અમદાવાદ તા.૧૧ : ગુજરાત સરકારના શ્રમ, કૌશલ્ય વિકાસ અને રોજગાર વિભાગ હેઠળની રાજ્ય યુનિવર્સિટી, કૌશલ્યા – ધ સ્કીલ યુનિવર્સિટી (KSU), એ અમદાવાદના ચાંદખેડા કેમ્પસ ખાતે FIND-JOBS જર્મની અને ડૉ. સ્કીલ આઉટરીચ પ્રાઇવેટ લિમિટેડ, ભારત સાથે એક મહત્વપૂર્ણ ત્રિપક્ષીય સમજૂતી કરાર (MoU) પર હસ્તાક્ષર કર્યા છે.

આ એમ.ઓ.યુ.નો મુખ્ય ઉદ્દેશ્ય પ્રવાસન, હોસ્પીટાલીટી અને લોજિસ્ટિક્સ ક્ષેત્રોમાં કુશળ માનવબળ વિકસાવવા માટે સહયોગી માળખું વિકસાવવાનો છે. આ ભાગીદારી ઉદ્યોગની જરૂરીયાત મુજબ અભ્યાસક્રમ ડિઝાઇન કરવા, પ્રાયોગીક તાલીમની સુવિધા આપવા અને વિદ્યાર્થીઓ માટે વધુ સારી રોજગાર ક્ષમતા સુનિશ્ચિત કરવા પર ધ્યાન કેન્દ્રિત કરશે. વધુમાં, તે ફેકલ્ટી વિકાસ કાર્યક્રમો, ટ્રેનિંગ-ઓફ-ટ્રેનર (ToT) અને શિક્ષણ અને ઉદ્યોગ વચ્ચેના અંતરને દૂર કરવા માટે ઉદ્યોગ નિષ્ણાતો સાથેની સહભાગિતાને સક્ષમ બનાવશે.

આ એમ.ઓ.યુ. દ્વારા, વિદ્યાર્થીઓને ઇન્ટર્નશિપ અને એપ્રેન્ટિસશીપની તકો મળશે, તેમના વ્યવહારુ અનુભવમાં વધારો થશે અને તેમને વૈશ્વિક કારકિર્દીની સંભાવનાઓ માટે તૈયાર કરવામાં આવશે. વધુમાં, આ એમ.ઓ.યુ.માં વિશિષ્ટ બ્રિજ કોર્સ દ્વારા અપસ્કિલિંગ અને રિસ્કિલિંગ કાર્યક્રમોનું આયોજન કરવાની જોગવાઈઓ પણ સામેલ છે, જે આ ક્ષેત્રોમાં સતત વ્યાવસાયિક વિકાસ માટે ખૂબ જ ઉપયોગી છે.

આ હસ્તાક્ષર સમારોહમાં કૌશલ્યા – ધ સ્કીલ યુનિવર્સિટી તરફથી પ્રોફેસર (ડૉ.) એસ.પી. સિંહ, ડાયરેક્ટર જનરલ, રેખા નાયર રજિસ્ટ્રાર, ડૉ. મનીષ ગુપ્તા, ડિરેક્ટર એકેડેમિક્સ, અને  પંકજ મિસ્ત્રી, ચીફ સ્કીલ કોઓર્ડિનેટર તથા FIND-JOBS જર્મનીના CEO એલેક્ઝાન્ડર હૌસર અને ડૉ. સ્કીલ આઉટરીચ પ્રાઇવેટ લિમિટેડના CEO શ્રી સુધાંશુ જાંગિડ હાજર રહ્યા હતા.

આ પ્રસંગે ઉપસ્થિત પ્રતિનિધિઓએ કૌશલ્ય વિકાસની આ પહેલને મજબૂત બનાવવા અને રાજ્યના યુવાનો માટે આંતરરાષ્ટ્રીય કારકિર્દી બનાવવા માટે તેમની પ્રતિબદ્ધતા વ્યક્ત કરી. આ સહયોગ વિદ્યાર્થીઓને વૈશ્વિક રોજગાર તકો સાથે જોડીને અને ઉદ્યોગ-સંબંધિત કુશળતાથી સજ્જ કરીને તેમના માટે નવા રસ્તા ખોલવાની અપેક્ષા રાખે છે.

આ વ્યૂહાત્મક ભાગીદારી સાથે, કૌશલ્યા – ધ સ્કીલ યુનિવર્સિટી કૌશલ્યની માંગને પહોંચી વળવા અને વિદ્યાર્થીઓને વિશ્વ કક્ષાની તાલીમ અને રોજગારની તકો સાથે સશક્ત બનાવવાના તેના મિશનને વધુ મજબૂત બનાવવા માટે પ્રગતિશીલ પગલાં લેવા સજ્જ છે.