અમદાવાદઃ બીઆરટીએસમાં મુસાફરી કરતાં લોકો માટે માઠા સમાચાર છે. બીઆરટીએસ માટે હવે નવા કોરિડોર નહીં બને. અમદાવાદ ઉપરાંત રાજકોટ અને સુરતના નવા વિસ્‍તોરમાં બીઆરટીએસની સુવિધાનો લાભ નહીં મળે. તંત્ર દ્વારા તેનું વિસ્‍તરણ બંધ કરવાનો નિર્ણય લેવામાં આવ્‍યો છે. ઉપરાંત નવા કોરિડોર બનાવવાની કામગીરી અટકાવી દેવામાં આવી છે. સૂત્રોના જણાવ્‍યા મુજબ, બીઆરટીએસના નવા કોરિડોર બનાવવાની કામગીરી કોરોના કાળ પહેલા જ બંધ કરી દેવામાં આવી છે. તેને મિક્‍સ ટ્રાફિકમાં જ દોડાવવામાં આવી રહી છે. છેલ્લે અમદાવાદના બોપલ વિસ્‍તારમાં બીઆરટીએસ કોરિડોર બન્‍યો હતો. જે બાદ નવો કોરિડોર બન્‍યો નથી. સુરત અને રાજકોટમાં પણ નવા કોરિડોર બનાવાતા નથી. મિક્‍સ ટ્રાફિકમાં જ બીઆરટીએસ બસો દોડાવવામાં આવી રહી છે.

અમદાવાદમાં બીઆરટીએસ શરૂ કરવામાં આવી ત્‍યારે શહેરના વિવિધ વિસ્‍તારોમાં અલગથી કોરિડોર બનાવાયા હતા. બસો ઝડપથી અને સરળતાથી પસાર થાય તે માટે કોરિડોર બનાવવામાં આવ્‍યા હતા. તેમજ અલગથી સિગ્નલ પણ આપવામાં આવ્‍યું હતું. તંત્ર દ્વારા એવું દર્શાવવામાં આવ્‍યું છે કે અગાઉ દરેક જગ્‍યાએ રૂટ ઉપર રોડ પહોળા ન હોવાથી ત્‍યાં કોરિડોર બનાવવામાં બસ પસાર થઈ શકે તેમ નહોતી એટલે કોરિડોર બનાવ્‍યા, પણ હવે ખૂબ પહોળા હોવાથી કોરિડોર બનાવવામાં આવતા નથી. જોકે કોરિડોર ન બનાવવા મામલે કોઈ સ્‍પષ્ટતા કરવામાં આવતી નથી.

ઉલ્લેખનીય છે કે અમદાવાદમાં બીઆરટીએસના પ્રથમ તબક્કાનો પીરાણા અને આરટીઓને જોડતો માર્ગ ૧૪ ઓક્‍ટોબર, ૨૦૦૯ના રોજ તત્‍કાલીન મુખ્‍ય પ્રધાન નરેન્‍દ્ર મોદીએ ખુ્‌લ્લો મુકયો હતો.