વડોદરા જિલ્લાના સાવલી રોડ પર માતેલા સાંઢની માફક પુરપાટ દોડતી ખાનગી કંપનીની બસે બાઈકને ઠોકરે ચડાવ્યું હતુ. આ ગમખ્વાર અકસ્માતમાં બાઈક પર જઈ રહેલ મહિલાનું મોત નિપજ્યું છે, જ્યારે પતિને ગંભીર હાલતમાં હોસ્પિટલ ખસેડવામાં આવ્યા છે.

આ અંગે પ્રાપ્ત વિગતો મુજબ, ગેનીબેન વણકર નામની મહિલા મંજુસર સ્થિત કંપનીમાંથી નોકરી પૂર્ણ કરીને પોતાના પતિ ખાતુભાઈના બાઈક પર પાછળ બેસીને ઘરે જવા નીકળ્યા હતા. આ દરમિયાન સાવલી રોડ પર ગોઠડા ગામ નજીક ખાનગી કંપનીના કામદારોને લઈને આવતી એસ.આર. ટ્રાવેલ્સની બસે તેમના બાઈકને અડફેટમાં લીધુ હતુ.

આ અકસ્માતના પગલે લોકોના ટોળા એકઠા થઈ ગયા હતા. બીજી તરફ આ બનાવની જાણ થતાં સાવલી પોલીસનો કાફલો ઘટના સ્થળે દોડી આવ્યો હતો. જેમણે પંચનામું કરીને ગેનીબેનના મૃતદેહને પોસ્ટમોર્ટમ અર્થે મોકલી આગળની કાયદેસરની કાર્યવાહી હાથ ધરી હતી.