ઊંઝા,તા.૮ :ઊંઝા સ્થિત કડવા પાટીદાર કુળદેવી શ્રી ઉમિયા માતાજી મંદિરના જનરલ હોલમાં બેસેલા ખંભાતના યાત્રિકને માતાજીનો પ્રસાદ ખવડાવી બેભાન કરી એકાએક ઘેન ચડતાં યાત્રિક સૂઈ ગયો હતો.

આ વખતે વડોદરાનો વ્યક્તિ ઓશિકા નીચે રહેલી ચાવી લઈ લોકરમાંથી રૃ.૧૫૦૦૦ની ચોરી કરી લઈ જતાં ઊંઝા પોલીસ સ્ટેશનમાં ફરિયાદ નોંધાઇ છે.

પ્રાપ્ત વિગતો અનુસાર આણંદના ખંભાત ખાતે રહેતા હિતેશભાઈ નારાણભાઈ રાણા રાજપુત ઉમિયા માતાજીના દર્શન કરવા આવ્યા હતા. તેઓ ગત તા. ૬ માર્ચ ૨૦૨૫ની રાત્રિના આશરે દશેક વાગ્યે ઉમિયા માતા મંદિરના જનરલ હોલ ખાટલા નં. ૧૩માં બેઠેલા હતા. એ વખતે રાહુલ મહેતા નામનો ઈસમ આવ્યો હતો અને ઉમિયા માતાજીનો પ્રસાદ આપ્યો હતો. જેથી પ્રસાદ ખાતા ઘેન ચડતાં હિતેશભાઈ સૂઇ ગયા હતા. જેનો લાભ લઈ રાહુલ મહેતાએ ઓશિકા નીચે મૂકેલી લોકરની ચાવી લઈ લોકર ખોલી રૃ. ૧૫૦૦૦ ચોરી લીધા હતા. આથી ઉમિયા માતાજી મંદિરના સિકયુરિટી ગાર્ડના માણસોએ ઈસમને ઝડપી લીધો હતો. આ બનાવ સંદર્ભે ઊંઝા પોલીસે હિતેશભાઈ નારાણભાઈ રાણાના નિવેદનને આધારે રાહુલ જગદીશચંદ્ર મહેતા (રહે. જ્યોતિપાર્ક સોસાયટી, આમ્રપાલી કોપ્લેક્સની બાજુમાં, કારેલી બાગ, વડોદરા) સામે ગુનો દાખલ કરી વધુ તપાસ હાથ ધરી છે.