(વંદના નીલકંઠ વાસુકીયા) વિરમગામ : વિરમગામ માંડલ દેત્રોજ અને નળકાંઠા મતવિસ્તારના ધારાસભ્ય હાર્દિક પટેલે અમદાવાદ-માળીયા કચ્છ રોડ સિક્સ લેન બનાવવા મુખ્યમંત્રી ભુપેન્દ્રભાઈ પટેલને પત્ર લખી રજૂઆત કરી છે.

      ધારાસભ્ય હાર્દિક પટેલ મુખ્યમંત્રી ભુપેન્દ્રભાઈ પટેલને સંબોધીને લખેલા પત્રમાં જણાવ્યું કે, અમદાવાદ-માળીયા રોડ એ કચ્છનો પ્રવેશ દ્વાર હોવાથી અમદાવાદ-માળીયા-કચ્છ રોડ તરફ રાત-દિવસ ટ્રાફિકનો પ્રવાહ ચાલતો રહેતો હોય છે. આ ઉપરાંત વિશ્વના બીજા નંબરના સૌથી મોટા સિરામીક કલસ્ટર મોરબીમાં દેશ-વિદેશમાંથી અનેક વેપારીઓ, ઉદ્યોગકારો નિયમિત આવન-જાવન કરતાં હોય છે. તદઉપરાંત કચ્છમાં સોલ્ટ ઉદ્યોગ અને કંડલા બંદર આવેલ હોવાથી ઉદ્યોગકારો અને ભારે કન્ટેનરોની નિયમિત આવન-જાવન આ રોડ ઉપર થતી હોય છે. દેશ-વિદેશમાંથી અનેક વેપારીઓ, ઉદ્યોગકારો અમદાવાદ એરપોર્ટથી બાય રોડ વિરમગામ-માંડલ ઇન્વેસ્ટમેન્ટ ઝોન વિસ્તાર, મોરબી અને કચ્છ આવવા-જવા માટે આ હાઇવેનો ઉપયોગ કરતાં હોય છે, આથી આ હયાત ફોર લેન રોડને જો સિક્સ લેન બનાવવામાં આવે તો ટ્રાફિકની સમસ્યાનું સુખદ સમાધાન આવશે. આથી આ રોડને સિક્સ લેન કરવો જરૂરી છે.‌વધુમાં, વિરમગામ, માંડલ વિસ્તારમાં નેશનલ તથા મલ્ટી નેશનલ કંપની હોવાથી ટ્રાફિક વધુ જોવા મળે છે. તેમજ હળવદ શહેર વચ્ચે અમદાવાદ-કચ્છ હાઇવે પસાર થાય છે. સદર હાઇવે ઉપર સતત ભારે ટ્રાફિક રહે છે. જેના કારણે વૃધ્ધો, વિદ્યાર્થીઓ તથા રાહદારીઓને રોડ ક્રોસ કરવામાં પારાવાર મુશ્કેલીનો સામનો કરવો પડે છે. તથા નાના-મોટા અકસ્માત થતાં રહે છે. આ ઉપરાંત સદર રોડ ઉપર ઉપરથી વિરમગામ એ.પી.એમ.સી. જવાય છે. અને રોડ પર હળવદ એ.પી.એમ.સી. હોવાથી આ હાઇવે ઉપર વાહનોની અવર-જવર સતત રહેતી હોય છે. જેથી ખેડુતમિત્રો તથા મજુરમિત્રો અવાર-નવાર અકસ્માતનો ભોગ બનવું પડે છે. આમ, ઉપરોક્ત રોડના બંને કામોને આગામી બજેટમાં સમાવેશ કરી આ કામો માટે જરૂરી બજેટ ફાળવવા મારી આપ સાહેબશ્રીને અંગત ભલામણ સહ વિનંતી કરૂ છુ. સહકારની અપેક્ષા સહ આભાર.