અમદાવાદઃ થર્ટી ફર્સ્ટની ઉજવણી માટે શોખીન નબીરાઓએ શરાબ-શબાબનું મેનેજમેન્ટ ગોઠવ્યુ
૩૧ ડિસેમ્બરે વધુ ભાવ મેળવવા બૂટલેગરોએ દારૂની કળત્રિમ તંગી ઊભી કરીઃ દારૂના ભાવમાં રાતોરાત ૧૦થી ૩૦ ટકા સુધીનો વધારોઃ રાજસ્થાનમાં રિસોર્ટ ફુલ મુંબઇ અને દિલ્હીના બારની ડાન્સરો પણ અમદાવાદમાં આવી પહોંચી છે : આ ડાન્સરો ૩૧મીની નાઇટે ફાર્મ હાઉસમાં ડાન્સની સાથે તમામ પ્રકારની મજા લોકોને આપશે
અમદાવાદ તા.૨૬: ૩૧ ડિસેમ્બર આડે ગણતરીના દિવસો બાકી રહ્યાં છે ત્યારે નવા વર્ષના વધામણાં કરવા શોખીન નબીરાઓએ અત્યારથી જ શરાબ સાથે શબાબનું મેનેજમેન્ટ ગોઠવી દીધું છે. અત્યારે શહેર પોલીસે ધોંસ વધારી દીધી છે ત્યારે નવું વર્ષ એન્જોય કરવા માટે રાજસ્થાનમાં અસંખ્ય રિસોર્ટનું બુકિંગ થઇ ચૂકયું છે. રાજસ્થાનમાં મોટા ભાગના રિસોર્ટ હાઉસફુલ થઇ ગયા છે. બીજી તરફ અત્યારથી જ દારૂનો સ્ટોક બૂટલેગરોએ કરી કળત્રિમ તંગી ઊભી કરી રહ્યાં છે. જેના કારણે ૩૧ ડિસેમ્બર પહેલાં પહેલાં દારૂના ભાવમાં ૧૦થી ૩૦ ટકા જેટલો વધારો થઇ ગયો છે. પોલીસની બૂટલેગરો પર ધોંસ વધતા દારૂમાં કેમિકલ મિશ્રણ કરવાનું પ્રમાણ વધી રહ્યું છે તેમ મયુર જોશીનો નવગુજરાત સમયનો અહેવાલ જણાવે છે
આ અંગે બૂટલેગરે નામ ન આપવાની શરતે જણાવ્યું કે, હાલ દારૂ ઓછા પ્રમાણમાં આવી રહ્યો છે, પરંતુ પીવાવાળા તો દરરોજ દારૂ લેવા આવે છે. જેથી ભાવમાં મોટો ઊછાળો આવ્યો છે. જેનો લાભ લેવા કેટલાક લોકો દારૂની બોટલનું બુચ ટેકનિકથી ખોલી તેમાંથી સારો દારૂ કાઢી અમુક ટકા પાણી ઉમેરી દે છે. જ્યારે દારૂની કિક(નશો) જલદી ચઢે તે માટે તેમાં સ્પિરિટ, દેશી દારૂ સહિતનું કેમિકલ ઉમેરી રહ્યાં છે. જેથી દારૂની સાઇડ ઇફેક્ટ થવાની શકયતા રહેલી છે. તેણે વધુમાં જણાવ્યું કે, બૂટલેગરોએ ૩૧ ડિસેમ્બરને લઇ દારૂનો મોટો જથ્થો જુદી જુદી જગ્યાએ મૂકી રાખ્યો છે અને છેલ્લા કેટલાક દિવસોથી દારૂની કળત્રિમ તંગી ઊભી કરી ભાવ વધારો કરી દીધો છે. પોલીસ પણ હાલ દારૂના સ્ટેન્ડની પરવાનગી માટે વધુ હપ્તા માગી રહી હોવાનો આક્ષેપ કર્યો છે. જેના કારણે ભાવ વધારવામાં આવ્યો છે અને જેનો બોજો ગ્રાહક પર જ પડે છે.
છેલ્લા કેટલાક વર્ષોની સરખામણીએ આ વર્ષે NDPSના કેસો અને મોટી માત્રામાં ડ્રગ્સ કબજે કરાયું છે ત્યારે ૩૧ ડિસેમ્બરની પાર્ટી માટે દારૂ કરતા MD ડ્રગ્સ, વીડ, ગાંજાની બોલબાલા વધી છે. ડ્રગ્સના પેડલરોએ જુદી જુદી જગ્યાએ માદક પદાર્થ ભેગા કરી લીધા છે અને ૩૧ ડિસેમ્બરની પાર્ટી માટે યુવકોને પણ પહોંચાડી દીધા છે. પોલીસથી બચવા માટે જ્યાં પાર્ટીનું આયોજન કરવાનું હોય તે જગ્યાએ જ પહેલાંથી જ MD ડ્રગ્સ, વીડ, ગાંજો સહિતના પદાર્થ મૂકી દેવાયા છે. બીજી તરફ MDના ભાવમાં પણ નોંધપાત્ર ઉછાળો થયો છે. શહેરમાં પહેલાં એક ગ્રામ MD ડ્રગ્સની કિંમત ૨૫૦૦થી ૩૦૦૦ હજાર સુધી હતી, જે વધીને ૩૫૦૦થી ૪૦૦૦ સુધી પહોંચી ગઇ હોવાનું સૂત્રોએ જણાવ્યું છે.
પોતાના બજેટ મુજબ દલાલોએ મુંબઇ, દિલ્હી, થાઇ અને રશિયન યુવતીઓ મગાવી આપી હોવાનું દલાલે નામ ન આપવાની શરતે જણાવ્યું હતું. એક દલાલે જણાવ્યું કે, આ વખતે સિટીમાં જુદી જુદી જગ્યાએ મહેફીલ પર પોલીસે ધોંસ બોલાવી છે ત્યારે દૂર-અંતરિયાળ વિસ્તારોમાં બની રહેલી નવી સ્કીમમાં મકાનો ભાડે રાખી ઓછા લોકો ભેગા થઇ આવી પાર્ટીઓનું આયોજન થઇ ચૂકયું છે. ૩૧ ડિસેમ્બર બપોર સુધી જ લલના, દારૂ સહિતનો સામાન નિયત જગ્યાએ પહોંચાડાશે અને ત્યારબાદ નવા વર્ષના વધામણાની પાર્ટી કરવામાં આવશે. આ માટે દલાલો એક દિવસના ૨૫થી લઇ ૪૦ હજાર સુધી ગ્રાહકો પાસે વસૂલી રહ્યાં છે.
દલાલોના કહેવા મુજબ, મજબૂરી કરતા પોતાના હાઇ પ્રોફાઇલ મોજશોખ પૂરા કરવા આ ધંધામાં વધુ યુવતીઓ આવે છે. આ રેશિયો ૭૦-૩૦નો હોય છે. જેમાં ૩૦ ટકા જ યુવતી પોતાની મજબૂરીને કારણે આવે છે. દિલ્હી-મુંબઇમાં રહેતી યુવતીઓ મોજશોખ માટે આવતી હોય છે. જેમાં ઘણી મોડલ પણ હોય છે. ઉપરાંત અભ્યાસ કરતી યુવતીઓ પણ હોય છે, જે મહિનામાં દસ દિવસ કોન્ટ્રાક્ટ પર આવી ૧.૨૫ લાખ કમાઇ લે છે અને પોતાના શોખ પૂરા કરે છે.
હાલ વોટ્સએપ મારફતે એસ્કોર્ટ સર્વિસ સરળતાથી ચાલી રહી છે. જેમાં દલાલો ગ્રાહકોને લલનાના ફોટા મોકલે છે અને તેના પૈસા પણ લખેલા હોય છે. ત્યારબાદ ગ્રાહક પાસે લલના નક્કી થઇ ગયા બાદ તેની ડિલિવરી ગોઠવાય છે. દલાલ તેના માણસ મારફતે રસ્તા પર ગાડીમાં લલનાને મોકલે છે અને પહેલા પૈસા લઇ ત્યારબાદ લલના સોંપી પરત આવે છે.
અમદાવાદમાં એસ્કોર્ટ ગર્લ્સના બે પ્રકારના માર્કેટ છે. જેમાં નેટ એટલે કે ઇન્ટરનેટ પર નંબર પરથી થતા ધંધા અને બીજા યુવતીને ઘર ભાડે-હોટલમાં રાખી કરવામાં આવતા ધંધા. નેટ સર્વિસમાં મોટા ભાગે મોટા ગજાની હોટલમાં થતા હોય છે અને બહારથી આવતા ગ્રાહકોને લૂંટવામાં આવતા હોય છે. જેમાં શોર્ટ કામ માટે રૂ. ૧૫થી ૨૦ હજાર લેવામાં આવે છે અને યુવતીને ફક્ત એક કે બે હજાર જ આપવામાં આવે છે. જ્યારે સ્થાનિક લોકો ઘરેલું સર્વિસ પસંદ કરે છે. કેમ કે, તે સસ્તી હોય છે. જે હોટલ કે ભાડાના ઘરમાં કરવામાં આવે તેના ભાવ શોર્ટ ટાઇમના ૨૫૦૦થી ૪૦૦૦ સુધીના હોય છે. જ્યારે વિદેશી યુવતી હોય તો ભાવ દોઢા થઇ જાય છે.
દલાલો અને લલનાઓ પોલીસથી બચવા માટે સોશિયલ મીડિયાનો ભરપૂર ઉપયોગ કરી રહ્યાં છે. ગ્રાહકોને વોટ્સએપ પર ફોટા નાખ્યા બાદ તેઓ વોટ્સએપ કોલિંગથી જ વાતો કરે છે, જેથી પોલીસથી બચી શકાય. આ ઉપરાંત ફેસબુક પર પણ કેટલાક પેજ બનાવીને તેઓ સિલેક્ટેડ ગ્રાહકોનો સંપર્ક કરે છે, પરંતુ સામેથી કોઇ તેમનો સંપર્ક કરે તો ઇનકાર કરવામાં આવે છે. આમ, પોલીસથી બચી શકાય અને ગ્રાહકો પણ સેફ રહે તે માટે દલાલો જોરશોરથી સોશિયલ મીડિયાનો ઉપયોગ કરતા થઇ ગયા છે.
અમદાવાદથી ઉત્તર ગુજરાતમાં મોટા ભાગે રાજસ્થાન બોર્ડર નજીક હોવાથી ત્યાંનો દારૂ કટિંગ કરી લાવવામાં આવે છે. જોકે, ગત વર્ષે જ રાજસ્થાન સરકારે દારૂના ભાવમાં ૧૫થી ૨૫ ટકા જેટલો વધારો કર્યો હતો. જેથી રાજસ્થાન ઠેકા પર પણ ભાવ વધારો લાગુ કરી દેવામાં આવ્યો છે. જેથી ગુજરાતમાં આવતો દારૂ પણ ૧૦થી ૩૦ ટકા જેટલો મોંઘો થઇ ગયો છે.
ઉઝબેકિસ્તાન, તુર્કમેનિસ્તાન, રશિયા, થાઇલેન્ડ સહિતના દેશમાંથી આવતી યુવતીઓ ત્યાં ગુનો કરી ભાગીને ટુરિસ્ટ વિઝા પર ભારત આવી જાય છે. ત્યાં ગંભીર ગુનો હોય અથવા પારિવારિક ઝઘડા થયા હોય તો યુવતીઓ પરત જતી નથી અને અહીં જ સ્થાયી થઇ લક્ઝુરિયસ લાઇફ જીવે છે. ઘણી એવી પણ યુવતીઓ હોય છે કે તે ભારતીય યુવક સાથે લગ્ન કરી અહીં સ્થાયી થઇ પોતાનું એસ્કોર્ટ નેટવર્ક આખા દેશમાં ચલાવે છે.
૩૧ ડિસેમ્બરે થર્ટી ફર્સ્ટની ઉજવણી કરવા માટે મુંબઇ અને દિલ્હીના બારની ડાન્સરો પણ અમદાવાદમાં આવી પહોંચી છે. આ ડાન્સરો ૩૧મીની નાઇટે ફાર્મ હાઉસમાં ડાન્સની સાથે તમામ પ્રકારની મજા લોકોને આપશે. આ માટે તેઓ તગડા પૈસા વસૂલે છે. ૩૧ ડિસેમ્બર પહેલાં ફ્લાઇટના ભાવ વધી ગયા છે, ત્યારે અઠવાડિયા પહેલાંથી જ લલનાઓને અમદાવાદ બોલાવી લેવાઈ છે અને સેફ જગ્યાએ રાખવામાં આવી હોવાનું જાણવા મળ્યું છે.(૨.૯)
(10:40 AM IST)
છેલ્લા 8 દિવસમાં સૌથી લોકપ્રિય 
