ભરૃચ,તા.૨૯,

ભરૃચ જિલ્લાના ઝઘડિયા તાલુકામાં સગીરા સાથે થયેલા દુષ્કર્મની ઘટનાના ઘેરા પ્રત્યાઘાત પડ્યા છે. ત્યારે આરોપીને ફાંસીની સજા આપવાની માંગણી સાથે આજે આદિવાસી સમાજના યુવાનો દ્વારા અનોખો વિરોધ  કરવામા આવ્યો હતો. નરાધમના પૂતળાને ફાંસીના માંચડે ચડાવી યુવકો જિલ્લા કલેકટર કચેરી ખાતે પહોંચ્યા હતા અને આવેદનપત્ર આપી આરોપીને જાહેરમાં ફાંસી આપવાની રજૂઆત કરી હતી.

મૂળ ઝારખંડના રહેવાસી અને ભરૃચ જિલ્લાના ઝઘડિયા તાલુકાના એક ગામમાં રહીને ગુજરાત ચલાવતા પરિવારની સગીરા નરાધમે દુષ્કર્મ આચર્યું  હતું. જે બાદ બાળકીને સારવાર અર્થે વડોદરાની સયાજી હોસ્પિટલ ખાતે ખસેડવામાં આવી હતી. જ્યાં સારવાર દરમિયાન તેનું મોત થયું હતું.

દીકરીનું મૃત્યુ થતાં વડોદરામાં રહેતા આદિવાસી સમાજના યુવાનો દ્વારા શુક્રવારે અનોખું વિરોધ પ્રદર્શન કરવામાં આવ્યું હતું. જેમાં યુવકોએ નરાધમનું પૂતળું તૈયાર કરી તેને ફાંસીના માંચડે ચડાવી જિલ્લા કલેક્ટર કચેરી ખાતે પહોંચ્યા હતા. જ્યાં તેમના દ્વારા દુષ્કર્મનો ભોગ બનેલી દીકરીને ન્યાય અપાવવા તેમજ કૃત્ય આચરનાર આરોપીને કડકમાં કડક કાર્યવાહી કરી ફાંસીની સજા આપવામાં આવે તેવી માંગણી કરવામાં આવી હતી.

સમાજના હાર્દિક વસાવાએ જણાવ્યું હતું કે, દુષ્કર્મના બનાવો ખૂબ જ વધી રહ્યા છે. ઝઘડિયામાં બનેલી દુષ્કર્મની ઘટના અત્યંત નિંદનીય  છે. પરંતુ અત્યાર સુધી તંત્રની આંખ ઉઘડતી નથી. આજે સમાજના યુવાનો દ્વારા પ્રતિકાત્મક પૂતળાને ફાંસી આપતો માંચડો તૈયાર કરીને દુષ્કર્મના આરોપીને ફાંસી આપવાની માગણી સાથે જિલ્લા કલેકટરને આવેદનપત્ર આપવામાં આવ્યું છે.