અમદાવાદ, તા.૧૭: શાળામાં બે વાર મોબાઇલ ફોન સાથે પકડાયેલા વિદ્યાર્થીઓને શાળા છોડવાનું પ્રમાણપત્ર આપવામાં આવશે.  રાજ્‍ય સરકાર દ્વારા શાળાઓમાં મોબાઇલ ફોનના ઉપયોગ અંગેના નવા નિયમોના એક ભાગની  માર્ગદર્શિકા છે. જે  ટૂંક સમયમાં જાહેર થવાની તૈયારીમાં છે.

શાળાઓમાં મોબાઇલ ફોનના ઉપયોગને નિયંત્રિત કરવાનો નિર્ણય એક દુઃખદ ઘટના પછી લેવામાં આવ્‍યો છે જેમાં એક ૧૪ વર્ષની છોકરીએ તેની માતાએ ફોનનો ઉપયોગ નકારતા આત્‍મહત્‍યા કરી હતી. આ પછી, શિક્ષણ વિભાગે નવા નિયમો ઘડવા માટે અધિકારીઓ, નિષ્‍ણાતો અને શિક્ષણવિદો સાથે શ્રેણીબદ્ધ બેઠકો યોજીહતી.

શિક્ષણ વિભાગે ખાસ કરીને વર્ગખંડોમાં મોબાઇલ ફોન પર કડક પ્રતિબંધ લાદવાનો નિર્ણય લીધો છે. જો કોઈ વિદ્યાર્થી બે વાર ફોન સાથે પકડાય છે, તો તેને શાળા છોડી દેવાનું કહેવામાં આવશે. પ્રાથમિક, માધ્‍યમિક અને પુખ્‍ત શિક્ષણ રાજ્‍યમંત્રી પ્રફુલ્લ પાનશેરિયાએ મિરર સાથે વાત કરતા જણાવ્‍યું હતું કે, અમે આગામી શૈક્ષણિક વર્ષથી અમલમાં આવનારી નવી માર્ગદર્શિકાનો કડક અમલ સુનિશ્‍ચત કરીશું.

તેમણે ઉમેર્યું કે, જિલ્લા શિક્ષણ અધિકારીઓ મોબાઇલ ફોન પ્રતિબંધ અંગે જાગળતિ લાવવા માટે વાલીઓ સાથે બેઠકો યોજશે. શાળાના આચાર્યો અને શિક્ષકો પણ વાલીઓને મોબાઇલ ફોનના ઉપયોગના જોખમો વિશે શિક્ષિત કરશે. વિદ્યાર્થીઓ સોશિયલ મીડિયાથી દૂર રહે તે ખૂબ જ મહત્‍વપૂર્ણ છે, મંત્રીએ ભારપૂર્વક જણાવ્‍યું.

ઘણા વાલીઓ સલામતી અને સંદેશાવ્‍યવહારના હેતુથી વિદ્યાર્થીઓને મોબાઇલ ફોન સાથે રાખવા દેવાનો આગ્રહ રાખે છે. જોકે, અધિકારીઓ એ સુનિશ્‍ચિત કરવાની યોજના ધરાવે છે કે વિદ્યાર્થીઓ ફક્‍ત ઇન્‍ટરનેટ ઍક્‍સેસ વિના જ ફોનનો ઉપયોગ કરે. આજકાલ, શિક્ષકો મોબાઇલ ફોન દ્વારા અભ્‍યાસ સામગ્રી અને સોંપણીઓ પણ શેર કરે છે. વર્ગખંડમાં આ સુવિધા માટે એક સિસ્‍ટમ વિકસાવવામાં આવશે, જ્‍યાં નોંધો આપવામાં આવશે, મંત્રીએ કહ્યું.

શિક્ષકોને પણ સલાહ આપવામાં આવશે કે તેઓ પોતાના મોબાઇલ ફોનનો ઉપયોગ મર્યાદિત કરે, ખાસ કરીને વર્ગખંડોમાં. વારંવાર ઉલ્લંઘન કરવાથી તેમની સામે શિક્ષાત્‍મક કાર્યવાહી પણ થઈ શકે છે.

નિયમોને અંતિમ સ્‍વરૂપ આપવામાં આવ્‍યું છે અને મુખ્‍યમંત્રીની મંજૂરીની રાહ જોવાઈ રહી છે. એકવાર મંજૂરી મળ્‍યા પછી, એક માનક સંચાલન પ્રક્રિયા ઘડવામાં આવશે, અને તેનો અમલ જૂન ૨૦૨૫ માં શરૂ થવાની અપેક્ષા છે, એમ પાનશેરિયાએ જણાવ્‍યું હતું. (રર.૩)