તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
રામદેવ મસાલા હવે ‘રામદેવ' નામથી પ્રોડક્ટ્સ નહીં વેચી શકે
અમદાવાદની એક સિવિલ કોર્ટે રામદેવ મસાલા અને રામદેવ એક્સપોર્ટ્સને લગતા એક ટ્રેડમાર્કના કેસ પર પૂણવિરામ મૂકી દીધું : મસાલા માટેના ટ્રેડમાર્ક રામદેવ અને રામદેવ મસાલા અંગેનો વિવાદ ૧૯૯૮માં શરૂ થયો હતો
અમદાવાદ, તા.૭: અમદાવાદની એક સિવિલ કોર્ટે રામદેવ મસાલા અને રામદેવ એક્સપોર્ટ્સને લગતા એક ટ્રેડમાર્કના કેસ પર પૂર્ણવિરામ મૂકી દીધું છે. રામદેવ ફૂડ પ્રોડક્ટ્સ પ્રાઈવેટ લિમિટેડ દ્વારા ઉઠાવવામાં આવેલા વાંધાઓ બાદ અમદાવાદની સિવિલ કોર્ટે રામદેવ મસાલા અને રામદેવ એક્સપોર્ટ્સ, તેના માલિકો સહિત ટ્રેડમાર્ક રામદેવ અને રામદેવ મસાલા માટે તેના લેબલનો ઉપયોગ કરવા પર કાયમી પ્રતિબંધ મૂકી દીધો છે. આ સાથે સિવિલ કોર્ટે ૨૫ વર્ષ જૂના ટ્રેડમાર્કના કેસને સમાપ્ત કરી દીધો છે.
ટાઈમ્સ ઓફ ઈન્ડિયાના રિપોર્ટ પ્રમાણે જજ જેએમ બ્રહ્મભટ્ટે કાયમી મનાઈહુકમ જારી કર્યો હતો અને ફર્મ્સ તથા તેમના માલિકોને રામદેવ ફૂડ પ્રોડક્ટ્સને ટ્રેડમાર્ક ઉલ્લંઘન અને તેમના ઉત્પાદનોની ખોટી રજૂઆત માટે એક કરોડ રૂપિયાનું વળતર આપવાનો આદેશ આપ્યો હતો. જોકે, નિષ્ફળ રહેલા પક્ષે હાઈકોર્ટનો સંપર્ક કરવા માટે સમય માંગ્યો ત્યારે જજે આ ચુકાદાને સ્થગિત કરવાનો ઈનકાર કર્યો હતો. કોર્ટે તેમને નુકસાની ભરવા માટે એક મહિનાનો સમય આપ્યો હતો.
મસાલા માટેના ટ્રેડમાર્ક રામદેવ અને રામદેવ મસાલા અંગેનો વિવાદ ૧૯૯૮માં શરૂ થયો હતો જ્યારે અરવિંદભાઈ પટેલ સહિત ત્રણ ડિરેક્ટરોએ રામદેવ ફૂડ પ્રોડક્ટ્સમાંથી વિદાય લીધી હતી. રામદેવ ફૂડ પ્રોડક્ટ્સ છોડયા બાદ પટેલેની કંપનીઓએ તેમના મસાલા માટે રામદેવ ટ્રેડમાર્કનો ઉપયોગ કરીને પ્રોડક્ટ્સનું ઉત્પાદન અને વેચાણ ચાલુ રાખ્યું હતું. ૧૯૯૯માં રામદેવ ફૂડ પ્રોડક્ટ્સે પટેલ તથા તેમના પરિવારના પાંચ સભ્યો અને તેમની બે કંપનીઓ સામે તેમના ટ્રેડમાર્ક રામદેવનું ઉલ્લંઘન કરવા બદલ ટ્રેડમાર્ક દાવો દાખલ કર્યો હતો. રામદેવ ફૂડ પ્રોડક્ટ્સ આ ટ્રેડમાર્કનો ઉપયોગ ૧૯૮૯થી કરે છે.
ટ્રેડમાર્કનો આ વિવાદ સુપ્રીમ કોર્ટમાં પહોંચ્યો હતો. જોકે, સુપ્રીમ કોર્ટે શહેરની સિવિલ કોર્ટને આ કેસ પર ઝડપી કાર્યવાહી કરવા માટે નિર્દેશ આપ્યો હતો. અરજદારે વિશિષ્ટ ટ્રેડમાર્ક રાઈટ્સ પર ભાર મૂકયો હતો અને નોંધ્યું હતું કે ડિફેન્ડન્ટ્સે ટ્રેડમાર્ક ‘સ્વાદ' રજીસ્ટર કરાવ્યા હોવા છતાં, તેઓ રામદેવ ટ્રેડમાર્ક હેઠળ પ્રોડક્ટ્સ વેચતા હતા અને તેનું વેચાણ ઓછા ભાવે કરતા હતા.
વ્યાપક સુનાવણી અને ડોકયુમેન્ટ્સની તપાસ બાદ અદાલતે અરજદારના દાવાને માન્ય રાખ્યો હતો. અદાલતે ડિફેન્ડન્ટ્સ તથા તેમના પ્રતિનિધિઓ અને ભાગીદારોને કોઈપણ સ્પાઈસિસ, મસાલા અથવા સંબંધિત માલસામાનના સંબંધમાં ‘રામદેવ' નામનો ઉપયોગ કરવાથી અને કોઈપણ લેબલનો ઉપયોગ કરવાથી કાયમી પ્રતિબંધ લગાવી દીધો છે. પેકિંગ મટિરિયલ, એડવર્ટાઈઝિંગ મટિરિયલ અથવા ટ્રેડ નામ જેમાં‘રામદેવ' હોય અથવા કોઈપણ ટ્રેડમાર્ક હોય જે સમાન અથવા ભ્રામક હોય તથા અરજદારના ટ્રેડમાર્ક ‘રામદેવ' જેવું જ છે તેનો ઉપયોગ કરી શકાશે નહીં.(૨૩.૭)
(9:50 PM IST)
છેલ્લા 8 દિવસમાં સૌથી લોકપ્રિય 
