તા. ૧૦ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧ મંગળવાર
બેફામ વ્યાજ વસૂલાત ગરીબોનું શોષણ કરી તેમનું જીવન વિખેરી નાખે છે
ફરિયાદી સાથે સમાધાન થઇ ગયાના આધારે FIR રદ કરવાની માગ કરતી નાણાં ધીરનારની અરજી ફગાવીઃ વ્યાજે નાણાં આપી બેફામ વ્યાજ વસૂલતા તત્ત્વો માટે લાલબત્તી સમાન હાઇકોર્ટનો મહત્ત્વપૂર્ણ ચુકાદોઃ રાજકોટનો છે કેસ : કોઇ વ્યક્તિ પાસે ગુજરાત મની લેન્ડર્સ એક્ટ, ૨૦૧૧ હેઠળ મની લેન્ડરનું લાઇસન્સ હોય તો પણ તેને રિઝર્વ બેન્ક ઓફ ઇન્ડિયા (RBI)ના નિર્ધારીત વ્યાજ દરથી વધુ વ્યાજ વસૂલવાનો પરવાનો મળતો નથી
અમદાવાદ, તા.૧૭: વ્યાજે નાણાં આપી બેફામ વ્યાજ વસૂલતા તત્ત્વો માટે લાલબત્તી સમાન ચુકાદો હાઇકોર્ટે આપ્યો છે. ફરિયાદી સાથે સમાધાન થઇ ગયાના આધારે FIR રદ કરવાની માગ કરતી નાણાં ધીરનારની અરજી ફગાવી કાઢતાં હાઇકોર્ટના જસ્ટિસ સંદીપ ભટ્ટે એવો આકરો આદેશ કર્યો છે કે,‘કોઇ વ્યક્તિ પાસે ગુજરાત મની લેન્ડર્સ એક્ટ, ૨૦૧૧ હેઠળ મની લેન્ડરનું લાઇસન્સ હોય તો પણ તેને રિઝર્વ બેન્ક ઓફ ઇન્ડિયા (RBI)ના નિર્ધારીત વ્યાજ દરથી વધુ વ્યાજ વસૂલવાનો પરવાનો મળતો નથી. પ્રસ્તુત કેસના આરોપી પાસે મની લેન્ડરનું લાઇસન્સ હોવા છતાંય તે મહિને ૩ ટકા (વર્ષે ૩૬ ટકા)ના હિસાબે વ્યાજ વસૂલતો હતો. આવી રીતે વ્યાજે રૂપિયા આપીને બેફામ વ્યાજ વસૂલતા તત્ત્વો ગરીબો અને જરૂરિયાતમંદોનું શોષણ કરી તેમનું અને તેમના સમગ્ર કુટુંબનું જીવન વેરવિખેર કરી કાઢે છે. લોકો આવા વ્યાજખોરોના વ્યાજના વિષચક્રમાં ફસાઇ જાય છે. ત્યારે આવા કેસોના આરોપીઓ સામેની ફોજદારી કાર્યવાહી કોર્ટોએ રદ કરવી ન જોઇએ.'
નિર્દોષ, ગરીબ લોકો અને તેમના કુટુંબના હિત અને સામાજિક સંવાદિતાને સીધા અસર કરતી આવી ઘટનાઓનો ‘ગર્ભિત અર્થ' કોર્ટોએ સમજીને વ્યાજખોરી કરતા આરોપીઓ સામેની ફોજદારી કાર્યવાહી રદ કરવાનો ઇનકાર કરી દેવો જોઇએ. એવું મર્મસ્પર્શી અને વિવેકપૂર્ણ અવલોકન કરતા જસ્ટિસ સંદીપ એન. ભટ્ટે ઠરાવ્યું હતું કે,‘આરોપીની તરફેણમાં આદેશ નહીં કરવા માટેનો આ ફીટ કેસ છે અને તેથી તેની પિટિશન રદબાતલ કરવામાં આવે છે.' તેમ નવગુજરાત સમયનો અહેવાલ જણાવે છે.
રાજકોટના ગાંધીગ્રામ-૨ યુનિવર્સિટી પોલીસ સ્ટેશનમાં અરજદાર આરોપી અમિતભાઇ રમેશભાઇ વિરુદ્ધ જ્ત્ય્ નોંધાઇ હતી. જેને રદ કરવા તેણે હાઇકોર્ટમાં રિટ પિટિશન કરી હતી અને એવી રજૂઆત કરી હતી કે અરજદાર જોડે ધી ગુજરાત મની લેન્ડર્સ એક્ટ,૨૦૧૧ હેઠળ કાયદેસર મની લેન્ડર તરીકેનું લાઇસન્સ છે. બીજી તરફ ફરિયાદી અને આરોપી વચ્ચે સમજૂતીપૂર્વક સમાધાન થઇ ગયું છે અને આ ગુનાની જ્ત્ય્ રદ થાય તો ફરિયાદીને વાંધો નથી. તેથી કોર્ટે અરજદારને રાહત આપતા તેની સામેની FIR રદ કરવાનો હુકમ કરવો જોઇએ. જ્યારે કે રાજ્ય સરકાર તરફથી પિટિશનનો વિરોધ કરવામાં આવ્યો હતો અને હાઇકોર્ટે કોઇ હસ્તક્ષેપ કરવો ન જોઇએ એવી રજૂઆત કરી હતી. તમામ રજૂઆતોના અંતે હાઇકોર્ટે અરજદારને રાહત આપવાનો ઇનકાર કરી રિટ ફગાવી કાઢી દીધી હતી.
વ્યાજના વિષચક્રમાં ફસાયેલા કુટુંબના આપઘાતના કિસ્સા વ્યથિત કરનારા, આ કેસના ચુકાદામાં હાઇકોર્ટે એવી વ્યથા દર્શાવી હતી કે વ્યાજના વિષચક્રમાં ફસાયેલા આખા કુટુંબને આપઘાત કરવો પડતો હોવાના સમાચારો અખબારોમાં આવતા રહે છે. બેફામ વ્યાજનો બોજો આપઘાતનું કારણ બને એ વ્યથિત કરનારું.
નાણાં ધીરનારાઓ મોટાભાગે રાજકારણ અથવા કાયદાની એજન્સીઓ સાથે કોઇને કોઇ રીતે સંકળાયેલા. હાઇકોર્ટે એવું અવલોકન પણ કર્યું છે કે,‘આવા ફાઇનાન્સનો ધંધો કરતા લોકો મોટાભાગે માથાભારે હોય છે અને તેમનું ગુનાઇત ભૂતકાળ પણ હોય છે. એટલું જ નહીં મોટાભાગે તેઓ રાજકારણીઓ અને કાયદાની એજન્સીઓ સાથે કોઇને કોઇ રીતે સંકળાયેલા હોય છે. તેથી તેમની સામે નક્કર કાર્યવાહી થતી નથી અને તેના કારણે ફાઇનાન્સરો દ્વારા થતી ગેરકાયદે પ્રવળત્તિઓનો એક મોટાભાગનો સમાજ ભોગ બને છે.'(રર.૧૦)
(2:48 PM IST)
છેલ્લા 8 દિવસમાં સૌથી લોકપ્રિય 
