમાં બહાર આવ્યું છે કે મેજિકવિન, એક સટ્ટાબાજીની વેબસાઈટ, જે ગેમિંગ પ્લેટફોર્મના સ્વરૂપમાં છે, તે વાસ્તવમાં પાકિસ્તાની નાગરિકોની માલિકીની હતી. આ વેબસાઈટનું સંચાલન મુખ્યત્વે દુબઈમાં કામ કરતા અથવા સ્થાયી થયેલા ભારતીય નાગરિકો દ્વારા કરવામાં આવે છે.

વેબસાઇટ પર દર્શાવવામાં આવેલી સટ્ટાબાજીની રમતો મૂળ ફિલિપાઇન્સ અને અન્ય દેશોમાં રમવામાં આવી હતી.  જ્યાં સટ્ટાબાજીની પ્રવૃત્તિઓ કાયદેસર છે. જો કે, આ ગેમ્સને મેજિકવિન વેબસાઈટ પર ઓરિજિનલ ગેમ્સમાંથી કોપી કરાયેલ APIનો ઉપયોગ કરીને ફરીથી પ્રસારિત કરવામાં આવી હતી.

EDની તપાસમાં એ પણ જાણવા મળ્યું છે કે ખેલાડીઓ/સટોડિયાઓ દ્વારા મેજિકવિન વેબસાઈટ પર દર્શાવેલ બેંક ખાતાઓમાં જમા કરવામાં આવેલા નાણાં શેલ/મ્યુલ બેંક ખાતાના બહુવિધ સ્તરો દ્વારા રૂટ કરવામાં આવ્યા હતા. માલિકો દ્વારા મેળવેલ નફો ક્રિપ્ટો એસેટ્સમાં રોકાણ કરવામાં આવતા હતા. અને ત્યાર બાદ  રોકડમાં ઉપાડવામાં આવ્યા અથવાતો હવાલા ચેનલ દ્વારા દુબઈ મોકલવામાં આવ્યા હતા.

 પેમેન્ટ ગેટવે અથવા એગ્રીગેટર્સ સાથે બનાવેલ વિવિધ શેલ કંપનીઓના વેપારી ખાતા દ્વારા ખેલાડીઓ/સટ્ટાબાજોની જીત તેમના સંબંધિત બેંક ખાતામાં ટ્રાન્સફર કરવામાં આવી હતી. જીતેલી રકમ ડોમેસ્ટિક મની ટ્રાન્સફર (DMT) દ્વારા પણ ટ્રાન્સફર કરવામાં આવી હતી. તપાસ દરમિયાન, એવું બહાર આવ્યું છે કે મેજિકવિને ભારતમાં એક લોન્ચ પાર્ટીનું આયોજન કર્યું હતું, જેમાં બોલિવૂડની ઘણી હસ્તીઓએ હાજરી આપી હતી અને તેને સમર્થન આપ્યું હતું.